Gulrótakaka

Var búin að lofa að henda inn þessari uppskrift í dag :) Hún sló allavega vel í gegn hjá vinnufélögum. Hef þetta stutt og helli mér beint í uppskriftina.

Gulrótakaka

Botn

3 stór egg

85g möndlumjöl

35g kókoshveiti frá Funksjonell

2tsk vínsteinslyftiduft

1/2tsk matarsódi

1.5tsk kanill

1/2tsk negull

110g Sukrin eða Sukrin Gold

50g brætt smjör

150ml möndlumjólk

3-4 meðalstórar gulrætur, rifnar

Þeytið egg og Sukrin vel saman.

Bætið við þurrefnum og svo smjöri.

Möndlumjólk og gulrætur bætt við í lokin og blandað vel saman við.

Setjið í 20cm silikonform og bakið á 45-50 mínútur á 175 gráður.

Krem

200g rjómaostur

5msk smjör

1tsk vanillu extrackt eða dropar

100g Sukrin melis

Þeytið rjómaost og smjör vel saman þar til smá fluffy.

Bætið restinni við í áföngum og smyrjið svo kremið á kökuna þegar hún er orðin köld.

Skreytti svo kökuna með kókosflögum sem ég var búin að brúna á þurri pönnu

Sykurlausar súkkulaði brownies.

Það er skrítið hvað lífið getur komið manni á óvart. Fyrir nokkrum mánuðum síðan var ég viss um að ég myndi aldrei aftur vinna við menntun mína og fann fyrir söknuði að vera ekki í starfi á spítala.

Í dag er ég svo heppinn að hafa fengið draumavinnu á Landspítalanum, á deild þar sem ég fæ að læra heilmikið um það líffæri sem er búið að vera valda veseni hjá eiginmanninum, hjartað.

Já það er yndislegt að vera búin að finna vinnu sem maður sér sig vera í þar til maður hættir að vinna vegna aldurs ;)

Það kannski skírir líka afhverju nýjar uppskriftir eru ekki að rúllast hér inn enda er maður enn að finna aðeins réttu rútínuna og jafnvægið milli heimilis og vinnu aftur.

En síðustu helgi bjó ég til þessa dásemd og tók til tengdó þegar þau buðu okkur í kjötsúpu.

Sykurlausar brownies

3 stór egg (aðskilja hvítur og rauður)

150g valhnetur eða aðrar hnetur

125g smjör stofuhita

150g sykurlaust súkkulaði (ég notaði Valor)

2msk Fibersirup Gold

50g Sukrin

Ef þið viljið glútenlaust köku þarf að passa að velja súkkulaði sem er glútenlaust. IQ er með sykur og glútenlaust súkkulaði og Valor er líka með og er það þá sérmerkt.

Stífþeytið eggjahvítur og setjið til hliðar.

Þeytið Sukrin og eggjarauður vel saman og bætið svo smjörinu og fibersirup gold við 

og þeytið áfram.

Saxið súkkulaði og hnetur og bætið við deigið.

Í lokin eru eggjahvítur varlega blandaðar við.

Setjið í form sem er 20x20 cm. Ég kaupi yfirleitt einnota í Bónus.

Bakið á 170 gráðum í 40-45 mín eða þar til tannstöngull eða gaffall kemur hreinn úr kökunni.

Berið fram með þeyttum rjóma og berjum. (Það er eiginlega algjört möst;))

Vanillu rúlla með hindberjakremi

Þessi uppskrift er búin að vera í kollinum á mér í þónokkurn tíma en eins og með svo margt þá þarf ég að vera í rétta stuðinu til að koma þessu í verk. Núna er akkúrat þannig stemming á mér að hugmyndirnar komast úr hausnum og verða að veruleika. Búin að taka sumarþrifið á íbúðinni. Ný vinna handan við hornið og ég býð spennt eftir að byrja í rútinu :)

Þessi uppskrift er auðveld að útbúa. Hún er líka fjlótleg sem skemmir ekki fyrir.

Vanillu rúlluterta

3 egg, aðskilja eggjahvítur og rauður

100g rjómaostur

2msk sýrður rjómi 36%

1tsk vínsteinslyftiduft eða venjulegt

1.5 vanillustöng

10 dropar vanillustevía

30g sukrin melis

Stífþeytið eggjahvítur með lyftiduftinu og setjið til hliðar.

Rjómaostur, eggjarauður, sýrður rjómi, sukrin melis, stevía og fræ úr vanillustöng þeytt vel saman.

Bætið eggjahvítum við með sleif og blandið vel en varlega.

Notið smjörpappír eða bökunarpappír sem búið er að smyrja með olíu (ég notaði avocado olíu) og fyllir heila ofnskúffu. Dreifið yfir pappírinn sukrin og setjið svo deigið.

Bakið á 175 gráður í ca 9-12 mínútur eða þar til gyllt.

Krem

50g rjómaostur

1 bolli frosin hindber

40g sukrin melis

10 dropar hindberja stevía (má sleppa)

150ml rjómi

Þeytið saman rjómaost, sukrin melis og stevíu.

Maukið berin þegar þau eru hálfþiðnuð eða alveg þiðin og sigtið fræin frá. Bætið við skálina og þeytið saman. Í lokin er rjóma bætt út í óþeyttum og þeytið þar til kremið verður stíft.

Dreifið kreminu á tertubotninn þegar hann er orðin kaldur og rúllið honum upp. Gott er að nota pappírinn til að hjálpa sér að rúlla upp.

Stráið yfir tertuna sukrin.

Súkkulaðiskyrmús með lime

Ég bjó til þennan eftirrétt í vikunni. Ætlaði að gefa mér svo tíma til að setja inn á bloggið áður en það kom helgi en tíminn einhvern veginn hvarf frá mér. Í gær var svo yndislegt veður og ég ákvað að reyna safna nokkrum freknum framan í hvíta andlitið mitt. Það virkaði ágætlega. 

Núna sit ég út á svölum og læt sólina skína á mig á meðan ég skrifa þetta. Klukkan rétt orðin 10 og það er vel heitt hérna hjá mér. 

Eiginmaðurinn skellti sér eina ferðina enn til Grænlands og ætlar hann að vinna þar allavega næstu sex mánuðina. Maður er orðin svo sjóaður að hafa hann þar en auðvitað myndi ég miklu frekar vilja hafa hann hjá okkur. En svona er þetta og við gerum bara eins gott úr þessu og hægt er :)

Ég fékk sendingu af súkkulaði sem er nýtt á markaðinum hér heima. Var mjög spennt þegar ég sá facebook síðuna þeirra. Fagna í hvert sinn sem nýjar vörur koma hingað til lands sem hægt er að nota.

Sykurlaust, organic, glútenfrítt og gott. Gerist ekki betra :)

Ef þú elskar dökkt súkkulaði, átti eftir að elska þetta.  Bragðtegundirnar eru þó nokkrar og mintu og berja bragðið er tilvalið núna fyrir sumarið.

Skyrmús fyrir 6-8

500ml skyr (óhrært eða vanillu skyr.is)

2 pakkar af IQ súkkulaði lime bragð

3 egg

100g Sukrin 

4msk ósykrað kakó

5 dropar súkkulaði stevía

3 matarlímsblöð

2msk lime safi

Börkur utan af einni lime

Aðskiljið eggjahvítur og rauður og stífþeytið hvíturnar og setjið svo til hliðar.

Þeytið rauðurnar með sukrin og bætið svo skyrinu, kakói og stevíu við. 

Leggið matarlímsblöð í bleyti í ca 5 mínútur og setjið svo í pott ásamt lime safanum og hitið varlega þar til uppleyst. Látið kólna og blandið svo við búðinginn.

Í lokin eru eggjahvíturnar bætt út í ásamt berkinum og blandað varlega saman. 

Setjið í litlar skálar eða eina stóra og geymið í kæli í ca klukkutíma.

Ég var með órhært skyr en þeir sem vilja mildari bragð geta notað vanillu skyr.is

Hnetusmjörsís

Síðustu sólahringa finnst mér eins og ég hafi losnað við mikla byrði af herðum mínum. Það var ótrúlega gott að skrifa og koma þessu niður á rafrænt blað. Ég er ótrúlega þakklát fyrir fallegar kveðjur sem ég hef fengi frá ykkur. Þær hafa hjálpað mikið.

 Ég hef verið með algjört verkstol þegar kom að blogginu. Ekki vantaði hugmyndirnar heldur bara að fá mig til að prufa mig áfra, mynda og skrifa. Ég fæ svona stundum en í morgun vaknaði ég og vildi ekkert annað en prófa mig áfram í eldhúsinu.

Hnetumjöl frá Funksjonell er nýtt á markaðinum hér á landi. Ég er búin að vera bíða spennt eftir að fá að prófa. Er búin að sjá svo margar uppskriftir á erlendum síðum með þessu snillar mjöli sem er að sjálfsögðu glútenlaust.

Eitt sem er frábært með þetta mjöl að það er mjög auðvelt að útbúa hnetusmjör úr því á núll einni.

Sykur, glútenlaust og próteinríkt hnetusmjör en 50% af mjölinu er prótein.

Hnetusmjör

20g af hnetumjöli frá Funksjonell

30-40ml af vatni (eftir hversu mjúkt þú vilt það)

salt klípa

2-3 tsk sukrin gold fyrir þá sem vilja

Setjið í skál og blandið vel saman.

Ég varð svo að prófa að útbúa hnetusmjörsís og guð hvað hann var góður! Hann var ekki lengi að hverfa ofan í magan á mér og syninum þegar hann kom heim úr skólanum. Vildi samt að ég hefði átt salthnetur til að saxa og setja í ísinn.

Hnetusmjörsís

1 egg

50g Sukrin:1 

70g hnetusmjör

380ml rjómi

5 dropar Caramel Toffee stevía

Þeytið saman eggi og sukrin:1. Bætið við hnetusmjöri og stevíu og í lokin óþeyttum rjóma. Þegar allt er vel blandað setjið þið í ísvél og farið eftir fyrirmælum á henni.

Ef þú átt ekki ísvél er hægt að þeyta rjóman og blanda svo öllu saman við og setja í box og í frystinn. Gott væri þá að hræra aðeins í ísnum á 30 mínútna fresti.

Panna cotta með bláberjasósu

Ég er mjög hrifin af panna cotta. Auðvelt að gera og hægt að útfæra á margan hátt.

Þessi uppskrift hentar vel um páskana :)

Panna cotta með bláberjasósu fyrir 4

 5 dl rjómi

50 g sukrin

1 stk vanillustöng

½ msk vanilla extract eða vanilludropar

3 matarlímsblöð

Setjið matarlím í skál með köldu vatni og látið liggja í lágmark 5 mínútur.

Takið vanillustöng, kljúfið og fræhreinsið. Setjið stöngina og fræin í pott ásamt rjóma og bíðið eftir að suða kemur upp. Þegar suðan kemur upp í pottinum, fjarlægið hann af hellunni og fjarlægið vanillustöng. Matarlím er kreyst til að ná afgangs vökva úr og því ásamt sukrin er sett í pottinn og hrært vel í þar til uppleyst.

Hellið í 4 skálar og kælið í u.þ.b. tvo tíma.

Bláberjasósa.

200 g bláber

1 msk vatn

4 tsk sukrin

Skolið bláberin og setjið í pott ásamt vatni og sukrin.

Hrærið vel í og látið berin mýkjast vel í pottinum. Setjið berin í háa dollu eða skál og notið töfrasprota til að mauka berin í sósu.

Látið kólna áður en sett yfir panna cotta. Skreytið jafnvel með heilum berjum.

Vöfflur

Í dag er alþjóðlegi vöfflur dagurinn.

Ég vissi ekki að hann væri til fyrr en í gær.

En maður verður jú að fagna og því ákvað ég að búa til vöfflu uppskrift í morgun.

Ég ákvað að útbúa karamellu vöfflur en það er hægt að hafa þær venjulegar líka ef maður vill.

Þær metta vel og eftir að hafa borðað eina er ég pakksödd.

Vöfflur um 6stk.

3 egg

120g rjómaostur

2msk Sukrin Gold

1tsk vínsteinslyftiduft

1msk rjómi

1tsk vanilludropar

4 dropar Toffee stevía (t.d frá NOW) 

1/4 tsk Xhantan gum

Setjið allt í blandara og blandið vel. Passið að setja ekki of mikið af xhantan gum því þá verður deigið of þykkt. Frekar minna en meira.

 Ef þið viljið ekki karamellu vöfflur, skiptið út toffee stevíu fyrir vanilllu stevíu eða bragðlausa.

Hitið járnið og bakið vöfflur!

Hnetusmjörsbombur

Stundum byrjar dagurinn vel, eins og með því að fara og kíkja á bretti með fullt fullt af bókum með mynd af mér á! Hverjum hefði svo sem dottið það í hug?

Vúhú! Dísa með fullt fullt af Dísubókum!

En svo átti dagurinn að fara í bakstur og rólegheit en endaði í stressi, pirringi og skemmdum bíl.

Já give a little, take a little.

Það þarf víst að vera eitthvað jing og yang í þessu lífi.

Ekki bara prumpandi blómum og svífandi á bleiku skýi hér takk fyrir.

Næsta fimmtudag er svo útgáfuhóf. Ég verð komin á bleikt ský aftur þá, þýðir ekkert annað.

Læt eiginmannin keyra bara þann dag svo ég klessi ekki bíl aftur.

Ætla líka að kaupa mér strætó kort sem fyrst.

Þú ætlar að mæta er það ekki? Ég verð með hvítt og annað að drekka og 

ætla að baka eitthvað gómsætt með henni Hrímu minni fyrir þig líka ;)

Svo já familían fílaði þessar kökur svo hér er uppskrift.

Hnetusmjörsbombur

220g hnetusmjör

100g Sukrin

10 dropar karamellu stevía

70g salt hnetur

1 stórt egg

1/2 tsk vínsteinslyftiduft

100g sykurlaust Valor súkkulaði eða annað sykurlaust súkkulaði

Setjið egg, hnetusmjör, sukrin, stevíu og vínsteinslyftiduft í skál og hnoðið vel saman í höndum.  Salthnetur og saxað súkkulaði bætt við og blandað vel við. Með blautar hendur, búið til litlar kúlur og setjið á smjörpappír eða silikonmottu og þrýstið örlítið á kökurnar. Bakið í miðjum ofni á 170 gráður í 8-12 mínútur eða þar til gylltar.

Súkkulaði klessur

Nóvember komin. 

Það er næstum orðið löglegt að hlusta á jólalög.

Ég bíð eftir að geta skreytt en það bíður þangað til 1.des í fyrsta sinn síðan ég byrjaði að búa.

Þetta verður erfið bið.

Í síðustu viku fékk ég eintak af bókinni minni senda til mín og omg hvað það var yndisleg tilfinning að halda á henni. Ég var búin að fá ógeð af uppskriftunum og útlitinu á henni eftir að hafa farið yfir bókaskjalið 101 á dag í mánuð til að finna hverja einustu villu og lagfæra.

Ég verð að játa, bókin er hrikalega falleg og vönduð. Hrós til hönnuðarins.

Prentunin heppnaðist líka einstaklega vel. Pappírinn þykkur og glansandi. Já ég lofa að þetta er bók til að næla sér í fyrir jólin.

Í dag urðu kaflaskipti í lífi mínu. Litli ryðgaði handþeytarinn minn sem ég keypti fyrir slikk fyrir 8 árum er komin ellillífeyri og hættur í vinnu hjá mér.

Afhverju?

Jú þetta er ástæðan. Í dag kom ég heim með þessa fallegu Hrímbláu Kitchenaid vél frá 

Einari Faresveit.

Já ótrúlega en satt þá bjó ég til bók með 100 uppskriftum auk þess að halda úti bloggi, 

svo ég baka ansi oft í viku með handþeytara. 

Ég í alvöru vissi ekki hvað ég var að fara á mis við fyrr en í dag.

Í stað þess að láta handþeytarann hrista bingóvöðvana þá sér þessi elska um að vinna fyrir mig á meðan ég geri annað.  Hvílíkt frelsi. Hvað þá þegar styttist í það að fara halda kynningar fyrir bókina og baka jólabaksturinn. Nú verður ekkert mál að margfalda uppskriftir.

Ég fór að sjálfsögðu beint í það að baka og já þetta er bara allt annað líf, yndislegt líf.

Kanilís og heitt kakó var útbúið fyrir MS nóvember bloggið ásamt piparkökum

En þessar súkkulaði klessur bjó ég til líka. 

Súkkulaði klessur 6stk

2 eggjahvítur

2msk sukrin

5tsk kókosmjöl

2-3 tsk ósykrað kakó

1 tsk vanillu extract

5 dropar Via-Health súkkulaði stevía

40g sykurlaust súkkulaði (ég var með sykurlaust mjólkursúkkulaði frá Valor)

Setjið allt nema súkkulaðið í skál og blandið vel saman. Saxið súkulaðið niður og bætið við deigið og blandið. Notið smjörpappír eða silikonmottu og setjið kökudeigið á með hjálp skeiðar. 

Deigið er mjög þunnt og notið því skeið til að smyrja út sex hringi.

Bakið á 150 gráðum í 12-15 mínútur.

Morgunkorn

Ég er morgunkorna einstaklingur en svo virðist sem flest morgunkorn eru stútfull af sykri.

Börnin mín eru líka morgunkorna einstaklingar. Ég reyni að kaupa það hollasta fyrir þau og er að reyna koma hafragrautnum inn hjá þeim oftar. (lesist, nenna að vakna fyrr og elda ofan í þau)

Kókopuffs er bara keypt á jólum og páskum og ég elska það að eins og síðustu páska var pakkinn til heillengi upp í skáp því þau voru bara ekkert að sækjast í hann. Verst var þó að ég kláraði hann þá bara. En ég elska gott morgunkorn með ískaldri mjólk, svo ég fór bara að sulla þessu saman og ómæ, jáhh þetta er gott! 

Ég var efins að leyfa börnunum að smakka, minna fyrir mig þið skiljið. Stelpunni fannst það vont, enda hnetur í því en miðjubarninu æj hann er alltaf að spyrja hvort hann megi ekki fá svona. Auðvitað er ég hrikalega glöð að honum finnist þetta gott en lítill hlutur af mér vill bara eiga þetta alein.

Morgunkorn

50g sukrin

20g heslihnetumjöl (muldi sjálf)

50g heslihnetur, gróf saxaðar

15g af Cookie and cream Nectar prótein

30g sykurlaust heslihnetu síróp eða smjör

2msk smjör

1msk ósykrað kakó

Setjið allt í skál og blandið vel saman. Getið notað annað bragð af próteini ef þið viljið. 

Ef þið eigið ekki heslihnetu síróp er hægt að skipta því út fyrir smjöri.

Setjið allt á bökunarpappír og dreifið úr. Bakið á 170 gráðum í ca 10 mínútur. Fylgist með svo ekki brenni. Takið plötuna út og hrærið í. Þegar kólnar harðnar morgunkornin og hægt að brjóta í þá stærð sem óskað er eftir. 

Frábært með skyri, ab mjólk, mjólk, möndlumjólk eða jógúrti.

Heslihnetu mousse

Í dag ætlaði ég að gera skotheldar heslihnetukökur. Þegar ég svo opnaði ofninn eftir nokkrar mínútur varð allt í reik, kökunar að mestu brunnar og orðin ein flöt klessa. Eins og það væri ekki nóg, þá fór Securitas reykskynjarinn í gang og jáhh bæði þjófavarnakerfið og extra háværi reykskynjarinn vældu. Ég var nálægt því að verða heyrnalaus. Ég byrjaði að skafa kökumylsnunar upp og troða upp í mig og bragðið var bara ekki sem verst, semsagt það sem var ekki brunarústir. Kona deyr ekki ráðalaus og ákvað því bara að útbúa heslihnetu mousse og jáhh, það heppnaðist ótrúlega vel :)

Nýjar fréttir eru annars þær að ég er nýjasti bloggari hjá MS-Gott í matinn og munu birtast LKL vænar uppskriftir mánaðarlega.

Einnig verður viðtal við mig í Fréttablaðinu á föstudaginn. 

Dóttir mín var svo ánægð þegar hún sá að ljósmyndarinn væri komin og hún heima. Var ekki lengi að henda á sig skykkju og kórónu og taka sér sæti við hlið mömmu sinnar.

Heslihnetu mousse fyrir 4

Heslihnetukurl

30g smjör, við stofuhita

100g heslihnetumjöl

3msk sukrin gold

Setjið heslihnetur í matvinnsluvél eða blandara og myljið niður í mjöl.

Setjið allt hráefnið í skál og blandið vel saman. 

Dreifið á bökunarpappír og setjið í ofn sem er 180 gráðu heitur og bakið í 5-7 mínútur eða þar til gyllt. Fylgist vel með svo ekki brenni.

Látið kólna og myljið niður og geymið í skál.

Mousse

50g sykurlaust súkkulaði hreint

50g sykurlaust súkkulaði með heslihnetum

(má líka vera 100g hreint súkkulaði)

1 eggjarauða

2msk sukrin plús

4 dropar Via-Health súkkulaði stevía (má sleppa)

200ml rjómi

2 matarlímsblöð

Setjið matarlímsblöðin í skál með vatni og látið liggja þar til orðið lint.

Setjið súkkulaðið og rjóma í pott og bræðið við vægan hita.

Bætið við stevíu, sukrin plús og eggjarauðu í pottinn og hrærið vel.

Takið matarlímin og kreystið afgangsvökva úr og setjið í pottinn. Hrærið þar alveg uppleyst.

Setjið heslihnetukurl í 4 desert skálar. Skiljið smá eftir fyrir skraut. Skiptið svo súkkulaði blöndunni á milli skálana og setjið í kæli ca klukkutíma. Þeytið rjóma og setjið smá rjóma yfir hvert glas ásamt hnetukurli.

Geymið í kæli.

Súkkulaði með heslihnetum

Oj. Eina sem ég get sagt um þetta veður er oj.

Nálgast hádegi og ég er enn í náttkjólnum og sloppnum og held bara að ég ætla ekki að fara úr því í dag. Dóttirin er líka í sínum náttkjól, en það er kannski því þetta er Frozen náttkjóll og er notaður 24/7. Ég ætla ekki að ljúga, ég vildi óska að jólatréð væri hér inni stofu með fallegu jólaljósunum sínum og ég að hlusta á Michael Buble.

En ég læt jólaljósin í glugganum nægja. Já ég er búin að kveikja á jólaseríu í stofuglugganum. Ég tek þau aldrei niður, er of löt til þess og leið og fer að dimma er kveikt á þeim til að fá fallega birtu á kvöldin.

En þar sem ég er ekki með jólatré og ætla ekki alveg að fara hlusta á jólalög ætla ég að kveikja á kertum, hlusta á góða tóna, lesa bók og narta í smá konfekt.

Þetta er yndislegt konfekt. Eins og vinkona mín sagði í gær, þetta smakkast eins og jól.

Það er mjög gott að eiga þessa í kælinum. Það þarf ekkert samviskubit þegar maður fær sér svona mola. Ekkert nema holl fita sem við þurfum öll á að halda.

Þetta er líka fljótlega útbúið. Ég útbjó þetta með syni mínum, hann hjálpaði mér að búa til uppskriftina og sá svo um að sulla þessu öllu saman :)

Eigum við eitthvað að ræða þetta fallega krullaða rauða hár!!??

Súkkulaði með heslihnetum

100ml kókosolía brædd 

40g sukrin melis 

30g ósykrað kakó

6 dropar via-health súkkulaði stevía

50g heslihnetur

Heslihnetur settar á bökunarpappír og inn í 175 gráða heitan ofn í 5-7 mínútur. Passa að þær brenni ekki. Látið kólna og setjið í viskustykki og nuddið þær á milli viskustykkisins svo hýðið detti af. Saxið hneturnar.

Setjið kókosolíu í pott (getið verið með bragðlausa kókosolíu eða venjulega) og hitið varlega.

Sigtið sukrin melis og kakó út í kókosolíuna og blandið vel saman. Bætið við stevíu og heslihnetum.

Setjið í konfektform eða lítil muffinsform og inn í kæli. Geymið í kæli þar sem kókosolían bráðnar við stofuhita.

Lakkrís frappuccino

Ég þarf stundum að leggja mig á daginn þegar ég fæ slæmt gigtarkast. Leggst undir sæng og reyni að slaka á líkamanum eins og ég get og finna verkina fjara út. Þegar ég vakna fæ ég yfirleitt svakalega þörf fyrir sykur, helst súkkulaði. Líkaminn kallar á súkkulaði eftir kastið og ég oft hleyp um eins og bjrálæðingur að róta í öllum eldhússkápum í von um að finna sykur þó svo að ég viti vel að hann er ekki að finna hér. Ég læt mig þá bara vona að ég eigi eitthvað sem ég hef gleymt að henda út.

En, ég er búin að finna eitt sem hjálpar til að slökkva þessa tilfinningu.

Ískaldur Lakkrís Frappuccino. Ó hve ljúft er að fá svona svalandi drykk sem mettar mig, er sykurlaus og kæfir sykur þörfina. Stundum á ég samt sykurlaust súkkulaði í ísskápnum sem ég þá fæ mér en það er gott að eiga eitthvað fleira sem hjálpar til.

Ég prófaði að kaupa Raw lakkrísrótarduft í staðin fyrir þetta fína sem ég hef verið að nota og það er ekkert síðra. Ég get borðað það beint upp úr dollunni ef þannig liggur á mér. Hægt að sjá hvernig það lítur út HÉR

Lakkrís frappuccino

1dl vatn

1 bolli klakar

3msk rjómi

1/4tsk vanillu extract eða dropar

2-3tsk sukrin

1/2-1tsk Lakkrísrótarduft (Raw frá Johan Bulow)

1-2tsk Instant kaffiduft (má sleppa)

Setjið klaka í blandara og malið þá.

Bætið við vatni, rjóma og vanillu.

Bætið við þurrefnunum og blandið við.

Ef þið viljið mjólkurlausa útgáfu er hægt að nota möndlumjólk í stað rjóma.

Ef þið eruð ekki mikið fyrir kaffi er hægt að sleppa kaffinu. Hef gert bæði og jafn gott.

Sítrónu og bláberjakaka

Þessi uppskrift birtist í Fréttatímanum í dag en hún verður að sjálfsögðu að koma á bloggið líka, fyrir ykkur sem ekki fáið blaðið inn um lúguna :)

Auðveld og fljótlega að útbúa og gefur keim af góðum sumar minningum þegar haustið er að skella á.

Sítrónu og bláberjakaka

1 pakki kökumix frá Funksjonell

1dl brætt smjör 

4 egg

2dl jógúrt 

1 msk vanillu extract

Safi og börkur úr einni sítrónu

200g bláber

Setjið kökumix, egg, smjör, vanillu extract og jógúrt í skál og hrærið vel saman. 

Notið rifjárn til að rífa börkin af sítrónunni og passið að fara ekki í hvíta hlutann því hann er rammur. Skerið sítrónuna í tvennt og kreistið safanum í deigið. Bætið við bláberjum og hrærið vel í. Smyrjið springform með bræddu smjöri eða olíu og setjið deigið í. Bakið á 175 gráðum í 30 mínútum.

Ef þið viljið mjólkurlausa útgáfu, skiptið út smjöri fyrir olíu og jógúrti fyrir vatn.

Pizzusnúðar

Maður er stundum svo hrikalega heftur þegar kemur að því að nota tilbúnar vörur öðruvísi en stendur á pakkanum. Brauðmix eru bara brauðmix og kökumix, kökumix. En ég fór að hugsa um helgina hvað ég gæti gert öðruvísi. Hlýtur að vera hægt að bæta einhverju við eða gera annað en brauð eða köku. Og hugmyndirnar létu ekki á sér standa. Yfir 20 nýjar hugmyndir komu niður á blað og bíða eftir að vera prófaðar. Það fyrsta sem ég prófaði var að gera pizzusnúða og skinkuhorn úr brauðmixinu og heppnaðist það vel að börnin laumuðust í þetta þar til ekkert var eftir nema mylsnur.

Brauðmixið sem ég notaði er frá Funkjonellmat, sama fyrirtæki og býr til sukrin vörurnar.

Brauðmixið er sykur, hveitis og glútenlaust. Ef þið eruð að fylgja LKL þá er eitthvað af höfrum í mixinu en ekki mikið. Hafrar eru í raun há í kolvetnum en í 100g af þessu brauðmixi eru 3.9g af virkum kolvetnum. Ég læt þetta alveg eftir mér en aðallega er þetta búið til fyrir börnin.
Ég notaði ekki leiðbeiningarnar utan á pakkanum til að búa til pizzasnúðana.

Pizzusnúðar

18-20 stk.

1 pakki fínt brauðmix frá Funksjonell Mat

2dl hreint jógúrt

1msk hvítlaukssalt

sykurlaus pizzasósa (ég nota frá Hunt's)

pepperoni

skinka

rifin ostur

Setjið brauðmixið ásamt hreinu jógúrti og hvítlaukssalti í skál og blandið vel saman.

 Látið standa í 5 mínútur. 

Setjið deigið á smjörpappír og svo annan smjörpappír yfir og rúllið út í ferhyrning. (ef deigið er of blautt er gott að strá smá kókoshveiti eða sesammjöl á smjörpappírinn fyrst). Takið efri pappírinn af.

Setjið pizzasósu, skinkubita og rifin ost á deigið og dreifið vel út. 

Rúllið deiginu upp og notið pappírinn til að hjálpa ykkur. Skerið lengjuna í ca 1 cm rúllu og setjið í muffinsform eða beint á bökunarpappír.

Bakið á 175 gráður í ca 12-15 mínútur.

Prófið ykkur áfram með innihaldi. Smurostar, piparostur, sveppir eða eitthvað annað :)

Sítrónukaka

Namm!

Ég hef ekki annað orð yfir þessa köku nema namm!

Í vor prófaði ég í fyrsta sinn að nota baunir í bakstur. Þeir sem þekkja mig vita að ég er ekki baunakona, borða ekki baunir og hvað þá að baka með þeim, neibb það er ekki ég. En ég ákvað að prófa þegar ég var að búa til uppskriftir fyrir bókina mína og það heppnaðist undantekningalaust vel að nota baunir. Ég veit að þetta hljómar ekki vel en trúið mér, baksturinn verður margfalt betri. Það gæti leynst örlítið baunabragð strax eftir bakstur (finn það ekki sjálf né aðrir á heimilinu) en það hverfur þá eftir nokkra klt.

Ég hef lært að segja ekki börnum mínum hvað baksturinn eða maturinn inniheldur fyrr en þau eru búin að smakka því oft er sagt ojj og smakkið þá út frá því. Þegar þau smökkuðu fyrstu baunakökuna mína var hún kláruð á 30 mínútum og þau átu á sig gat. Þið hefðuð átt að sjá svipinn á þeim þegar mamman sýndi þeim að hún notaði baunir í baksturinn. Í dag eru þau spennt þegar þau sjá mig taka fram baunakrukkuna því það þýðir að mamma ætlar að baka eitthvað hrikalega gott.

Þar sem ég átti sítrónu langaði mig ógurlega mikið í sítrónuköku.

Sítrónukaka

240g (ein krukka) hvítar baunir frá Himnesk Hollusta

100g mjúkt smjör

100g sukrin

4msk kókoshveiti

2msk möndlumjöl

50g hreint jógúrt

80ml sítrónusafi

börkur utan af einni sítrónu

1 tsk vínsteinslyftiduft eða venjulegt lyftiduft ef þolir glúten

4 egg

1msk vanillu extract eða vanilludropar

6 dropar Via-health sítrónudropar

Skolið baunirnar og setjið í blandara eða matvinnsluvél ásamt öllu hráefni og blandið þar til deigið er án kekkja. Setjið í silikon brauðform og bakið á 170 gráður í 45-50 mínútur eða þegar tannstöngull kemur hreinn upp úr miðju.

Súkkulaði mjólk

Ég er mjólkurfíkill. Ætli mjólkurfíkninn hafi ekki komið þegar ég var þunguð af elsta barninu. Ég vaknaði um miðjar nætur og þambaði mjólk beint úr fernunni. Það var ekki ein ferna eða tvær heldur nokkrar. Og þegar barnsfaðir minn vaknaði um morguninn þá var búið að raða fallega tómum mjólkurfernum á eldhúsborðið. Mjólkur löngunin var ekki bara á næturnar. Í skólanum átti ég það til að hlaupa eins og vindurinn í sjoppuna og kaupa mér litla mjólkurfernu og stúta henni á núll einni. Eða svo segja vinkonur mínar.

Ekki má gleyma piparkökur og íssköld mjólk eða bara köld mjólk með hvaða smákökum sem er! 

Ohhh það er himnaríki sú samsetning. En ég hef verið dugleg að láta mjólkina vera og hún er meira svona spari spari. En svo gerist stundum að maður sullar hinu og þessu saman í eldhúsinu að búa eitthvað til og í dag varð það mjólk og svo var sullað meira og súkkulaðimjólk varð til.

Súkkulaði mjólk

450ml möndlumjólk

80ml rjómi

1msk ósykrað kakó

10-15g sukrin (smakkið til)

2-3 dropar af Via-Health súkkulaði stevíu

Setjið í hristara og setjið lokið á. Hristið vel þar til blandað og smakkið. Setjið frekar minna af sætu en meira til að byrja með og smakkið til. Hellið í tvö glös eða bara eitt stórt glas.

Pistasíu fudge

Vá hvað tíminn bara flýgur áfram. Reyndar endurtek ég þetta á þessum tíma á hverju ári. Finnst alltaf vera alveg að koma jól. Nú er smátt og smátt að gerast jólalegra hér í koti. Börnin búin að fá seríurnar sínar upp í glugga sína en það kostaði sitt. Lofaði í gærkvöldi að setja upp seríur, hoppaði niður í geymslu en.....engar seríur! Hvaða rugl er það! Leitaði og leitaði, kom upp og leitaði í öllum skápum og nei, engar seríur. Hringdi til Grænlands til að ath hvort grænlendingurinn minn vissi eitthvað af þessu.

En þessu var bara reddað með ferð í Rúmfatalagerinn og seríur komnar upp og ég neyddist til að kaupa meira jóladót í leiðinni því ég komst að því að ég á bara einn kassa af jóladóti. Það er engan vegin að virka.

Nauðsynlegt að eiga nóg af kertum og kertastjökum. Varð of skotin í hreindýra stakanum!

Pistasíu fudge

90 g smjör

5 msk sukrin gold

5 dl rjómi

6-8 dropar af vanillu eða karamellu Via-Healt stevíu

2 dl pistasíur

Allt nema hnetur sett í pott og látið malla á lægsta hita í ca 30 mín. Passa að hræra ekki of mikið. Rétt að hræra á tíu mínútna fresti. Saxa niður hnetur og setja í blönduna þegar hún er orðin þykk. Hrært saman og sett í form og í frysti í nokkra klukkutíma. Skorið í bita og geymt í ísskáp.

Súkkulaði og kókosmús

Af því það er komin helgi og margir sem vilja gæða sér á góðum eftirrétt, þá ákvað ég að henda þessari inn fyrir ykkur :)

Súkkulaðimús

25 g sukrin

3 eggja rauður

100 g 70% súkkulaði

200 ml rjómi

6-8 dropar Via-Health stevía original

Sykur og egg þeytt vel saman. Yfir heitu vatnsbaði er blandan hituð aðeins þar til hún fer að þykkjast.

Súkkulaði brætt yfir heitu vatnsbaði.

Rjómi þeyttur og eggjarauður og stevía blandað varlega við. Í lokin er brætt súkkulaði sett út í rjóman og blandað vel saman. Sett í form og inn í ísskáp eða frysti.

Kókosmús

80 ml rjómi

20 g sukrin

15 ml  rjómi(fyrir gelatín)

1/2 gelatín blað

8 dropar Via-Health stevía kókosbragð

50 g hreint jógúrt

Gelatín sett í vatnsbað og geymt í 5-10 mín.

Þeyta rjóma, stevíu og sukrin saman.

Gelatín er tekið úr vatni og kreist allan vökva úr og sett í pott ásamt 15 ml af rjóma. Hræra þar til uppleyst í rjómanum. Blanda við músina og í lokin er jógúrt bætt við.

Hægt að setja ofan á súkkulaðimúsina eða í sérskál og inn í frysti eða kæli.

Cake pops

Þið eruð nú meiri krúttbomburnar :-) Takk fyrir hjálpina í dag með að koma síðunni á framfæri og eignast fleiri læk. Já ég verð alveg rosalega gráðug á like fyrir facebook síðuna mína.

En ég lofaði cake pops og ég stend við mín loforð.

Cake pops

2 eggja rauður (má líka vera heil egg)

100 g smjör

80 g súkkulaði 70% eða hærra

1 dl rjómi

4 msk sukrin

6-8 dropar Via-Health stevía súkkulaði

6-8 dropar Via-Health stevía vanillu

Eggja rauður, stevía og sukrin þeytt saman.

Smjör og súkkulaði brætt í potti og blandað vel saman. Bæta rjómann út í og hræra saman við. Eggjarauður bætt varlega út í.

Sett í ofn sem er 180 g heitur í ca 15-20 mín.  Leyfa kökunni að kólna og nota svo gaffall til að rífa hana í sundur og setja í skál.

Smjörkrem

1 dl sukrin melis

2 eggjarauður

80 g mjúkt smjör

6-8 dropar Via-Healt stevía original

2-4 tsk kakóduft (eftir hversu mikið kakóbragð er óskað eftir)

Smjör, sukrin melis og rauðum þeytt vel saman og svo er stevíu dropum og kakódufti bætt við.

Blanda kreminu vel við kökuna og kæla í klt.

Búa til litlar kúlur og setja í frysti í ca 10-15 mínútur.

Bræða súkkulaði í vatnsbaði og dýfa kökukúlunum í súkkulaðið til að húða það. Hægt er að setja kúlurnar á nammi pinna sem fæst meðal annars í allt í köku eða setja þær í lítil muffinsform eins og ég gerði.

Skreyta kökurnar með salti, hnetum, smá chili, sukrin sem búið er að lita með smá matarlit, endalausir möguleikar :-)