Jólauppskriftir.

Ætla að setja í eina færslu þær uppskriftir sem mér finnst frábærar núna í desember :)

Ýtið bara á nafnið á smákökunum eða réttunum og þú færð uppskriftina.

Fleiri uppskriftir er svo hægt að finna í bókinni minni Dísukökur og rafræna jólauppskriftaheftinu mínu, sykurlaus jól :)

Kanil ís, heitt kakó og piparkökur

Sítrónufrómas

Jarðarberja chia ís

Súkkulaði trufflur

Sörur

Blómkáls brauðstangir

Þegar allir eru að missa sig í smákökubakstri er ég að missa mig í brauðstangabakstri.

Já ég hef aldrei verið þekkt fyrir það að fylgja flæðinu. 

Þegar maður hefur það fyrir áhugamál að búa til uppskriftir og byrjar að undirbúa desemberbaksturinn í október þá er maður komin með nóg á aðventunni.

Það kvartar samt engin hér heima. Fjölskyldan er lítið fyrir kökur og sætindi og kjósa frekar snakk.

En ég er búin að vera reyna finna leið til að vera dugleg að borða grænmetið mitt. Já ég er ekki heldur þekkt fyrir að vera dugleg í grænmetinu. En eins og með mörg börn eins og mín sem dæmi þá virkar að fela grænmetið í matnum mínum og ég get borðað það ;)

Blómkáls brauðstangir

ca 250g blómkál

1 egg

50g rifin ostur

3 hvítlauksgeirar

smjör til að steikja

salt og krydd eftir smekk

Rífið blómkálið niður í grjón og setjið í örbylgju í ca 8 mínútur.

Saxið hvítlauk smátt og steikið á pönnu með smjöri þar til gyllt. Geymið.

Þegar blómkálsgrjónin eru búin að kólna eru þau sett í hreint viskustykki og vindið upp á það til að ná öllum vökva úr blómkálinu. Setjið öll hráefnin í skál og blandið vel saman.

Kryddið eftir smekk og smakkið til.

Setjið deigið í silikon brauðform eða brauðform sem búið er að smyrja með smjöri eða olíu og bakið á 175 gráður í ca 20-25 mínútur.

Takið út brauðformið og hvolfið úr því á bökunarpappír og bakið áfram í 10 mínútur.

Takið stangirnar út og dreifið smá rifnum osti og parmesan osti yfir og bakið þar til ostur er gylltur.

Skerið í stangir og berið fram með sykurlausri pizzusósu.

Piparmyntu nammi

Þetta nammi virðist vera vinsælt í Ameríkunni á jólunum.

Auðvitað varð ég að prófa og þá að sjálfsögðu sykurlaust.

Þetta er mjög auðvelt að útbúa og skemmtilegt fyrir krakkana að föndra með og útbúa.

Það er svo hægt að búa til þetta nammi í öðrum lit og bragði með að nota t.d. bragðdropa sem fást í Allt í köku. Ef þið kaupið bragðdropa frá þeim þá þurfi þið bara nokkra dropa þar sem þetta er svo bragðsterkt annars ef venjulegu dropa úr búðinni þá eins og segir í uppskriftinni.

Þetta er mjög stór uppskrift og í fínu lagi að minnka hana um helming eða skipta henni niður og vera með mismunandi bragðtegundir.

110g rjómaostur, stofuhita

450g sukrin melis

1tsk piparmyntu dropar

20 dropar piparmyntu stevía

matarlitur ef þess er óskað

Setjið rjómaostinn í hrærivél helst en hægt að gera þetta í höndum og þeytið vel í smástund.

Bætið við piparmyntu dropum og stevíu og blandið vel.

Því næst fer matarlitur og svo er sukrin melis rólega bætt við.

Gott er að hnoða aðeins í höndunum í lokin.

Búið til litlar kúlur og setjið á bökunarplötu með bökunarpappír á.

Notið svo gaffall til að þrýsta örlítið á kúlurnar.

Látið þorna á eldhúsborðinu í 2-3 klukkutíma. Ekki setja neitt yfir nammið á meðan.

Geymið svo í ísskáp í lokuðu íláti. Geymist í mánuð eða lengur.

Súkkulaði grísirnir geta brætt sykurlaust súkkulaði og dýft namminu í.

Nammið verður hart að utan en mjúkt inn í þegar bitið er í.

Hnetusmjörsbombur

Stundum byrjar dagurinn vel, eins og með því að fara og kíkja á bretti með fullt fullt af bókum með mynd af mér á! Hverjum hefði svo sem dottið það í hug?

Vúhú! Dísa með fullt fullt af Dísubókum!

En svo átti dagurinn að fara í bakstur og rólegheit en endaði í stressi, pirringi og skemmdum bíl.

Já give a little, take a little.

Það þarf víst að vera eitthvað jing og yang í þessu lífi.

Ekki bara prumpandi blómum og svífandi á bleiku skýi hér takk fyrir.

Næsta fimmtudag er svo útgáfuhóf. Ég verð komin á bleikt ský aftur þá, þýðir ekkert annað.

Læt eiginmannin keyra bara þann dag svo ég klessi ekki bíl aftur.

Ætla líka að kaupa mér strætó kort sem fyrst.

Þú ætlar að mæta er það ekki? Ég verð með hvítt og annað að drekka og 

ætla að baka eitthvað gómsætt með henni Hrímu minni fyrir þig líka ;)

Svo já familían fílaði þessar kökur svo hér er uppskrift.

Hnetusmjörsbombur

220g hnetusmjör

100g Sukrin

10 dropar karamellu stevía

70g salt hnetur

1 stórt egg

1/2 tsk vínsteinslyftiduft

100g sykurlaust Valor súkkulaði eða annað sykurlaust súkkulaði

Setjið egg, hnetusmjör, sukrin, stevíu og vínsteinslyftiduft í skál og hnoðið vel saman í höndum.  Salthnetur og saxað súkkulaði bætt við og blandað vel við. Með blautar hendur, búið til litlar kúlur og setjið á smjörpappír eða silikonmottu og þrýstið örlítið á kökurnar. Bakið í miðjum ofni á 170 gráður í 8-12 mínútur eða þar til gylltar.

Sigrúnar terta

Ég hef ekki bakað mikið af tertum síðan ég fór á sykur og hveitislaust mataræði.

Flest allur bakstur einkennist hjá mér á það að hafa sem auðveldast og að ég þarf ekki margar skálar til að skíta út.

Ég hef bara ekki haft nennu að búa til botna og verandi með handþeytarann á fullu.

En svo kom Hríma mín inn í líf mitt. (þetta er farið að vera eintóm Kitchenaid lofsöngur þetta blogg).

Ég var ekkert neitt viss um að mikið myndi breytast í bakstri við að fá sér eina hrærivél en vá hvað mér skjáltaðist! Ég er svo miklu fljótari að skella í bakstur, ég er ekki bundin við það að standa kjurr  við skálina á meðan hrært er. Allt annað líf.

Ég er líka búin að kynnast því hvað það er yndislegt og þægilegt að baka upp úr sinni eigin bók. Ég er miklu fljótari að flétta uppskriftum upp í bókinni en að nota tölvuna eins og ég hef gert síðustu 18 mánuði. Í gær ákvað ég að skella í svamptertubotninn sem er í Dísuköku bókinni. Gerði tvöfalda uppskrift og setti svo súkkulaði ganache og rjóma á. Kom svona vel út. Þessi fékk nafnið Björg.

Í dag gerði ég svo köku fyrir mömmu mína sem hún bauð vinnufélögum upp á í dag. Að sjálfsögðu fær sú kaka nafnið Sigrún. Uppskriftina fann ég á veraldavefnum á spjalli fyrir sykurlaust mataræði. Ég breytti aðeins kökunni en ég hafði ekki nennu að breyta úr bollamáli yfir í grömm.

Sigrúnar terta

115g smjör við stofuhita

1/2 bolli hreint jógúrt

9 stór egg, stofuhita

1 bolli Erýtiól strásæta með stevíu frá Via-health

1tsk vanillu extract eða vanilludropar

3/4 bolli kókoshveiti

3msk ósykrað kakó

1tsk vínsteinslyftiduft

Sigtið kakó og kókoshveiti og geymið til hliðar. Þeytið egg ásamt vanillu extract/dropum í nokkrar mínútur og setjið til hliðar. Smjör þeytt vel þar til flöffí og sætan bætt smá saman við.

Egg eru varlega bætt við smjör og sætu blönduna. Næst er jógúrti bætt við og svo kókoshveiti og kakó bætt út í smá í einu. Þegar allt er vel blandað er í lokin sett vínsteinslyftiduft.

Setjið í 22cm silikonform eða springform (þarf að smyrja springformið).

Ég sjálf var með 20cm silikonform og fékk því út eina háa köku sem ég skar í tvennt og því komið eins og tveir botnar.

Ef þið eruð með 22cm form bakið á 170 gráðum í 40-45 mínútum.

20cm form bakið á 160 gráðum í 40-45 mínútur og slökkvið svo á ofninum og leyfið kökunni að vera inni í 10-15 mínútur í viðbót.

Þegar kakan er orðin köld skerið hana í tvennt. Minn botn heppnaðist mjög vel.

Ég stakk svo þykkum grillpinna í kökuna á nokkrum stöðum og hellti um 2-3 msk af French vanilla sykurlausu sírópí yfir kökuna.

Súkkulaði Ganache

50ml rjómi

100g sykurlaust Valor súkkulaði

Hitið rjómann að suðu og setjið svo í skál ásamt súkkulaðinu sem búið er að brytja niður í litla bita.

Hrærið í með skeið þar til vel blandað.

Hellið helmingi af súkkulaðinu yfir fyrri botninn og dreifið vel úr.

Klippið sogrör í 4 hluta og setjið miðsvæðis á kökunni til að draga úr þunga efri botnsins.

P.S. ekki klikka á að láta vita af rörunum eins og ég gerði ;)

Setjið rjóma slettu yfir neðri botninn í svipaðri hæð og rörin og setjið svo efri botninn ofan á.

Endurtakið með súkkulaðið og skreytið svo með rjóma eins og þið viljið.

Kotasælu tortillur

Þegar það eru tortillur í matinn hjá okkur eða píta þá fær mamman sér yfirleitt matinn án brauðs, sem er leiðinlegt því það sem heldur þessu öllu saman er brauðið.

Hér er uppskrift sem ég nota sem tortillur, pítubrauð eða bara smyr með góðum rjómaosti og set spínat á og jafnvel parmaskinku. Mmm fullkomið á þynnku dögum.
Já í gær var veisla. Móðir mín átti afmæli og því ber að fagna þegar maður er á svona fallegum aldri eins og hún. Þrjár kynslóðir saman komnar ásamt mökum. Ömmur, afar, frænkur, frændur, systkini og allt þar á milli. Fullt hús af skemmtilegheit. Ég fæ mér mjög sjaldan í tánna, mjög sjaldan. Þetta var í fyrsta sinn á þessu ári. Gerðist síðast í 30 ára afmælinu mínu í fyrra. Ég fór heim snemma í gærkvöldi. Lét eiginmanninn sækja mig þegar hann var alveg að vera komin heim og í dag, já í dag er ég búin að liggja upp í sófa með sæng. Kveikti á kertum og fór að lesa og fékk að vera lasin í friði.
Það má einu sinni á ári. Og þegar það gerist þá er gott að fá sér svona djúsi mat.

Það er ekki sama áferð eða bragð og á venjulegum tortillum enda þessar búnar til úr eggi og kotasælu. 

En þær smakkast vel.

Tortillur 4 stk

250g kotasæla

2 egg

2tsk fiberhusk

krydd eftir smekk

Setjið í skál og maukið með töfrasprota.

Notið skeið til að útbúa tortillur á stærð við hendi á bökunarpappír. 

Smekksatriði hversu þykkar/þunnar fólk vill hafa.

Bakið á 180 gráðum þar til gylltar.

Snickerskökur.

Þessi uppskrift er ég búin að eiga lengi en breytti henni aðeins í vikunni.

Ég og Hríma (það er Kitchenaid vélin mín) erum búnar að eiga gæðastundir saman í eldhúsinu að baka allskyns gotterí.

Maðurinn minn er ekki mikið fyrir sætt. Hann er meira snakk maður en loksins já loksins kom eitthvað úr eldhúsinu sem honum líkaði og ekki ein tegund, heldur tvær.

Ég held að það sé vegna samvinnu okkar Hrímu.

Honum leist svo vel á kökurnar að hann fór með fullan poka af þeim í vinnuna í gær og bauð vinnufélögunum með sér í kaffinu.

Þó svo að hann sé lítið fyrir sætt hefur hann fulla trú á mér og bókinni og fór sem dæmi með kynningareintakið mitt með sér í vinnuna til að reyna selja nokkur eintök í forsölu. Hann var víst búin að ná að selja nokkrum en vildi endilega fá að sýna bókina og fá fleiri pantanir.

Ég sé alveg fyrir mér kaffitímann í dag. Húsasmiðir koma þreyttir inn úr kuldanum í kaffi og fara að skoða litríku og dúllulegu bókina mína meðan þeir sötra kaffi og japla á smákökum.

Snickerskökur

1 egg

50g mjúkt smjör

40g sukrin gold

50g saxað sykurlaust dökkt súkkulaði (ég var með Valor)

45g saxaðar salt hnetur

15g kókoshveiti

30g möndlumjöl

10 dropar english toffee stevía frá Now eða önnur karamellu stevía

Saxið súkkulaði og hnetur og setjið í skál.

Setjið allt hráefnið í skál og hnoðið vel saman í höndum.

Setjið í kæli í 10-15 mínútur og takið svo út og rúllið upp.

Skerið í sneiðar. Þykkt og stærð fer eftir því hversu stórar kökur þú vilt hafa.

Setjið á bökunarpappír og bakið á 175 gráðum í 6-10 mínútur eða þar til gylltar.

Hrikalega góðar með ískaldri mjólk eða möndlumjólk.

Langar að benda ykkur á nýjasta bloggið mitt á MS-Gott í matinn en þar er ég með kanilís, piparkökur og heitt kakó. Einnig hugmyndir að fjölskyldu dagatali fyrir desember og hvað hægt er að nota hvíta sykurinn sem leynist upp í skáp í fallega og ilmandi gjöf. 

Súkkulaði klessur

Nóvember komin. 

Það er næstum orðið löglegt að hlusta á jólalög.

Ég bíð eftir að geta skreytt en það bíður þangað til 1.des í fyrsta sinn síðan ég byrjaði að búa.

Þetta verður erfið bið.

Í síðustu viku fékk ég eintak af bókinni minni senda til mín og omg hvað það var yndisleg tilfinning að halda á henni. Ég var búin að fá ógeð af uppskriftunum og útlitinu á henni eftir að hafa farið yfir bókaskjalið 101 á dag í mánuð til að finna hverja einustu villu og lagfæra.

Ég verð að játa, bókin er hrikalega falleg og vönduð. Hrós til hönnuðarins.

Prentunin heppnaðist líka einstaklega vel. Pappírinn þykkur og glansandi. Já ég lofa að þetta er bók til að næla sér í fyrir jólin.

Í dag urðu kaflaskipti í lífi mínu. Litli ryðgaði handþeytarinn minn sem ég keypti fyrir slikk fyrir 8 árum er komin ellillífeyri og hættur í vinnu hjá mér.

Afhverju?

Jú þetta er ástæðan. Í dag kom ég heim með þessa fallegu Hrímbláu Kitchenaid vél frá 

Einari Faresveit.

Já ótrúlega en satt þá bjó ég til bók með 100 uppskriftum auk þess að halda úti bloggi, 

svo ég baka ansi oft í viku með handþeytara. 

Ég í alvöru vissi ekki hvað ég var að fara á mis við fyrr en í dag.

Í stað þess að láta handþeytarann hrista bingóvöðvana þá sér þessi elska um að vinna fyrir mig á meðan ég geri annað.  Hvílíkt frelsi. Hvað þá þegar styttist í það að fara halda kynningar fyrir bókina og baka jólabaksturinn. Nú verður ekkert mál að margfalda uppskriftir.

Ég fór að sjálfsögðu beint í það að baka og já þetta er bara allt annað líf, yndislegt líf.

Kanilís og heitt kakó var útbúið fyrir MS nóvember bloggið ásamt piparkökum

En þessar súkkulaði klessur bjó ég til líka. 

Súkkulaði klessur 6stk

2 eggjahvítur

2msk sukrin

5tsk kókosmjöl

2-3 tsk ósykrað kakó

1 tsk vanillu extract

5 dropar Via-Health súkkulaði stevía

40g sykurlaust súkkulaði (ég var með sykurlaust mjólkursúkkulaði frá Valor)

Setjið allt nema súkkulaðið í skál og blandið vel saman. Saxið súkulaðið niður og bætið við deigið og blandið. Notið smjörpappír eða silikonmottu og setjið kökudeigið á með hjálp skeiðar. 

Deigið er mjög þunnt og notið því skeið til að smyrja út sex hringi.

Bakið á 150 gráðum í 12-15 mínútur.

Sítrónu toppar

Fyrir nokkrum dögum fékk ég þá hugdettu að setja jólauppskriftir sem ég hef búið til og sankað að mér síðasta árið í rafræna jólabók. Það er einhvern vegin miklu þægilegra að mér finnst að hafa allar jólauppskriftirnar á einum stað. Með því að hafa eina rafræna bók er hægt að flétta þessu upp í tölvunni, ipadinum, símanum eða prenta hana út.

Ég verð að játa að ég bjóst ekki við miklum áhuga og var búin að slaufa þessari hugmynd en ákvað að athuga áhugann. Vá! Ég er búin að vera orðlaus yfir áhuganum og skilaboðunum sem ég hef fengið. Þið hafið gefið mér ástæðu til að gefa þetta út :)

Hér er ein uppskrift sem verður í bókinni, auk þess að hún mun birtast í Vikunni í næstu viku.

Sítrónu toppar

120g kókosmjöl

2 egg

60g sukrin melis

1tsk vanilludropar eða vanillu extract

rifin börkur utan af 1 sítrónu

25g brætt smjör eða brædd kókosolía

25g sykurlaust Valor súkkulaði

1msk pistasíur, smátt saxaðar

Þeytið vel saman egg, sukrin melis, vanilludropa og sítrónubörk.

 Bætið við bræddu smjöri og kókosmjöl og blandið vel saman og látið standa í 10-15 mínútur.

 Formið 20 litlar keilur og setjið á bökunarpappír. Bakið á 175 gráður í 8-10 mínútur eða þar til gyllt. Látir kökurnar kólna


Bræðið súkkulaðið og dýfið botninum á kökunum í súkkulaðið og stráið pistasíum yfir.

Morgunkorn

Ég er morgunkorna einstaklingur en svo virðist sem flest morgunkorn eru stútfull af sykri.

Börnin mín eru líka morgunkorna einstaklingar. Ég reyni að kaupa það hollasta fyrir þau og er að reyna koma hafragrautnum inn hjá þeim oftar. (lesist, nenna að vakna fyrr og elda ofan í þau)

Kókopuffs er bara keypt á jólum og páskum og ég elska það að eins og síðustu páska var pakkinn til heillengi upp í skáp því þau voru bara ekkert að sækjast í hann. Verst var þó að ég kláraði hann þá bara. En ég elska gott morgunkorn með ískaldri mjólk, svo ég fór bara að sulla þessu saman og ómæ, jáhh þetta er gott! 

Ég var efins að leyfa börnunum að smakka, minna fyrir mig þið skiljið. Stelpunni fannst það vont, enda hnetur í því en miðjubarninu æj hann er alltaf að spyrja hvort hann megi ekki fá svona. Auðvitað er ég hrikalega glöð að honum finnist þetta gott en lítill hlutur af mér vill bara eiga þetta alein.

Morgunkorn

50g sukrin

20g heslihnetumjöl (muldi sjálf)

50g heslihnetur, gróf saxaðar

15g af Cookie and cream Nectar prótein

30g sykurlaust heslihnetu síróp eða smjör

2msk smjör

1msk ósykrað kakó

Setjið allt í skál og blandið vel saman. Getið notað annað bragð af próteini ef þið viljið. 

Ef þið eigið ekki heslihnetu síróp er hægt að skipta því út fyrir smjöri.

Setjið allt á bökunarpappír og dreifið úr. Bakið á 170 gráðum í ca 10 mínútur. Fylgist með svo ekki brenni. Takið plötuna út og hrærið í. Þegar kólnar harðnar morgunkornin og hægt að brjóta í þá stærð sem óskað er eftir. 

Frábært með skyri, ab mjólk, mjólk, möndlumjólk eða jógúrti.

Spínat pizza

Ég elska pizzu og finnst gaman að prófa mig áfram með nýja pizzubotna.

Þessi botn gæti nú ekki verið hollari.

Spínat, ostur og egg. Getur ekki klikkað.

Ég er hrifin af blómkálsbotninum en er ekki frá því að þessi er betri. Blómkálið á það til að draga í sig vökva og því verður afgangs pizza ekki góð. Ég borðaði afganginn af þessari þegar hún var orðin köld og hún var ekkert síðri og varð ekki mjúk eða slepjuleg.

Spínat pizza

2 góðar lúkur af fersku spínati-rífið stilka frá

1 egg

100g rifin ostur

pizzukrydd og hvítlaukskrydd eftir smekk

Skolið spínat undir köldu vatni. Setjið það síðan í blandara eða matvinnsluvél ásamt eggi og maukið. 

Spínatið á að verða að vökva. Bætið við ostinum og blandið smá í viðbót ásamt kryddum.

Penslið bökunarpappír með olíu eða notið pam sprey.

Dreifið úr botninum á bökunarpappírinn svo úr verði ca 12" botn. 

Best er að nota hendurnar og gera þetta varlega.

Setjið botninn inn í ofn á 200 gráður og bakið í 12-15 mínútur eða þar til aðeins gylltur.

Setjið á pizzuna sykrlausa pizzusósu (ég nota hunt's eða geri sjálf) og það álegg sem þið viljið.

Bakið aftur þar til osturinn er gylltur.

Sörur hinna lötu

Sá svo sniðugt um daginn á netinu. 

Sörur hinna uppteknu húsmóður. Ákvað að setja mínar í þennan búning en fannst orðið uppteknu ekki endilega eiga við mig. Frekar orðið löt. Ég hef alveg tíma til að gera venjulegar sörur ef ég vil, ég bara nenni því mjög sjaldan. Svo þetta var alveg frábær hugmynd hjá þeirri sem fattaði þetta og ég bara varð að prófa. Þær eru kannski ekki eins fallegar og hinar gömlu góðu sörur en það er eitthvað við ófullkomleikan í þessum. Brotið súkkulaði, óreglulegir endar. 

Já þær eru bara fullkomnar svona ófullkomnar. 

Það er yndi að eiga þessar í frysti þegar ég fæ verkjakast, eins og í dag. Stundum gleymi ég því að ég er með gigt og get ekki bakað í eldhúsinu marga klt án þess að fá að finna fyrir því.

Og þegar ég er verkjuð þá hjálpar svona góðgæti, því ekki gerir sykurinn það.

 Ónei hann bara bætir í verkina.

Sörur hinna lötu

Botn

3 eggjahvítur (stofuhita)

50g sukrin melis 

70 g möndlumjöl

Eggjahvítur, sukrin melis/via-helath sæta og stevia þeytt saman þar til orðið stíft. Möndlumjölið er varlega bætt við og blandað með sleif. Sett í eldfastmót með bökunarpappír. Ég var með svona mót frá Cup Company (stærri gerðin) og stærðin á því er 31.5cm x 24,5 cm. Bakaði botninn á 150 gráður án blásturs í ca 40 mínútur. 

Krem
50g sukrin melis
100g mjúkt smjör

3 eggjarauður

2 tsk kakó

2 tsk insta kaffi

Öllu blandað vel saman.

Krem er sett á botninn þegar hún er orðin köld. Dreift jafnt yfir botninn. Frystið á meðan sykurlaust súkkulaði er brætt. Ég notaði um 150g af bræddu súkkulaði. Setjið súkkulaðið yfir söruna en leyfið fyrst súkkulaðinu að kólna örlítið fyrst. Dreifið vel úr.

Þegar súkkulaðið er búið að harðna er skorið í söruna og litlir bitar búnir til. Setjið í box og geymið í frystinum.

Bláberja chia búðingur

Einfalt, hollt, fljótlegt og ljúffengt.

Þarf ég eitthvað að segja meir um þetta?

Bláberja Chia búðingur

1 dós kókosmjólk (ég nota frá Santa María)

40g chia fræ

100g bláber söxuð

nokkur heil bláber til viðbótar

Setjið chiafræ og kókosmjólk í skál og hrærið. Saxið niður bláberin (Ég á snilldar græju frá Tuppeware þar sem ég get saxað niður allt, lauk, ferskar kryddjurtir, ber, whatever ég vil.) og bætið þeim út í skálina. Látið smá af heilum berjum í búðinginn og geymið inn í ísskáp.

Ef þið viljið sætu þá er hægt að setja ca 5 dropa af stevíu eða 4 msk sukrin.

Þessi er tilvalin sem morgunmatur, í nestið eða sem eftirréttur.

Heslihnetu mousse

Í dag ætlaði ég að gera skotheldar heslihnetukökur. Þegar ég svo opnaði ofninn eftir nokkrar mínútur varð allt í reik, kökunar að mestu brunnar og orðin ein flöt klessa. Eins og það væri ekki nóg, þá fór Securitas reykskynjarinn í gang og jáhh bæði þjófavarnakerfið og extra háværi reykskynjarinn vældu. Ég var nálægt því að verða heyrnalaus. Ég byrjaði að skafa kökumylsnunar upp og troða upp í mig og bragðið var bara ekki sem verst, semsagt það sem var ekki brunarústir. Kona deyr ekki ráðalaus og ákvað því bara að útbúa heslihnetu mousse og jáhh, það heppnaðist ótrúlega vel :)

Nýjar fréttir eru annars þær að ég er nýjasti bloggari hjá MS-Gott í matinn og munu birtast LKL vænar uppskriftir mánaðarlega.

Einnig verður viðtal við mig í Fréttablaðinu á föstudaginn. 

Dóttir mín var svo ánægð þegar hún sá að ljósmyndarinn væri komin og hún heima. Var ekki lengi að henda á sig skykkju og kórónu og taka sér sæti við hlið mömmu sinnar.

Heslihnetu mousse fyrir 4

Heslihnetukurl

30g smjör, við stofuhita

100g heslihnetumjöl

3msk sukrin gold

Setjið heslihnetur í matvinnsluvél eða blandara og myljið niður í mjöl.

Setjið allt hráefnið í skál og blandið vel saman. 

Dreifið á bökunarpappír og setjið í ofn sem er 180 gráðu heitur og bakið í 5-7 mínútur eða þar til gyllt. Fylgist vel með svo ekki brenni.

Látið kólna og myljið niður og geymið í skál.

Mousse

50g sykurlaust súkkulaði hreint

50g sykurlaust súkkulaði með heslihnetum

(má líka vera 100g hreint súkkulaði)

1 eggjarauða

2msk sukrin plús

4 dropar Via-Health súkkulaði stevía (má sleppa)

200ml rjómi

2 matarlímsblöð

Setjið matarlímsblöðin í skál með vatni og látið liggja þar til orðið lint.

Setjið súkkulaðið og rjóma í pott og bræðið við vægan hita.

Bætið við stevíu, sukrin plús og eggjarauðu í pottinn og hrærið vel.

Takið matarlímin og kreystið afgangsvökva úr og setjið í pottinn. Hrærið þar alveg uppleyst.

Setjið heslihnetukurl í 4 desert skálar. Skiljið smá eftir fyrir skraut. Skiptið svo súkkulaði blöndunni á milli skálana og setjið í kæli ca klukkutíma. Þeytið rjóma og setjið smá rjóma yfir hvert glas ásamt hnetukurli.

Geymið í kæli.

Appelsínukaka

Meistaramánuður hafin. Þetta árið ákvað ég að taka þátt. En ég nenni ekki að setja mér markmið sem ég veit að ég mun aldrei ná að framkvæma. Markmið mitt á þessu ári er því að drekka 2 lítra af vatni dag hvern. Hingað til hefur það gengið mjög vel. Er með app í símanum sem minnir mig á að fá mér vatnssopa. Það hjálpar að fá sér Slender Sticks í vatnið. Gefur sætt og gott bragð og ég fæ bara ekki nóg af því. Hef bara prófað tvær tengundir en held að þær séu fleiri og þarf að gera mér ferð í búð og kaupa meir.

Appelsínukaka

1 appelsína
rifin börkur

6 egg

100g sukrin

3msk sjóðandi vatn

1tsk vanillu extract eða dropar

180g fínmalað möndlumjöl

1tsk vínsteinslyftiduft eða venjulegt 

1tsk husk

2msk sítrónusafi

Þvoið appelsínuna og rífið börkin utan af með fínu rifjárni. Geymið í skál.

Afhýðið appelsínuna og setjið appelsínuna í blandara og maukið í fínt mauk.

Þeytið egg, sukrin og vanillu extract vel í skál.
Bætið við soðnu vatni, 1msk í einu í skálina.

Blandið þurrefnunum við.

Í lokin er appelsínumauk og börkur bætt út í.

Setjið í springform eða silikonform sem er 22-24 cm á stærð.

Ef þið notið springform er gott að setja bökunarpappír í botninn.

Bakið á 180 gráður í 35-40 mínútur.

Sigtið sukrin melis yfir kökuna þegar hún er orðin köld ef þið kjósið.

Kjúklinganaggar

Þessi uppskrift er mjög vinsæl hjá púkunum mínum.

Sá þessa hugmynd á pinterest og svo hefur maður breytt og prófað eftir smekk þegar kemur að kryddum. Þessi útgáfa hér er sú sem við notum mest. Kjúklinganaggar sem eru í raun búnir til úr kjúklingakjöti ;)

Kjúklinganaggar

4 bringur

150g möndlumjöl

50g parmesan ostur, rifin

3msk steinselja, fersk eða þurrkuð

1tsk hvítlaukssalt

1tsk sítrónupipar

1/2tsk papriku krydd

rifin ostur

smjör klípur

Skerið bringurnar í litla munnbita. Reynið að hafa þá í svipaðri stærð. Setjið í skál möndlumjöl, parmesanost og krydd og blandið vel saman.

Takið kjúklingabitana og setjið í skálina og húðið vel. 

Setjið í eldfastmót eða beint á bökunarpappír og dreifið smjörklípur yfir kjúklinginn.

Bakið í 10 mínútur á 180 gráður.

Takið kjúklinginn út og dreifið rifnum osti yfir. 

Setjið aftur í ofninn í ca 10 mínútur eða þar til eldaður í gegn.

Góðar með avocado frönskum, sæt kartöflu frönskum, heimagerði kokteilsósu og eða sykurlausri tómatsósu :)

Pönnupizza Kristu

Prófaði þessa uppskrift af pizzubotni frá henni Maríu Kristu sem ég sá á LKL spjalli á FB og namm!

Fannst ég þurfa að pósta henni hér líka, breytti henni bara ogguponsu því ég átti ekki kotasælu.

Pönnupizza

2 egg

1 góð msk Bacon smurostur

1 góð msk rjómaostur

1msk Husk

2tsk pizzukrydd

Setjið allt í hátt glas eða box og blandið vel saman með töfrasprota.

Setjið í silikonform sem er 9 tommur að stærð. Ég var sjálf með 8 tommu form og fékk aðeins þykkari botn. 

Bakið á 200 gráðum í 10-15 mínútur eða þar til pizzubotninn fer aðeins að lyfta sér.

Takið botninn úr ofni og smyrjið sykurlausri pizzusósu yfir og það álegg sem þið viljið ásamt rifnum osti og bakið áfram í 5-10 mínútur eða þar til osturinn er gylltur.

Fljótlegt og mjög gott hjá henni Kristu :)

"Ferrero Rocher" konfekt

Hæ, nammifíkillinn hér aftur. Eina ferðina enn.

September er sykurlaus hjá ansi mörgum og það þýðir fyrir mig að þá verð ég að búa til eitthvað gott fyrir mig sem er sykrlaust og hef sjaldan staðið eins mikið í eldhúsinu að búa til gotterí.

Þetta, já þetta er svo gott að ég tárast við það að horfa á konfektið. Ég asnaðist til að hafa þetta mæðgna stund og dúllast með að gera þetta með frumburðinum. Hann táraðist líka þegar hann fékk fyrsta molann. Hann er búin að spyrja mig svona 105 sinnum í dag hvenær ég geri svona aftur. Ég humma bara og segi fljótlega, fljótlega og læt hann ekki vita að enn eru nokkrir molar inn í kæli sem bíða eftir að ró og næði verður komið í kotið svo ég get borðað þetta ein í kvöld. Ég get ekki beðið.

Ef þið notið Balance súkkulaði getiði notað gyllta pappírinn utan um súkkulaðið utan um kúlurnar og setja þær svo í lítið konfekt form til að gera svipað útlit og fyrirmyndin ;)

Ferrero Rocher konfekt

Núggat

200g heslihnetusmjör

150g sykurlaust súkkulaði

5 dropar via-health súkkulaði stevía (má sleppa)

Bræðið súkkulaðið yfir heitu vatnsbaði ásamt stevíu (má sleppa). Bætið við heslihnetusmjörinu og blandið vel saman. 

Setjið í skál eða form með bökunarpappír í botninum og inn í kæli í minnsta kosti klukkutíma.

Konfekt

50g heslihnetur

1 skammtur núggat

Nokkrar heilar heslihnetur

150-200g sykurlaust súkkulaði

Takið núggat og skafið eina væna tsk og setjið á bökunarpappír. Best er að vinna með það kalt.

Þrýstið því aðeins niður og setjið eina heila heslihnetu í og myndið svo kúlu utan um hnetuna.

Bræðið súkkulaði yfir vatnsbaði.  Saxið heslihnetur smátt og blandið við súkkulaðið .

Hjúpið kúlurnar í súkkulaðinu og látið í lítil konfekt form og inn í kæli.

Bláberja nammi

Ég á pínu skrítin börn. Þau til dæmis vilja ekki borða grænmeti sem meðlæti með mat heldur borða það alla aðra stundir dagsins. Það má heldur ekki elda grænmeti heldur vera ferskt. Það er ekkert að þessu svo lengi sem þau borða sinn skammt af grænmeti.

Þau eru líka skrítin þegar kemur að t.d bláberjum. Þau (tvö yngri) vilja ekki borða bláberin eins og þau eru frá náttúrunnar hendi en bláberjasultur elska þau.

Við vorum með afmæli um helgina þar sem keypt var hellingur af melónu, vínber, bláber og öðru góðu nammi fyrir krakkana og við vorum með afgangs bláber.

Ekki þýðir að bjóða börnunum að borða þau svo ég ákvað að búa til sultu. Svo ákvað ég að prófa að búa til bláberjahlaup handa þeim.

Úrkoman var góð og er horfin ofan í litla maga og þau spyrja mig hvenær ég útbúi svona aftur næst.

Bláberjahlaup

2 bollar bláber

5 matarlímsblöð

safi úr einni sítrónu

2-4 msk Sukrin melis ef þið viljið sæta

Matarlímsblöð sett í skál með vatni og látin liggja í 5-10 mínútur.

Setjið bláberin ásamt sítrónusafa í pott og látið malla í ca 10 mínútur. 

Setjið í blandara eða notið töfrasprota til að mauka bláberin vel.

Setjið aftur í pottinn og bætið við sætu og svo matarlímsblöðin þegar sukrin melis er alveg blandað við. Setjið á silikon mottu og dreifið úr. Setjið í kæli í klukkutíma.

Skerið í litla bita eða notið lítil kökuform til að skera út.

Setjið í skál og geymið í kæli.

Þetta er frábært sem hollt nammi eða í nestisboxin.

Súkkulaði með heslihnetum

Oj. Eina sem ég get sagt um þetta veður er oj.

Nálgast hádegi og ég er enn í náttkjólnum og sloppnum og held bara að ég ætla ekki að fara úr því í dag. Dóttirin er líka í sínum náttkjól, en það er kannski því þetta er Frozen náttkjóll og er notaður 24/7. Ég ætla ekki að ljúga, ég vildi óska að jólatréð væri hér inni stofu með fallegu jólaljósunum sínum og ég að hlusta á Michael Buble.

En ég læt jólaljósin í glugganum nægja. Já ég er búin að kveikja á jólaseríu í stofuglugganum. Ég tek þau aldrei niður, er of löt til þess og leið og fer að dimma er kveikt á þeim til að fá fallega birtu á kvöldin.

En þar sem ég er ekki með jólatré og ætla ekki alveg að fara hlusta á jólalög ætla ég að kveikja á kertum, hlusta á góða tóna, lesa bók og narta í smá konfekt.

Þetta er yndislegt konfekt. Eins og vinkona mín sagði í gær, þetta smakkast eins og jól.

Það er mjög gott að eiga þessa í kælinum. Það þarf ekkert samviskubit þegar maður fær sér svona mola. Ekkert nema holl fita sem við þurfum öll á að halda.

Þetta er líka fljótlega útbúið. Ég útbjó þetta með syni mínum, hann hjálpaði mér að búa til uppskriftina og sá svo um að sulla þessu öllu saman :)

Eigum við eitthvað að ræða þetta fallega krullaða rauða hár!!??

Súkkulaði með heslihnetum

100ml kókosolía brædd 

40g sukrin melis 

30g ósykrað kakó

6 dropar via-health súkkulaði stevía

50g heslihnetur

Heslihnetur settar á bökunarpappír og inn í 175 gráða heitan ofn í 5-7 mínútur. Passa að þær brenni ekki. Látið kólna og setjið í viskustykki og nuddið þær á milli viskustykkisins svo hýðið detti af. Saxið hneturnar.

Setjið kókosolíu í pott (getið verið með bragðlausa kókosolíu eða venjulega) og hitið varlega.

Sigtið sukrin melis og kakó út í kókosolíuna og blandið vel saman. Bætið við stevíu og heslihnetum.

Setjið í konfektform eða lítil muffinsform og inn í kæli. Geymið í kæli þar sem kókosolían bráðnar við stofuhita.