Pistasíu fudge

Vá hvað tíminn bara flýgur áfram. Reyndar endurtek ég þetta á þessum tíma á hverju ári. Finnst alltaf vera alveg að koma jól. Nú er smátt og smátt að gerast jólalegra hér í koti. Börnin búin að fá seríurnar sínar upp í glugga sína en það kostaði sitt. Lofaði í gærkvöldi að setja upp seríur, hoppaði niður í geymslu en.....engar seríur! Hvaða rugl er það! Leitaði og leitaði, kom upp og leitaði í öllum skápum og nei, engar seríur. Hringdi til Grænlands til að ath hvort grænlendingurinn minn vissi eitthvað af þessu.

En þessu var bara reddað með ferð í Rúmfatalagerinn og seríur komnar upp og ég neyddist til að kaupa meira jóladót í leiðinni því ég komst að því að ég á bara einn kassa af jóladóti. Það er engan vegin að virka.

Nauðsynlegt að eiga nóg af kertum og kertastjökum. Varð of skotin í hreindýra stakanum!

Pistasíu fudge

90 g smjör

5 msk sukrin gold

5 dl rjómi

6-8 dropar af vanillu eða karamellu Via-Healt stevíu

2 dl pistasíur

Allt nema hnetur sett í pott og látið malla á lægsta hita í ca 30 mín. Passa að hræra ekki of mikið. Rétt að hræra á tíu mínútna fresti. Saxa niður hnetur og setja í blönduna þegar hún er orðin þykk. Hrært saman og sett í form og í frysti í nokkra klukkutíma. Skorið í bita og geymt í ísskáp.

Karamellu fudge og blómkálspopp

Þegar það rignir bara á mann í sumarfríinu þá er ekkert skemmtilegra en að prófa nýjar uppskriftir, og það er akkúrat það sem ég hef verið að gera.

Þegar ég sá að farið er að selja lkl vænan púðursykur var ég fljót að hoppa út í búð og fjárfesta í einum poka. Uppskriftin sjálf er einföld en það þarf smá þolinmæði þar sem ekki er hægt að gæða sér á karamellunni strax.

Karamellu-hnetu fudge

50g smjör
1 dl rjómi
1 msk sukrin gold
1 tsk vanillusykur eða vanilludropar
2 msk hnetusmjör (ég setti sjálf 1 og fannst það nóg)


Smjör, rjómi, sukrin og vanillusykur sett í pott og hrært í.
Þegar suðan kemur upp þá er stillt á lágan hita og leyft að malla í 30-40 mín. Hræra á 10-15 mín fresti. Alls ekki hrær of mikið því þá skilur blanda sig. Einnig þarf að passa að ekki brenni við. Best að halda sig nálægt eldhúsinu, allavega þegar karamellan er gerð í fyrsta sinn.

Þegar blandan er orðin þykk og búin að malla á lágum hita í 30-40 mín er hnetusmjöri bætt út í. Við það þynnist blandan aðeins. Sett í silikon form og inn í frysti í 3 klt. Þegar tekið er úr frysti er karamellan skorin niður í bita og geymd í ísskáp.

ATH. Ætla ítreka hér aftur að skiptir máli að láta karamelluna malla á lágum hita, sumir eru að lenda í því að karamellan skilur sig í frystinum. Eldavélar eru misjafnar og því þarf hver og einn að finna út hversu lágt þarf að stilla vélina sína :)

Það er hægt að gera þessa án hnetusmjörs og fá gamla góða karamellubragðið. Einnig er hægt að nota Steviu dropa með piparmyntu eða öðrum bragðtegundum. Um að gera að prófa sig áfram.

Ég ákvað að dusta rykið af fínu myndavélinni minni og þrífætinum og taka fallegar myndir af blessuðu karamellunni. Svona þar sem það er nú rigning úti ;)

BLÓMKÁLSPOPP

Ég skal alveg viðurkenna það að ég er ekki mikið fyrir grænmeti. Á yfirleitt erfitt með að borða það. Ég get borðað tómata ef ég mauka þá í súpu, lauk ef hann er steiktur og núna blómkál ef ég "poppa" það :)

Blómkál er þrifið og skorið niður í litla munnbita.Stilkarnir skornir frá. Olía og salt og pipar sett í skál og kálið blandað við. Dreift á bökunarpappír og sett inn í ofn í 30 mín eða þegar það er orðið brúnað og stökkt. Gott er að hræra í þessu tvisvar sinnum við eldun.

Smakkast best heitt og er stökkt og gott og þeir sem vilja geta dýft poppinu í góða ídýfu.