Heimilisbrauð

Á meðan ég fæ mig til að nenna að taka myndir og færa yfir í tölvuna og koma svo á bloggið er ég með eina af uppáhaldsbrauð uppskriftum mínum.

Auðvelt að útbúa og hrikalega gott með íslensku smjöri og góðri ostsneið :)

Fullt af góðum fræjum og orku og auðvelt að breyta til og prófa sig áfram með þessa uppskrift.

Heimilisbrauð Dísu

45g möndlumjöl

45g kókoshveiti

3tsk vínsteinslyftiduft eða venjulegt

5tsk Husk

30g chiafræ

35g hörfræ

60g sesamfræ

100g rifin ostur

4msk sýrður rjómi

4 egg

1dl heitt vatn

100g sólþurrkaðir tómatar

Bætið þurrefnunum saman í skál. Egg, ostur, sýrður rjómi og vatni bætt við og blandað vel saman.

Skerið tómatana í litla bita og bætið við deigið.

Setjið í silikon brauðform.

Stráið fræblöndu eftir smekk yfir brauðið ef þess er óskað og bakið á  180g í 50-60 mínútur eða þar til tannstöngull kemur hreinn úr miðju brauðsins.

Svartbauna brownies

Vikan hálfnuð og styttist því í helgina. Aftur!

Ég reyndar sit núna í sófanum með fætur upp á skemli og passa að hreyfa ekki hægri fótinn of mikið.

Ég er snillingur þegar kemur að því að meiða mig.

Ég einhvern vegin náði að togna á vöðva (held allavega að það sé tognun, fer til doksa á eftir) á meðan ég sat í sófanum í gærkvöldi að horfa á fréttir. Stóð upp og gat ekki stigið í fótinn.

Var svo viss um að þetta myndi lagast í nótt en neibb, kona var eins og 100 ára og bað börnin að aðstoða sig að ná í hluti sem voru á gólfinu eða neðarlega í skúffum.

Ég er því heppinn að eiga þessar brownies í frystinum og geta fengið mér með rjóma.

Þegar þær koma heitar úr ofninum eru þær svoooo góðar og mjúkar. Þær eru ekkert verri kaldar og smakkast þá vel með rjóma og ferskum berjum.

Það er örugglega einhverjir sem gretta sig þegar þeir sjá orðið svartbaunir sett við hliðin á brownies en ég lofa, þetta virkar!

Reyndar er deigið svo gott og þykkt að það er alveg hægt að sleppa því að baka það og bera fram sem súkkulaðimús.

Svarbauna brownies.

1 dós svartar baunir

3 meðal stór egg

5 msk kókosolía (var með bragðlausa)

150g Sukrin Gold

55g ósykrað kakó

1,5tsk vanillu essence eða dropar

1/2tsk vínsteinslyftiduft eða glútenlaust lyftiduft

100g saxað sykurlaust súkkulaði (valfrjálst)
Ef þið viljið glúten og sykurlaust súkkulaði mæli ég með IQ súkkulaðinu.

Sigtið bauninar og skolið vel.

Setjið í blandara ásamt eggjum og blandið vel saman. Bætið við restinni af hráefnunum (fyrir utan súkkulaði) og blandið vel. 

Saxið súkkulaði niður og bætið út í og blandið með sleif.

Setjið bökunarpappír í eldfast mót, mitt var 20x28 cm og setjið deigið í.

Smyrjið því jafnt út og bakið á 180 gráður í 30-35 mínútur.

Sykurlausar súkkulaði brownies.

Það er skrítið hvað lífið getur komið manni á óvart. Fyrir nokkrum mánuðum síðan var ég viss um að ég myndi aldrei aftur vinna við menntun mína og fann fyrir söknuði að vera ekki í starfi á spítala.

Í dag er ég svo heppinn að hafa fengið draumavinnu á Landspítalanum, á deild þar sem ég fæ að læra heilmikið um það líffæri sem er búið að vera valda veseni hjá eiginmanninum, hjartað.

Já það er yndislegt að vera búin að finna vinnu sem maður sér sig vera í þar til maður hættir að vinna vegna aldurs ;)

Það kannski skírir líka afhverju nýjar uppskriftir eru ekki að rúllast hér inn enda er maður enn að finna aðeins réttu rútínuna og jafnvægið milli heimilis og vinnu aftur.

En síðustu helgi bjó ég til þessa dásemd og tók til tengdó þegar þau buðu okkur í kjötsúpu.

Sykurlausar brownies

3 stór egg (aðskilja hvítur og rauður)

150g valhnetur eða aðrar hnetur

125g smjör stofuhita

150g sykurlaust súkkulaði (ég notaði Valor)

2msk Fibersirup Gold

50g Sukrin

Ef þið viljið glútenlaust köku þarf að passa að velja súkkulaði sem er glútenlaust. IQ er með sykur og glútenlaust súkkulaði og Valor er líka með og er það þá sérmerkt.

Stífþeytið eggjahvítur og setjið til hliðar.

Þeytið Sukrin og eggjarauður vel saman og bætið svo smjörinu og fibersirup gold við 

og þeytið áfram.

Saxið súkkulaði og hnetur og bætið við deigið.

Í lokin eru eggjahvítur varlega blandaðar við.

Setjið í form sem er 20x20 cm. Ég kaupi yfirleitt einnota í Bónus.

Bakið á 170 gráðum í 40-45 mín eða þar til tannstöngull eða gaffall kemur hreinn úr kökunni.

Berið fram með þeyttum rjóma og berjum. (Það er eiginlega algjört möst;))

Eplakaka

Tíminn þýtur áfram eins og vanalega og allir komnir í sína rútinu eins og hún á að vera.

Langar að nefna það að og biðja fólk að gera verðsamanburð þegar það t.d. kaupir gler í gleraugu fyrir sig eða börnin.

Nú á ég tvö börn sem þurfa gleraugu og þarf að skipta um gler hjá þeim 1-2x á ári og þau eru með mikla fjarsýni auk þess að annað er með sjónskekkju og hitt þarf tvö missterk gler fyrir sitthvort augað.

Ég byrjaði á að fara í þá búð sem er næst okkur og kíktum á umgjarðir þar sem boðið var upp á fría umgjörð með glerinu. Leist vel á það og fyrir strákinn hljómaði glerið upp á 25.000kr. Ok svo sem allt í lagi en ég dó næstum þegar sagt var við mig að glerin fyrir stelpuna væru á 49.000kr. Ehh já bara. Ehhm heyrðu ég ætla aðeins að skoða þetta takk og bakkaði varlega út áður en ég hljóp eins og fætur togaði í burtu, svitnandi við tilhugsunina að borga 75.000kr fyrir ný gler fyrir krakkana.

Ég hringdi svo í Augastað í Mjóddinni og þar kostaði fyrir stelpuna glerin 14.000kr! Vá engin smá munur! Glerið fyrir strákinn munaði ekki miklu eða 22.000kr sem skiptir samt máli. Svo ég fékk fríar umgjarðir þar einnig og borgaði 36.000kr fyrir þau bæði, sem nær ekki einu sinni verðinu á bara hennar gleri!

En ok, búin að pústa þessu úr mér og komið að því að tala um köku, eplaköku. Það er algjört möst að eiga alltaf að minnsta kosti einn pakka af kökumixi frá Funksjonell upp í skáp þegar ég vil baka eitthvað fljótlegt en ótrúlega gott. Í dag ákvað ég að skella í eplaköku, þar sem eplin sem voru til í kælinum voru að koma á síðasta snúning.

Ég breytti aðeins og gerði 20cm köku sem passar fullkomlega á nýja sæta kökudiskinn minn sem ég fékk í Rúmfatalagernum á 1290kr minnir mig. Finnst best að baka þessa stærð af kökum en hundleiðinlegt að vera með of stóran kökudisk.

Eplakaka

1/2 pakki af kökumixi frá Funksjonell (ca 180g)

50g brætt smjör

2 stór egg

1dl AB mjólk

1epli

2msk Sukrin Gold

1msk Kanil

Blandið öllu saman í skál  (ekki epli, sukrin og kanil) og blandið vel saman. Ég lét Hrímu mína (kitchenaid vélin mín) sjá um þetta fyrir mig á meðan ég skar niður eplið. Afhýðið eplið og skerið í sneiðar.

Setjið deigið í 20cm silikonform og dreifið vel úr. Setjið eplasneiðar yfir kökuna svo þau hylja hana alla.

Stráið yfir kanil og sukrin gold og bakið svo á 175 gráður í ca 30-40 mínútur eða þar til gaffall kemur hreinn úr kökunni þegar stungið er í hana miðja.

Færið yfir á kökudisk og stingið þó nokkur göt á kökuna og dreyfið yfir hana Fibersirup Gold.

Amerískar pönnukökur

Enn og aftur komin ný vika. Tíminn þýtur frá manni. Áður en maður veit af verða komin jólaljós út um allt og jólalög í útvarpið. Ég bíð mjög spennt eftir því. Þarf kannski ekki að taka fram að ég er búin að kveikja á ljósunum í stofuglugganum enda meira skammdegisljós en jólaljós.

En áður en ég fer að lofa jólunum þá er nú búið að vera yndislegt veður síðan ég byrjaði að vinna og krakkarnir í skólanum. Það er ótrúlega skrítið að eiga ekki lengur leikskólabarn. Litla barnið byrjað í skóla. Eins og ég sagði, tíminni þýtur frá manni.

En á meðan tíminn er að þjóta þá er gott að gefa sér tíma til að njóta með þeim sem maður elskar.

Þessi uppskrift er fullkomið að gera þegar tími gefst og njóta með ástvinum. Ekki verra að eiga Fibersirup Gold og hella yfir þær. Það er eiginlega punkturinn yfir i-ið.

Amerískar pönnukökur

4 egg

4msk Sukrin Gold

4msk kókoshveiti

1,5dl mjólk af eigin vali (möndlu, létt, nýmjólk)

1msk vanilludropar eða vanilla extract

1/2tsk Xhantan gum

Þeytið egginn vel og bætið svo Sukrin Gold við og hrærið ögn lengur. Bætið við restinni af hráefnunum og blandið vel. Látið standa í 5 mínútur þar til farið að þykkjast. Hitið pönnukökupönnu vel og stillið svo á meðal hita og bræðið smjör og bakið litlar pönnukökur. Gott að bera fram með jarðarberjum og Fibersirup Gold.

Haframjölskökur

Ný vara sem er að koma á markaðinn hér á landi sem ég er mjög spennt yfir er Fibersirup frá Funksjonell. Ég var svo heppin að fá sitthvora siróps flöskuna gefins og hef verið að prófa mig áfram í eldhúsinu með þessari snilld. (tek það fram að þetta er ekki kostuð auglýsing heldur eru þetta upplýsingar sem ég er búin að vera kynna mér sjálf eftir að hafa áskotnast þessar vörur)

Fibersirup clear og Fibersirup Gold er síróp sem inniheldur aðeins 5% sykur og er mjög trefjaríkt. Sykurstuðullinn er 35 sem er svipað og hunang og agave síróp en hinsvegar er samt sem áður mun minni sykur í þessari vöru. Það er hægt að lækka sykurstuðulinn með því að nota sírópið með fitu í uppskriftum.

Ekki skemmir fyrir að sírópið inniheldur vel af trefjum.

Þeir sem eru með sykursýki 2 þurfa kannski að prófa sig áfram með þessa vöru.

En það sem er með þessa vöru og þær sem ég nota sem skiptir mig máli er það að þetta er mun hollara en hunang eða agavesíróp, skemmir ekki tennurnar og er nokkuð lágt í sykurstuðlum og heldur því blóðsykrinum í góðu jafnvægi.

Fibersirup Gold hef ég t.d. notað út á skyrið, jógúrtið, pönnukökur, karamellu, búið til síróps epli með kökum og í bakstur. Tilraunir í að útbúa karamellu popp er í vinnslu ;)

Fibersirup Clear hef ég svo notað í bakstur og próteinstykki jafnvel.

Nú styttist líka í skólasetningu hjá börnunum og litla barnið að fara byrja í skóla (hvert fór tíminn???)

Því hef ég verið á fullu að útbúa ýmsar nestishugmyndir sem eru hollar og góðar fyrir þau til að taka með sér og mun fljótlega setja saman eina færslu með öllum þeim uppskriftum sem börnin mín mæla með og nota :)

Þessar kökur voru ómótstæðilegar. Ég stóð í eldhúsinu og gúffaði í mig. Þær henta ekki þeim sem eru á ströngu LKL vegna haframjölsins en þetta er frábært nesti eða millimál.

Einnig er hægt að leika sér með þessa uppskrift og setja hnetur, rúsinur, þurrkuð ber eða annað sem hugurinn girnist til að breyta til.

Haframjölskökur 8-10stk

70g glútenfrítt haframjöl (eða venjulegt ef þolir glúten)

70g smjör

50g Fibersirup Clear

30g Sukrin gold

30g kókosmjöl

rúsinur, hnetur, þurrkuð gojiber eða önnur sem ykkur/börnin langar út í.

Setjið allt í pott og hitið á miðlungshita og blandið vel saman. Ef þið viljið setja rúsinur, ber eða hnetur setjið það í lokin og blandið vel við. Setjið á bökunarpappír og formið kökur með skeið eða höndum. Bakið á 175 gráður í 7-10 mínútur eða þar til gylltar.

Látið kólna á bökunarpappírnum áður en þær eru teknar af. Eru mjúkar á meðan heitar en harðna er kólna.

Sesambollur

Stundum misheppnast það sem maður ætlaði að gera en útkoman verður samt þrusu góð.

Þessi uppskrift er ein af þeim. Þetta áttu að verða bollur en fékk einskonar skonsur úr ofninum.

Bragðið var samt æðislegt. Smyrja smjöri yfir og ost eða skinku og maður er komin með fínasta brauð ;) 

Sesamskonsur/bollur

2 egg

65g sesammjöl frá Funksjonell

20g kókoshveiti frá Funksjonell

20g husk

2msk chia fræ

2 tsk vínsteinslyftiduft

1dl rjómi

1 dl AB mjólk

1/2dl vatn

2msk möndlumjöl

2msk Sukrin Gold

1/2 tsk salt

Blandið saman þurrefnum í skál. Bætið við eggjum og hrærið vel saman. Í lokin er rjómi, AB mjólk og vatn bætt við. Látið standa í smástund.

Setjið vatn á hendurnar og útbúið bollur og setjið á bökunarpappír.

Bakið á 175 gráður í ca 20 mínútur eða þar til gyllt.

Hnetu og sítrónukökur

Það er búið að vera mikið fjör á heimilinu síðustu vikuna. Við erum að fóstra 3 litla kettlinga og mömmu þeirra. Kettlingarnir eru ca 4-5 vikna og bjuggu í Laugardalnum.

Það hefur gengið mjög vel með þá og eru þeir ótrúlegt krútt. Erum búin að nefna þau Mandla, Karl litli og Krummi. Batman okkar er svo farin að taka að sér pabba hlutverkið og passar upp á krílin ;)

Verst verður að gefa þá frá sér en vonandi fá þeir allir þrír gott heimili, þeir eiga það svo sannarlega skilið.

Strákarnir mínir eru búnir að vera duglegir að sjá um sig sjálfir í eldhúsinu, undir handleiðslu mömmunnar að sjálfsögðu. Kvöldmatur, hádegismatur og baksturs prófun hjá þeim. Þeim finnst mjög skemmtilegt að fá að prófa sig áfram í eldhúsinu og kunna að gera hlutina, hvort sem það er að steikja hamborgara eða búa sér til boost. Á meðan situr mamman við eldhúsið og leiðbeinir þeim ef þess þarf. Yfirleitt þessa daganna er ég með litabókina mína mér við hlið og lita. Það er eitthvað við það að lita sem róar mig niður. 

Í dag langaði strákunum að baka smákökur. Alexander vildi gera súkkulaðikökur en Sigurgeir langaði í sítrónukökur og bjó því til þessa uppskrift. Heppnaðist mjög vel hjá honum. Þetta eru nokkuð þurrar kökur sem eru gómsætar með kaffi eða kaldri mjólk ;)

Hnetu og sítrónukökur Sigurgeirs

3dl möndlumjöl

2msk hnetumjöl frá Funksjonell

1 egg

3msk Sukrin Gold

2msk rjómi eða kókosmjólk

börkur af 1 sítrónu

4 dropar sítrónu stevía  (má sleppa)

1tsk lyftiduft

1tsk vanilludropar

saxaðar salthnetur (má sleppa)

þurrefnum blandað saman og svo restinni. Blandað vel saman og gerðar litlar kúlur sem settar eru á bökunarpappír. Bakað í ofni í 8-10 mín á 175 gráður.

Súkkulaðikaka

Sá þessa uppskrift á Sukrin síðunni um daginn og varð að prófa. Ætlaði að baka hana um helgina en eins og svo margt þá varð ekkert úr því. 

Á morgun á minn yndislegi eiginmaður afmæli og verður fjarri okkur fjölskyldunni í vinnu á Grænlandi. Við krakkarnir ákváðum samt sem áður að halda upp á með stæl.

Kakan átti ekki að borðast fyrr en á morgun en það var mikið um tuð og læti svo ég ákvað að leyfa þeim að njóta hennar í sólinni :)

Þessi kaka er sjúklega góð. Algjör súkkulaðibomba!

Súkkulaði kaka

250g sykurlaust súkkulaði 

(ég notaði frá Valor)

250g smjör

4 egg

150g Sukrin Gold

4 dropar súkkulaði stevía

1msk vanillu extract eða dropar

2 tsk kaffi

Bræðið smjör og súkkulaði yfir vægum hita og hrærið þar til blandað saman.

Pískið eggin og bætið svo við Sukrin Gold og vanillu extract.

Bætið eggjunum við súkkulaðiblönduna og hrærið með sleif varlega saman.

Smyrjið 20 cm springform með olíu eða smjöri og setjið deigið í. 

Bakið í ofni sem er 175 gráður í 50-60 mínútur.

Ég reyndar klikkaði oggulítið og setti 300g af súkkulaði í mína en hún heppnaðist mjög vel. Var aðeins blaut í miðjunni en okkur finnst það ekkert verra.

Þeytti svo rjóma með toffee caramel stevíu og bar fram með ásamt jarðarberjum.

Stromboli

Ég flakka mikið um netið og skoða uppskriftir (kemur svo sem engum á óvart)

Deig búið til úr mozzarella osti hef ég séð í uppskriftum bæði vestan hafs og á skandinavískum síðum en alltaf virðist vera eitthvað vandamál með hvaða tegund af mozzarella osti er notað. Þess vegna hef ég ekki lagt í það að prófa að gera þetta. Í USA virðist best að nota ost sem er low fat annars gengur ekki að búa deigið til. Í Svíþjóð og Noregi hef ég séð mælt með því að nota ost með smá sterkju í til að fá bestu útkomu. Hér á landi eigum við bara eina tegund af rifnum mozzarella og ég hef farið í marga hringi hvort ég ætti að prófa þetta.

Í morgun var ég ekki svöng en jú maður verður að borða og alveg sama hvað mér datt í hug, það var ekkert sem mig langaði í. Ég átti hinsvegar tvo poka af rifnum mozzarella osti og hugsaði jáhh, kannski er bara komin tími til að prófa þetta.

Vá! Afhverju er ég ekki fyrir löngu búin að prófa? Þetta var svo gott og kom mér á óvart hversu líkt brauði þetta varð. Krispí að utan og mjúkt inn í.

stromboli

140g rifin mozzarella ostur

20g möndlumjöl

20g kókoshveiti (ég nota frá Funksjonell)

55g brætt smjör

1 egg

krydd eftir smekk

Bræðið smjörið í örbylgju eða í pott og setjið til hliðar.

Setjið ostinn í skál ásamt kryddum. Ég notaði hvítlaukssalt, oregano og svartan pipar. 

Setjið í örbylgju í ca 2 mínútur eða þar til orðið að deigkúlu.

Bætið við eggi, möndlumjöli, kókoshveiti og smjöri og hrærið saman með gaffli. Þetta getur tekið smá stund og þarf að setja deigið inn í örbyglju ca tvisvar sinnum í 10 sekúndur til að mýkja það svo það nái að blandast saman.

Setjið deigið þegar nýkomið úr örbylgjunni á bökunarpappír, setjið svo annan bökunarpappír yfir og rúllið út í ferhyrning.

Skerið með pizzuskera eins og á myndinni hér fyrir neðan.

Setjið fyllinguna í. Ég var með sykurlausa pizzusósu frá Hunt's, skinku, pepperoni og rifin ost.

Fléttið brauðið saman. Geymið endana til síðast til að loka brauðinu.

Bakið á 200 gráður í ca 15 mínútur.

Brauðbollur

Það sem hefur vantað í mataræðið hjá mér eru góðar morgunverðarbollur.  Ég útbý stundum úr brauðmixinu frá Funksjonell  en maður á það ekki alltaf til.

Þessa uppskrift sá ég á FB fyrir löngu löngu síðan og ætlaði alltaf að prófa. Ég man engan vegin hvar ég fann hana en ef einhver kannast við hana (man að þetta var íslensk uppskrift) má endilega láta mig vita hver á hana svo ég get sett það inn sem heimild :)

En ég lét loks verða úr því í dag að prófa uppskriftina.

Breytti henni ogguponsu en vá hún er ótrúlega góð. 

Vel af smjöri og góð ostsneið og þetta er gúrmé.

Ég útbjó litlar bollur og fékk um 10stk. Ein lítil bolla mettar mig svo ég ætla að geyma þær í frystinum og næla mér í eina og eina.

Brauðbollur 8-10stk

2 egg

1dl kókoshveiti (ég nota frá Funksjonell)

1/2dl HUSK

2msk chia fræ

2tsk vínsteinslyftiduft

1dl rjómi (eða þykki hlutinn af kókosmjólk)

1dl grísk jógúrt

1/2dl vatn

2msk möndlumjöl

2msk Sukrin Gold

1/2tsk salt

Þurrefni sett í skál og blandað vel saman. Eggjum svo bætt við og hrærið vel.

Rjómi, grísk jógúrt og vatn sett í pott og látið ná suðu og bætt þá við í skálina. Blandið vel saman og látið svo standa í 10-15 mínútur. 

Búið til bollur með höndunum. Gott er að vera með blautar hendur svo deigið festist ekki við þær.

Stráið yfir bollurnar chiafræjum ef þið viljið og bakið svo á 175 gráðum í ca 30 mínútur.

Vöfflur

Í dag er alþjóðlegi vöfflur dagurinn.

Ég vissi ekki að hann væri til fyrr en í gær.

En maður verður jú að fagna og því ákvað ég að búa til vöfflu uppskrift í morgun.

Ég ákvað að útbúa karamellu vöfflur en það er hægt að hafa þær venjulegar líka ef maður vill.

Þær metta vel og eftir að hafa borðað eina er ég pakksödd.

Vöfflur um 6stk.

3 egg

120g rjómaostur

2msk Sukrin Gold

1tsk vínsteinslyftiduft

1msk rjómi

1tsk vanilludropar

4 dropar Toffee stevía (t.d frá NOW) 

1/4 tsk Xhantan gum

Setjið allt í blandara og blandið vel. Passið að setja ekki of mikið af xhantan gum því þá verður deigið of þykkt. Frekar minna en meira.

 Ef þið viljið ekki karamellu vöfflur, skiptið út toffee stevíu fyrir vanilllu stevíu eða bragðlausa.

Hitið járnið og bakið vöfflur!

Blómkáls pizza beyglur

Eftir að hafa tekið mér smá pásu í eldhúsinu og farið meira í það að hreyfa mig og út að labba og svona er ég loks komin aftur í eldhúsið. Og hef varla stoppað ;)

Það er bara stundum nauðsynlegt að taka sér frí. Hvíla sig á baksturshugmyndum og leyfa hausnum að huga að öðrum hlutum. Staðan var samt orðin þannig að mig var farið að klæja í fingurnar að komast aftur í elhdúsið og hugmyndir farnar að poppa upp á mínutu fresti.

Þessa hugmynd sá ég fyrir löngu á internetinu. Búin að vera með hana bakvið eyrað í marga mánuði. Svo loks þegar ég ætlaði að skella í hana þá fann ég ekki uppskriftina aftur. Típískt.

Svo maður bara sullar saman og býr til nýja.

Þær komu mjög dökkar út úr ofninum en ómæ hvað ég elska það. Crispý að utan en mjúkar að innan.

Pizza beyglur 6.stk

100g blómkálsgrjón

100g rifin ostur

2 egg

1/4 rauðlaukur

2 hvítlauksgeirar

6 pepperoni sneiðar

2 skinku sneiðar

(tómatar, sveppir, paprika eða annað sem þið eigið til)

1tsk hvítlauksalt

2-3msk oregano

salt og pipar eftir smekk

Rífið niður blómkál í matvinnsluvél eða blandara.

Setjið blómkálsgrjónin í örbylgjuofn í ca 7-10 mínútur.

Skerið niður álegg og grænmeti og setjið í skál með rifnum osti, blómkálsgrjónum, eggi og kryddi.

Blandið vel saman og setjið í kleinuhringjaform. Ég keypti mitt í Allt í köku.

Bakið á 180 í ca 30 mínútur eða þar til orðið vel dökkt. Ég kýs að hafa mínar beyglur vel dökkar og eldaðar að utan en þið getið prófað að hafa eldunartímann styttri ef þið viljið.

Þessar voru fljótar að fara ofan í magan á mér og syni mínum. 

Valentínusarkaka fyrir tvo

Ég held ekki upp á Valentínusardaginn. Finnst hann persónulega algjör óþarfi, svona þar sem hann lendir á milli bónda og konudaginn. Við heiðrum þessa daga á mínu heimili en Valentínusar er bara eins og hver annar dagur. 

En margir halda upp á þennan, dag og hann verður alltaf vinsælli með hverju ári hér á landi.

Ég er búin að vera heima með einn slappan dreng í dag og hann er ótrúlega mikil kelirófa og með rómantíska genið í sér og hann mun örugglega heiðra framtíða maka sinn á þessum degi í framtíðinni.

Svo við ákváðum að skella í eina ofur bleika og væmna köku í dag. Hún er dísæt og já, mjög bleik en smakkast samt sem áður vel. Hún er lítil og dugar fyrir tvo, jafnvel fleiri því ein lítil sneið er nóg til að metta mann.

Valentínusarkaka

1msk möndlumjöl

2msk kókoshveiti

1msk ósykrað kakó

1-2msk sukrin

1/2 tsk vínsteinslyftiduft

60ml rjómi eða kókosmjólk

2 egg

1/2tsk vanilludropar

5-7 dropar súkkulaði eða vanillu stevía

Blandið þurrefnum saman í skál. 

Egg, rjómi, vanilludropar og stevía pískað vel saman.

Blandið öllu vel saman.

Smyrjið lítið 12 cm form með smjöri og setjið helminginn af deiginu í.

Bakið á 170 gráður í ca 20 mínútur.

Látið kökuna kólna og bætið svo rest af deigi í formið og bakið eins og fyrri botninn.

Hægt er að hafa bara einn botn og minnka uppskriftina um helming.

Rjómaostakrem

150g rjómaostur

1/2-1tsk vanilludropar

1.5msk rjómi

5 dropar vanillu stevía

30g sukrin melis

smá rauður matarlitur

Setjið í skál/hrærivél og hrærið vel saman.

Þetta er dáldið stór uppskrift fyrir þá sem vilja drekka kökunni í kremi eins og við gerðum. 

Ef þið ætlið bara að gera hálfa uppskrift af kökunni, þá minnkið þið kremið líka.

Skreytið svo kökuna með smá kókosmjöli.

Avókadó súkkulaði kökur

Ég skal alveg játa það að ég var þessi sem borðaði mjög einhæft.

Pasta, kjöt, fiskur, mikið af kolvetnum sem voru ekki holl og ávextir og grænmeti fóru aðeins inn í minn munn á fullu tungli, ef svo oft.

Eftir að ég tók út sykur og hveitið hef ég verið að reyna að borða hollara á allan hátt. Passa upp á olíur sem ég nota, koma grænmeti og eitthvað af ávöxtum meira inn í mataræðið.

Fyrir 18 mánuðum síðan gat ég borðað blómkál í fyrsta sinn þegar ég gerði blómkálspopp. Svo hef ég verið að finna leiðir til að nota blómkálið í allskonar bakstur og matargerð og er orðin háð blómkáli.

Broccoli og paprika er að koma sterkt inn hjá mér núna, ásamt avókadó.

Avókadó er mjög hollt og sjúklega gott þegar maður blandar því við súkkulaði. Það gerist einhverjir töfrar þegar þessu tvennur er blandað saman.

Þessar kökur eru fyrir þá sem elska dökkt súkkulaði og smá rammt eftirbragð. Ein kaka með kvöldkaffinu fullkomnar kvöldið.

Avókadó smákökur

80-100g avókadó
50g sukrin gold
1 egg
30g ósykrað kakó
6 dropar bragðlaus stevía (má sleppa)
1/2tsk vanilludropar
1/2tsk matarsódi
50g saxað sykurlaust súkkulaði fyrir þá sem vilja gera kökurnar enn betri

Setjið hráefnin (ekki súkkulaðið) í blandara og blandið vel saman. 

Saxið súkkulaðið og bætið við deigið með sleif.

Ef þú átt ekki blandara geturu maukað avókadóið niður með gaffli og þeytt svo saman við hráefnin.

Notið tvær skeiðar til að færa deigið yfir á bökunarpappír. Ég fékk um 10 stk. úr deiginu.

Bakið á 175 gráður í 8-10 mínútur.

Látið kökunar alveg kólna áður en þið fjarlægið af bökunarpappírnum og geymið í kæli. Þær eru langbesta kaldar.