Svartbauna brownies

Vikan hálfnuð og styttist því í helgina. Aftur!

Ég reyndar sit núna í sófanum með fætur upp á skemli og passa að hreyfa ekki hægri fótinn of mikið.

Ég er snillingur þegar kemur að því að meiða mig.

Ég einhvern vegin náði að togna á vöðva (held allavega að það sé tognun, fer til doksa á eftir) á meðan ég sat í sófanum í gærkvöldi að horfa á fréttir. Stóð upp og gat ekki stigið í fótinn.

Var svo viss um að þetta myndi lagast í nótt en neibb, kona var eins og 100 ára og bað börnin að aðstoða sig að ná í hluti sem voru á gólfinu eða neðarlega í skúffum.

Ég er því heppinn að eiga þessar brownies í frystinum og geta fengið mér með rjóma.

Þegar þær koma heitar úr ofninum eru þær svoooo góðar og mjúkar. Þær eru ekkert verri kaldar og smakkast þá vel með rjóma og ferskum berjum.

Það er örugglega einhverjir sem gretta sig þegar þeir sjá orðið svartbaunir sett við hliðin á brownies en ég lofa, þetta virkar!

Reyndar er deigið svo gott og þykkt að það er alveg hægt að sleppa því að baka það og bera fram sem súkkulaðimús.

Svarbauna brownies.

1 dós svartar baunir

3 meðal stór egg

5 msk kókosolía (var með bragðlausa)

150g Sukrin Gold

55g ósykrað kakó

1,5tsk vanillu essence eða dropar

1/2tsk vínsteinslyftiduft eða glútenlaust lyftiduft

100g saxað sykurlaust súkkulaði (valfrjálst)
Ef þið viljið glúten og sykurlaust súkkulaði mæli ég með IQ súkkulaðinu.

Sigtið bauninar og skolið vel.

Setjið í blandara ásamt eggjum og blandið vel saman. Bætið við restinni af hráefnunum (fyrir utan súkkulaði) og blandið vel. 

Saxið súkkulaði niður og bætið út í og blandið með sleif.

Setjið bökunarpappír í eldfast mót, mitt var 20x28 cm og setjið deigið í.

Smyrjið því jafnt út og bakið á 180 gráður í 30-35 mínútur.

Sykurlausar súkkulaði brownies.

Það er skrítið hvað lífið getur komið manni á óvart. Fyrir nokkrum mánuðum síðan var ég viss um að ég myndi aldrei aftur vinna við menntun mína og fann fyrir söknuði að vera ekki í starfi á spítala.

Í dag er ég svo heppinn að hafa fengið draumavinnu á Landspítalanum, á deild þar sem ég fæ að læra heilmikið um það líffæri sem er búið að vera valda veseni hjá eiginmanninum, hjartað.

Já það er yndislegt að vera búin að finna vinnu sem maður sér sig vera í þar til maður hættir að vinna vegna aldurs ;)

Það kannski skírir líka afhverju nýjar uppskriftir eru ekki að rúllast hér inn enda er maður enn að finna aðeins réttu rútínuna og jafnvægið milli heimilis og vinnu aftur.

En síðustu helgi bjó ég til þessa dásemd og tók til tengdó þegar þau buðu okkur í kjötsúpu.

Sykurlausar brownies

3 stór egg (aðskilja hvítur og rauður)

150g valhnetur eða aðrar hnetur

125g smjör stofuhita

150g sykurlaust súkkulaði (ég notaði Valor)

2msk Fibersirup Gold

50g Sukrin

Ef þið viljið glútenlaust köku þarf að passa að velja súkkulaði sem er glútenlaust. IQ er með sykur og glútenlaust súkkulaði og Valor er líka með og er það þá sérmerkt.

Stífþeytið eggjahvítur og setjið til hliðar.

Þeytið Sukrin og eggjarauður vel saman og bætið svo smjörinu og fibersirup gold við 

og þeytið áfram.

Saxið súkkulaði og hnetur og bætið við deigið.

Í lokin eru eggjahvítur varlega blandaðar við.

Setjið í form sem er 20x20 cm. Ég kaupi yfirleitt einnota í Bónus.

Bakið á 170 gráðum í 40-45 mín eða þar til tannstöngull eða gaffall kemur hreinn úr kökunni.

Berið fram með þeyttum rjóma og berjum. (Það er eiginlega algjört möst;))

Súkkulaðiskyrmús með lime

Ég bjó til þennan eftirrétt í vikunni. Ætlaði að gefa mér svo tíma til að setja inn á bloggið áður en það kom helgi en tíminn einhvern veginn hvarf frá mér. Í gær var svo yndislegt veður og ég ákvað að reyna safna nokkrum freknum framan í hvíta andlitið mitt. Það virkaði ágætlega. 

Núna sit ég út á svölum og læt sólina skína á mig á meðan ég skrifa þetta. Klukkan rétt orðin 10 og það er vel heitt hérna hjá mér. 

Eiginmaðurinn skellti sér eina ferðina enn til Grænlands og ætlar hann að vinna þar allavega næstu sex mánuðina. Maður er orðin svo sjóaður að hafa hann þar en auðvitað myndi ég miklu frekar vilja hafa hann hjá okkur. En svona er þetta og við gerum bara eins gott úr þessu og hægt er :)

Ég fékk sendingu af súkkulaði sem er nýtt á markaðinum hér heima. Var mjög spennt þegar ég sá facebook síðuna þeirra. Fagna í hvert sinn sem nýjar vörur koma hingað til lands sem hægt er að nota.

Sykurlaust, organic, glútenfrítt og gott. Gerist ekki betra :)

Ef þú elskar dökkt súkkulaði, átti eftir að elska þetta.  Bragðtegundirnar eru þó nokkrar og mintu og berja bragðið er tilvalið núna fyrir sumarið.

Skyrmús fyrir 6-8

500ml skyr (óhrært eða vanillu skyr.is)

2 pakkar af IQ súkkulaði lime bragð

3 egg

100g Sukrin 

4msk ósykrað kakó

5 dropar súkkulaði stevía

3 matarlímsblöð

2msk lime safi

Börkur utan af einni lime

Aðskiljið eggjahvítur og rauður og stífþeytið hvíturnar og setjið svo til hliðar.

Þeytið rauðurnar með sukrin og bætið svo skyrinu, kakói og stevíu við. 

Leggið matarlímsblöð í bleyti í ca 5 mínútur og setjið svo í pott ásamt lime safanum og hitið varlega þar til uppleyst. Látið kólna og blandið svo við búðinginn.

Í lokin eru eggjahvíturnar bætt út í ásamt berkinum og blandað varlega saman. 

Setjið í litlar skálar eða eina stóra og geymið í kæli í ca klukkutíma.

Ég var með órhært skyr en þeir sem vilja mildari bragð geta notað vanillu skyr.is

Súkkulaði með heslihnetum

Oj. Eina sem ég get sagt um þetta veður er oj.

Nálgast hádegi og ég er enn í náttkjólnum og sloppnum og held bara að ég ætla ekki að fara úr því í dag. Dóttirin er líka í sínum náttkjól, en það er kannski því þetta er Frozen náttkjóll og er notaður 24/7. Ég ætla ekki að ljúga, ég vildi óska að jólatréð væri hér inni stofu með fallegu jólaljósunum sínum og ég að hlusta á Michael Buble.

En ég læt jólaljósin í glugganum nægja. Já ég er búin að kveikja á jólaseríu í stofuglugganum. Ég tek þau aldrei niður, er of löt til þess og leið og fer að dimma er kveikt á þeim til að fá fallega birtu á kvöldin.

En þar sem ég er ekki með jólatré og ætla ekki alveg að fara hlusta á jólalög ætla ég að kveikja á kertum, hlusta á góða tóna, lesa bók og narta í smá konfekt.

Þetta er yndislegt konfekt. Eins og vinkona mín sagði í gær, þetta smakkast eins og jól.

Það er mjög gott að eiga þessa í kælinum. Það þarf ekkert samviskubit þegar maður fær sér svona mola. Ekkert nema holl fita sem við þurfum öll á að halda.

Þetta er líka fljótlega útbúið. Ég útbjó þetta með syni mínum, hann hjálpaði mér að búa til uppskriftina og sá svo um að sulla þessu öllu saman :)

Eigum við eitthvað að ræða þetta fallega krullaða rauða hár!!??

Súkkulaði með heslihnetum

100ml kókosolía brædd 

40g sukrin melis 

30g ósykrað kakó

6 dropar via-health súkkulaði stevía

50g heslihnetur

Heslihnetur settar á bökunarpappír og inn í 175 gráða heitan ofn í 5-7 mínútur. Passa að þær brenni ekki. Látið kólna og setjið í viskustykki og nuddið þær á milli viskustykkisins svo hýðið detti af. Saxið hneturnar.

Setjið kókosolíu í pott (getið verið með bragðlausa kókosolíu eða venjulega) og hitið varlega.

Sigtið sukrin melis og kakó út í kókosolíuna og blandið vel saman. Bætið við stevíu og heslihnetum.

Setjið í konfektform eða lítil muffinsform og inn í kæli. Geymið í kæli þar sem kókosolían bráðnar við stofuhita.

Súkkulaðibita kökur

Eftir að hafa verið nokkuð andlaus í eldhúsinu síðustu vikur þá kom andinn yfir mig í dag. Allt í einu hafði ég þörf að skoða uppskriftir og búa til og baka og ég get ekki beðið eftir að halda því áfram á morgun með dóttur minni en eins og er erum við bara tvær komnar í sumarfrí.  Í kvöld skelltum við í hrikalega góðar súkkulaðibita kökur sem renna ljúft niður með mjólkurglasi. Þær eru með stökkum hring utan um sig en mjúkar í miðjunni. Ég ætlaði nú að hafa Maccademíu hnetur í kökunum til að hafa þær fullkomnar en fattaði svo að hneturnar eru komnar út í fellihýsi og eftir að hafa íhugað að opna hýsið bara fyrir hneturnar ákvað ég að sleppa því. Súkkulaðið sem ég keypti var frá DeBron og var með eitt dökkt súkkulaði og svo hvítt súkkulaði með núggatfyllingu. Þið getið notað annað súkkulaði sem ykkur líkar við en ég verð að játa að ég er sucker fyrir hvítu súkkulaði og núggati og það var himneskt að bíta í kökurnar og fá bita af því með.

Súkkulaðibita kökur

65g möndlumjöl helst ljóst

20g kókoshveiti

110g smjör við stofuhita

1/2tsk lyftiduft eða vínsteinslyftiduft

100g sukrin gold

6-8 dropar bragðlaus stevía

1 egg

1/4tsk salt

2tsk kanill

1stk debron súkkulaði eða 50g af öðru sykurlausu súkkulaði

1stk debron hvítt núggatfyllt súkkulaði 

Maccademíuhnetur ef þið viljið

Smjör, stevía og sukrin gold þeytt vel saman í ca 5 mínútur þar til fluffy. Í aðra skál, setjið þurrefnin og blandið saman. Bætið þurrefnum við smjörið og blandið vel. Bætið við eggi og blandið vel. Útbúið litlar kúlur og setjið á bökunarpappír og þrýstið þær smá niður. Hafið gott bil á milli þar sem kökurnar stækka vel í ofninum. Bakið á 175 gráður í 8-10 mínútur eða þar til gullinbrúnar. Látið kólna áður en fjarlægðar af bökunarpappíri.

Snickers molar

Bíddu, var ég ekki nýbúin að segja frá því að nú ætlaði ég að einbeita mér meir af því að elda? 

En einhvern vegin þá verða bara gotteríin til og ég verð að blogga um það. Svo fer ég að henda inn öðru fljótlega. Eins og fyrir tveimur kvöldum. Ákvað að skella í eina karamellu en svo varð ég bara að prófa að setja hnetur í hana og svo kom hugmynd að setja súkkulaði yfir og smá salt og já það varð þetta til. Vinnufélagi minn og kona hans kláruðu skammtinn sem ég gerði á núll einni frétti ég og vilja ólm fá uppskriftina svo hingað inn fer hún :)

Snickers molar

50g smjör

1 dl rjómi

1 msk sukrin gold

1-2 msk hnetusmjör

30 g saxaðar hnetur, var sjálf með salt hnetur

Sykurlaust súkkulaði til að bræða

Smjör, rjómi, sukrin go stevíu dropar sett í pott og hrært í.

Þegar suðan kemur upp þá er stillt á lægsta hita og leyft að malla í 30-40 mín. Hræra á 10-15 mín fresti. Alls ekki hræra of mikið því þá skilur blanda sig. Einnig þarf að passa að ekki brenni við. Best að halda sig nálægt eldhúsinu, allavega þegar karamellan er gerð í fyrsta sinn.

Þegar blandan er orðin þykkri og búin að malla á lágum hita í 30-40 mín er hnetusmjöri bætt út í. Því næst er hnetur settar í og blandað vel saman við karamelluna. Sett í silikon form og inn í frysti í 1,5-2 klt eftir þykkt. Brjóta nokkra mola af súkkulaði og bræða yfir heitu vatnsbaði og setja á karamelluna. Gott að strá smá salti yfir súkkulaðið. Skera svo í litla munnbita og geyma í lokuðu íláti í ísskápnum.

Lakkrís trufflur

Ég hef ekki haft mikinn tíma til að prófa eitthvað nýtt í eldhúsinu og blogga. Börnin hafa skipst á að vera veik. Emma er búin að vera meira og minna veik allan nóvember mánuð og loks í gær þegar hún var orðin vel hraust og tilbúin í leikskólann kom Alexander til mín rétt áður en við fórum út úr húsi og sagðist líða einhvað skringilega. Ég var mjög vond mamma og hélt að þetta væri miðjubarna syndrome. Systir hans búin að fá svo mikla athygli út af veikindum sínum og hann er aldrei veikur og hélt því að hann væri að reyna að plata til að eiga smá stund með móður sinni. Þegar hann sagði svo að hann væri með hausverk og ég mældi hann þá var hann klukkan átta að morgni með 39 stiga hita. Ó hvað mömmuhjartað fékk mikla samvisku að hafa haldið að hann væri ekki að segja satt. Man hreinlega ekki hvenær hann fékk hita síðast, allavega nokkur ár síðan. Þannig að mæta í vinnu var ekki á dagskrá, eina ferðina enn.

Bókin er komin á fullt í sölu og hefur gengið vel. Var að klára prentun núna klukkan tíu og þá er bara að við skytturnar þrjár (ég, Ágúst og Andrea sem eru með mér í þessu verkefni) setjumst niður og setjum bókina í umslag. Ég fékk að sjá loksins bókina í gær og flétta henni. Það sem hún er falleg :-) Svaf með hana á náttborðinu mínu.

En ætla að setja uppskrift af lakkrís trufflum. Ofur einfalt og sjúklega gott. 

Lakkrís trufflur

200 súkkulaði, 70%

1 1/2 dl rjómi

1-2 tsk lakkríspúður

Rjómi hitaður í potti. Tekið af hellu áður en rjóminn nær suðu og súkkulaði bætt út í. Hræra vel í rjóma og súkkulaði þar til alveg blandað. Bæta lakkríspúðri við og hræra vel saman við súkkulaðið.

Setja í sprautupoka og sprauta í lítil konfekt form eða setja í skál og geyma í kæli í klt og búa til litlar kúlur. Hægt að skreyta kúlurnar með söxuðum hnetum eða kakódufti. Ef sett í konfektform er gott að skreyta með smá klípu af salti eða chili.

Karamellu fyllt súkkulaði

Ég var með smá leik á facebook síðunni fyrir Dísukökur þar sem ég dró einn sem vann vörur. Þetta var ótrúlega skemmtilegt og núna í samstarfi við Via-Health Stevíu ætla ég að vera með annan leik.

Einhver sem langar að eignast kanill og karmellu stevíu? Glæný vara sem ég er búin að bíða spennt eftir og strax byrjuð að nota. Farið á facebook síðu Dísökökur og líkið við þessa mynd þar og kvittið undir hana til að eiga möguleika á að vinna þessar dúllur.

Súkkulaði er alltaf gott, alltaf en karamellu fyllt súkkulaði er enn betra. Hvað þá þegar hægt er að borða það með hreina samvisku með kertaljós og kósý sokkum :-)

Karamella

50 g smjör

1 dl rjómi

4-8 dropar Via-Health karmellu dropar

Smakka til hve sæta þið viljið karamelluna :-)

Smjör, rjómi og stevía sett í pott og sett á miðlungs hita. Þegar suða kemur upp er hellan stillt á lægsta hita og karamellan látin malla í 30-40 mín. Á cirka 10 mínútna frestir er gott að hræra rétt í karamellunni. Passa þarf að hræra ekki of mikið því þá getur hún skilið sig. Þegar komið er smá þykkt í karamelluna eftir 30-40 mín er hún tekin af hellunni og látin kólna.

Með súkkulaðið getið þið keypt ykkar uppáhalds súkkulaði og brætt yfir heitu vatnsbaði eða notað uppskriftina sem ég er með á síðunni með að klikka HÉR. 

Brætt súkkulaði er sett í form. Smá sett í botninn á forminu og svo pensla ég hliðarnar með súkkulaðinu líka. Gott að hafa smá þykkt í þessu. Set formið inn í kæli í 5 mín. Set karamelluna ofan í formið til hálfs eða eins mikið og hugur girnist en passa samt að það sé pláss til að setja í lokin súkkulaði yfir. Formið aftur sett inn í kæli í um 10 mín. Tekið úr kæli og sett súkkulaði sem fyllir formið út og aftur inn í kæli. 

Uppskriftin af karamellunni er nokkuð drjúg og því setti ég restina af henni í lítil form og í kælinn og þar komin með dýrindis karamellu. Einnig hægt að bæta við smá af söxuðum hnetum í afganginn og búa til hnetu karamellu.

Marengskökur

Tilraunir í jólabakstri halda áfram og með minna samviskubiti núna því það er alveg að koma nóvember. Reyndar dáldið síðan ég gerði þessar. Núna er ég búin að vera heima með veika mús og sé fram á að vera eitthvað lengur. Finnst að það ætti að vera bannað með lögum að lítil börn þjáist af hausverk vegna stíflaðra kinnhola og lungnabólgu. Hef sjálf fengið þetta og það sem ég var veik! Dóttirin stendur sig mun betur en mamman gerði og gleymir inn á milli verkjunum.

Í dag var þessi líka fallega sól að skína vel og vandlega inn um gluggana hjá mér og sýna mér allt þetta ryk sem er út um allt hjá mér. Ohhh það sem ég varð pirruð. Þangað til ég uppgvötaði að ég gæti nú notað þessa sól til að taka myndir af marengskökunum! Við það að taka myndirnar uppgvötaði litla veikindapésinn kökurnar og held að þær séu að verða búnar enda er hún algjör súkkulaðigrís.

Marengskökur

Ca. 40 stk

2 eggjahvítur

salt klípa

25 g sukrin melis

8-10 dropar Via-Health vanillu, piparmintu eða original dropar

50 g saxaðar möndlur eða hnetur eftir ósk

100 g saxað súkkulaði 70% eða yfir

Hita ofninn á 175 gráður.

Eggjahvítur, stevía dropar og salt stífþeytt saman. Sukrin melis er svo bætt út í og þeytt smá áfram. Súkkulaði og möndlur blandað varlega saman við með sleif. Sett á bökunarpappír með tsk. Um leið og kökurnar fara inn í ofn er slökkt á ofninum og kökurnar látnar vera þar inn í í 2-2 1/2 tíma.

Súkkulaði trufflur

Bloggstuðið heldur áfram samhliða því að vera að prófa mig áfram í eldhúsinu. Eins og í gærkvöldi. Ég fæ stundum hugmynd sem mér finnst frábær og verð að prófa og  hugurinn verður ekki rólegur fyrr en ég er búin að framkvæma hana. Annars á ég von á svefnlausri nótt.

Í gær átti súkkulaði og rjómi hug minn allan og útkoman var trufflur. Þetta var mjög auðvelt að gera og bragðið.....skal alveg viðurkenna að ég sá eftir þessum tveimur trufflum sem fóru ofan í gestina mína í kvöld. Fullkomið konfekt fyrir jólin :)

Út um herbergisgluggan minn í morgunn. Játa það að ég fór að syngja white christmas í huganum þegar ég sá þetta og að ég var extra glöð enda mikið jólabarn og æðislegt að fá einn svona fallegan dag.

Súkkulaði trufflur

150 ml rjómi

100 g dökkt súkkulaði 70% eða hærra

5 dropar Via Healt Stevia dropar orginal bragð

Kakó, hnetur, kókos, chia eða annað sem hugurinn girnist til að húða trufflurnar.

Hita rjóma á meðalhita. Þegar rjómin er farin að hitna, slökkva undir og bæta súkkulaði og stevia dropum við og hræra þar til alveg blandað við rjómann, verður pínu þykkt. Sett í skál og geymt í ísskáp í minnsta kosti tvo tíma. Gott er að gera kvöldinu áður og geyma í ísskápnum yfir nótt.

Þegar súkkulaðið er orðið hart þá er notuð tsk til að skafa upp úr skálinni og formaðar kúlur með höndunum. Gott að nota hanska því þetta getur orðið pínu subbótt. Rúllað í kókos, muldum hnetum, kakódufti eða öðru sem hugurinn girnist.  Kom skemmtilega á óvart að blanda saman smá chia og chilidufti og rúlla truflunum upp úr. Uppáhaldið mitt er samt sem áður muldar pistasíuhnetur.

Via-Health Steviu droparnir komu mér á óvart þegar ég prófaði í dag og gáfu auka boost í bragðið :) Nýja uppáhaldið mitt og trilljón hugmyndir að fæðast :)

Njótið undir teppi, með kertaljósum og góðri bók eða ef þið eruð eins og ég, beint úr ísskápnum því þið náið ekki alla leið undir teppi með trufflurnar ;)

Heimagert súkkulaði

Súkkulaði, ég þarf varla að skrifa meira er það nokkuð?

Ég elska súkkulaði. Og að gera það alveg frá grunni og vita nákvæmlega hvað er í því er æði og alls ekki eins erfitt og ég bjóst við. Ef þú ert fyrir dökkt súkkulaði mæli ég með þessu. Ef þú hinsvegar vilt frekar mjólkursúkkulaði sem er sætt og rjómakennt þá ættiru samt að prófa þetta en  ég er ekki viss um að þetta sé fyrir þig ;) Súkkulaðið á myndinni er í raun litlir munnbitar. Keypti silikon from í Allt í köku til að nota þar sem súkkulaðið verður svo fallegt og hver biti hæfilegur.

Súkkulaði

1/2 bolli kakósmjör smátt skorið

1/2 bolli kókosolía

1/4-1/2 bolli kakóduft, var sjálf með Green & black

1/4 bolli sukrin melis

hakkaðar möndlur

chili duft

salt

Kakósmjör og kókosolia brædd í potti á lágum hita. Gott að hræra reglulega í.

Þurrefnunum blandað saman í skál og kakósmjör og kókosolia bætt svo við. Hræra vel saman, getur tekið smá stund að fá melisinn til að blandas almennilega. Möndlur, chili og salt sett í eftir smekk hvers og eins. Gott að smakka til. Setja súkkulaðið í form og inní ísskáp í ca klt. Fer eftir forminu og hversu þykkt súkkulaðið er. Geymist svo í ísskáp. Hægt er að sleppa chili og möndlum og hafa súkkulaðið hreint eða setja aðrar hnetur frekar eða krydd. Allt eftir smekk.

Kókoskúlur

Stundum þá langar manni í eitthvað sætt og ljúfengt sem tekur ekki langan tíma að gera. Skoðaði nokkrar uppskriftir og setti þessa saman :-)

Kókoskúlur 8-14 stk eftir stærð

100 g mjúkt smjör

70g möndlumjöl

30g kókosmjöl (og meira til að skreyta)

3 msk kakó

1 msk vanilludropar eða rommdropar

2-4 msk sukrin melis (eftir því hversu sætt þú vilt)

Hráefnum blandað saman í skál. Búið eru til kúlur og rúllað upp úr kókosmjöli.

Sett á disk og inn í ísskáp í klt. Geymist í kæli. 

Reiknast að í allri uppskriftinni er undir 10g net carbs :)

Kladdkaka með þeyttum rjóma

Þú finnur varla neitt sem er meira sænskt en kladdköku. Kladdkaka er súkkulaði kaka sem er ekki alveg bökuð, mjúk og æðisleg með rjóma :) Ég bjó sem krakki í Svíþjóð og er með sterk tengsl þangað og því er stundum sett í eina kladdköku. Dagurinn í dag var því tilvalin fyrir eina kökugerð. Húsbóndinn stakk enn eina ferðina af til Grænlands og börnin því pínu leið, en góð súkkulaði kaka getur dreyft huganum og glatt þau í smá stund :) Þessi er LKL væn, algjör súkkulaðibomba og bragðgóð. Eins og með flest LKL bakkelsi þá er ein sneið meira en nóg. Best er að borða þessa kalda með þeyttum rjóma og jafnvel fá sér nokkur jarðaber með. Gott er að gera þessa deginum fyrr því hún er enn betri næsta dag :-)

Kladdkaka

100 g smjör

100 g súkkúlaði (70% eða yfir)

2 egg

1 dl rjómi

3 msk sukrin

1 msk sukrin melis

1-2 msk kakó

1 tsk vanilludropar

Smjör og súkkulaði er sett í pott og brætt. Rjóma bætt við og blandað vel. Egg og sykur þeytt vel saman og blandað svo við súkkulaðið. Vanilludropar bætt við. Í restina er kakó bætt við. Best að smakka hversu mikið maður vill. Ef súkkulaðibragðið er of ramt (fer eftir hversu mörg % súkkulaðið er) er hægt að bæta örlítið af rjóma við eða smá sukrin.

Ofnin stilltur á 225g og kakan bökuð í 6-10 mín. Hún á að vera blaut í miðjunni. Best að leyfa kökunni að kólna því hún er betri köld.