Avókadó súkkulaði kökur

Ég skal alveg játa það að ég var þessi sem borðaði mjög einhæft.

Pasta, kjöt, fiskur, mikið af kolvetnum sem voru ekki holl og ávextir og grænmeti fóru aðeins inn í minn munn á fullu tungli, ef svo oft.

Eftir að ég tók út sykur og hveitið hef ég verið að reyna að borða hollara á allan hátt. Passa upp á olíur sem ég nota, koma grænmeti og eitthvað af ávöxtum meira inn í mataræðið.

Fyrir 18 mánuðum síðan gat ég borðað blómkál í fyrsta sinn þegar ég gerði blómkálspopp. Svo hef ég verið að finna leiðir til að nota blómkálið í allskonar bakstur og matargerð og er orðin háð blómkáli.

Broccoli og paprika er að koma sterkt inn hjá mér núna, ásamt avókadó.

Avókadó er mjög hollt og sjúklega gott þegar maður blandar því við súkkulaði. Það gerist einhverjir töfrar þegar þessu tvennur er blandað saman.

Þessar kökur eru fyrir þá sem elska dökkt súkkulaði og smá rammt eftirbragð. Ein kaka með kvöldkaffinu fullkomnar kvöldið.

Avókadó smákökur

80-100g avókadó
50g sukrin gold
1 egg
30g ósykrað kakó
6 dropar bragðlaus stevía (má sleppa)
1/2tsk vanilludropar
1/2tsk matarsódi
50g saxað sykurlaust súkkulaði fyrir þá sem vilja gera kökurnar enn betri

Setjið hráefnin (ekki súkkulaðið) í blandara og blandið vel saman. 

Saxið súkkulaðið og bætið við deigið með sleif.

Ef þú átt ekki blandara geturu maukað avókadóið niður með gaffli og þeytt svo saman við hráefnin.

Notið tvær skeiðar til að færa deigið yfir á bökunarpappír. Ég fékk um 10 stk. úr deiginu.

Bakið á 175 gráður í 8-10 mínútur.

Látið kökunar alveg kólna áður en þið fjarlægið af bökunarpappírnum og geymið í kæli. Þær eru langbesta kaldar.

Sykur og hveitilaus Dísella (Nutella) kaka.

Ég er búin að sjá um allt internetið Nutella-köku með tveimur hráefnum, Nutella og egg.

Einfalt, ekki satt?

Ég ákvað samt sem áður að breyta aðeins hlutföllunum og gera mína eigin útgáfu, einfaldlega út af því að ég tímdi ekki að setja fjögur ekki í kökuna.

Kakan hefur fengið mikla athygli, ekki bara því fólk vill fá að smakka hana heldur líka vegna þess að ég vogaði mér að nota orðið Nutella. Þetta var sett inn í sakleysi. Maður búin að sjá trilljón og þrjár myndir á internetinu þar sem fólk er að útbúa sína eigin uppskrift af Nutella, með og án sykurs svo ég gerði það sama. Setti mynd inn á grúbbu sem ég er í þar sem ég var kölluð lögbrjótur og meðal annars bent á það að ég væri líkleg til að keyra ölvuð undir stýri. Meina, ef ég er tilbúin að brjóta þessi lög er ég líkleg til að brjóta önnur lög víst. Við matarbloggarar eru svakaleg af þessu leyti. Nú er ég bara hreinlega ekki nógu vel inn í svona málum hvort við matarbloggarar og sem höfum gaman af því að búa til hollari/endurbættar útgáfur af nammi og bakkelsi séum að brjóta lög eða hvort þetta sé hlutur sem bara viðgengst. Yfirleitt reynir maður að búa til staðgengil fyrir hlutina og notar það nafn sem fólk kannast við. 

En svo er spurningin hvort ég sé ekki ítrekað búin að brjóta lög þegar ég hef sett inn Bounty uppskriftir og Snickers uppskriftir og kallað þá þessa hluti eins og fullt fullt af fólki.

Spurning hvort ég þurfi ekki bara að fara skella smá kokteil í mig og fara svo á rúntin. Ég er nefnilega margsinnis búin að brjóta af mér ;)

Mér finnst ekkert að því að benda á hluti sem betur mega fara en þarna fór þetta aðeins of langt fannst mér.

En að kökunni.

Kökurnar sem ég hef séð myndir af litu út meira eins og kladdkaka en mín var mun þykkari og meira eins og skúffukaka. Hún er ekki eins kremuð en bragðið er gott. Ríkjandi heslihnetubragð er fullkomið með þeyttum rjóma.

Kannski verður hún meira kladdkökuleg ef maður bætir við fjórða egginu. Hver ætlar að prófa og láta mig vita hvernig gengur?

Dísella/Nutella kaka

3 stór egg

250g heimagert nutella

Þeytið eggin mjög vel í hrærivél þar til þau eru búin að þrefalda sig í ummáli.

Notið sleikju til að blanda nutellanu varlega við. Gott að setja ekki allt súkkulaðið í egginn í einu.

Setjið í 20cm silikon form. Ef þið eigið ekki silikon form þá er hægt að setja bökunarpappír inn i formið eða smyrja það með smjöri.

Bakið kökuna á 175 gráður í ca 25 mínútur eða þar til gaffall kemur hreinn úr kökunni ef stungið er í hana.

Pizzubotn úr osti

Fljótlegur, einfaldur og góður. Segir allt sem segja þarf um þennan pizzabotn :)

Það er ýmislegt sem maður finnur á pinterest.

Pizzubotn

1 egg

100g rifin ostur

2msk möndlumjöl

krydd eftir smekk. Pizzukrydd, hvítlaukskrydd, oregano

Blandið öllu vel saman í skál.

Setjið á bökunarpappír og dreifið úr.

Bakið á 180 gráður í ca 10 mínútur eða þar til rétt farið að gyllast.

Takið úr ofninum og setjið sykurlausa pizzusósu (ég nota frá Hunt's), álegg og smá rifin ost og setjið svo aftur í ofninn þar til osturinn er gylltur.

Skyrterta með bláberjasósu

Þessi er tilvalin fyrir helgina. Dóttir mín bíður alltaf spennt eftir að mamma búi til skyr eða ostatertur.

Yngri sonurinn vill bara fá Baby Ruth/Dísuköku og já sá elsti vill hnetusmjörskökurnar.

Það er nöldrað vikulega hvenær ég ætli að baka allt af þessu aftur og eina loforðið sem mamman gefur er að þegar þau eiga afmæli mun mamma baka uppáhaldið þeirra.

Skyrterta með bláberjum

Botn:

100g smjör

120g möndlumjöl

1msk kanill

3msk sukrin gold

Setjið smjörið í pott og bræðið það. Bætið við restinni af hráefninu og blandið vel saman. 

Smyrjið lítið eldfast mót með smjöri á botninn og aðeins upp með hliðunum. 

Þjappið kökubotninum vel í eldfasta mótið og bakið á 170 gráðum í um 10 mínútur eða þar til gyllt. Látið kólna.

Ef þið viljið ekki þurran botn geti þið sleppt því að baka botninn :)

Fylling:

Stór dós vanillu skyr.is

1/2l rjómi

50g sykurlaust Valor súkkulaði (má sleppa)

Þeytið rjómann. Bætið skyrinu við og blandið vel saman. 

Grófsaxið súkkulaðið og bætið við skyrblönduna. 

Setjið yfir botninn og kælið.

Bláberjasósa:

150g bláber

1msk vatn

4tsk sukrin

Setjið bláber ásamt vatni og sukrin í pott og stillið á meðalhita. 

Hrærið í reglulega. 

Maukið bláberin með töfrasprota til að útbúa sósu. 

Látið kólna áður en dreift er yfir skyrtertuna.

Skreytið með súkkulaðibitum og bláberjum.

Blómkálsklattar

Ég dreymi um ís allan sólahringinn núna og er búin að ná að búa til ís tvisvar sinnum með nýju ísvélinni. Í gærkvöldi bjuggum við til súkkulaði sorbet sem kom vel út. Of mikið súkkulaði bragð fyrir okkur hjónin en börnin borða hann með bestu lyst.

Ég varð samt að taka mynd af ísnum til að eiga og notaði nýja bollan minn frá Royal Albert. Fékk hann í afmælisgjöf frá foreldrum mínum og hef ákveðið að byrja safna bollastelli frá þessu merki. Er sjúklega ástfangin af því, meina hvernig er það ekki hægt?

3 egg

1 blómkálshaus

2 hvítlauksgeirar, smá saxað

100g rifin ostur

3msk kókoshveiti

1/2tsk pipar

1/2tsk salt

1-2tsk dijon sinnep

niðurskorin skinka, pepperoni eða annað álegg.

Skerið blómkálið í litla bita og setjið í örbylgju í ca 15 mínútur þar til soðið.

Setjið í skál og maukið gróflega með gaffli. Bætið við öllum hráefnunum og blandið vel saman.

Útbúið litla klatta með höndunum og steikið með smjöri eða olíu á pönnu þar til gyllt.

Einnig er hægt að nota þessa uppskrift til að búa til hálfgerða eggjahræru. Steikja bara á pönnu. Kemur mjög vel út.

Bakaðar laxastangir í kryddmöndluhjúp

Ég fékk í jólagjöf frá ektamanni og börnum ísvél frá Kitchenaid. Vissi ekki að sú græja væri til fyrr en nýlega og sjálfsögðu hef ég talað um hana alla daga síðan.

Verst var að hún var uppseld hjá Einari F og því fékk ég gjafabréf.

Í gær fékk ég hana loks í hendurnar og það sem ég býð eftir að skálin sé tilbúin til notkunar en á morgun mun ég fara á fullt að útbúa ís. Ég er með trilljón og eina uppskrift í hausnum og já, ís á dag kemur heilsunni í lag ekki satt?

En svona áður en ég fer að pósta inn fullt af ís uppskriftum langar mig að deila með ykkur þessum sjúklega góða laxa uppskrift. Hann er bæði góður heitur beint úr ofninum eða kaldur daginn eftir.

Í raun fannst mér betra að borða hann kaldan því þá náði stangirnar að hanga saman og hægt að borða meira eins og snarl og dýfa í sósu.

Laxa stangir

300g laxasneið

100g hakkaðar möndlur

1-1.5tsk paprikukrydd

pipar og salt eftir smekk

brætt smjör

Skerið laxinn í mjóar sneiðar og þerrið.

Smyrjið bræddu smjöri á sneiðarnar.

Setjið möndlur og krydd á disk og blandið vel saman.

Setjið eina sneið í einu í möndlublönduna og hjúpið og setjið svo á bökunarpappír.

Bakið á 200 gráðum í 15-18 mínútur eða þar til gyllt.

Ídýfan sem ég var með var búin til með sýrðum rjóma, dijon sinnepi og tómatpaste. Ég blandaði bara eitthvað saman og smakkaði til.

Ef þú vilt gera laxinn að máltíð í stað snarls er mjög gott að hafa blómkálsmús með henni og hollandesósu eða bernes.

Salt karamellu brownies

Áður en ég fer í það að skrifa um þessa sjúklegu góðu uppskrift sem fær mann til að slefa, þá langar mig að segja ykkur frá því að ég var að gefa út rafrænt hefti með 26 uppskriftum.

Þar sem það er janúar og flestir komnir með leið á súkkulaði og því sem fylgir er voðalega lítið af því og meira af morgunmatar hugmyndum, snarli og boosti.

Ef þú hefur áhuga á að fá svona rafrænt hefti fyrir 1200kr þá máttu endilega senda mér línu á disukokur@gmail.com

En aftur að uppskriftinni.

Um daginn datt ég inní þáttinn heilsugengið þar sem verið var að útbúa girnilega skúffuköku með salt karamellu. Varð fyrir vonbrigðum að notað var spelt, kókospálmasykur og hlynsíróp þar sem það eru vörur sem ég nota ekki sjálf.

Síðan þá er ég búin að vera á fullu að hugsa hvernig ég get útfært þetta að mínum lífstíl og svo í morgun ákvað ég að skella þessu í bakstur.

Útkoman var yndisleg! Lyktin sem kom hér! Mamma mía, dýrindis karamellu lykt sem fyllti húsið.

Sonur minn var yfir sig hrifin þegar hann kom heim og gat skellt einni vænni sneið ofan í sig með ískaldri mjólk.

Brownies

50g kókoshveiti

120g sukrin

110g smjör eða kókosolía

120ml kaffi eða möndlumjólk

2msk sykurlaust kakó

3 egg

6msk mæjónes eða sýrður rjómi

1tsk vanilludropar

10 dropar súkkulaði stevía frá Via-Health

1tsk matarsódi

100g saxaðar valhnetur (valfrjálst)

Sigtið kókoshveiti í skál og bætið við sukrin og blandið vel saman.

Í pott setjið smjör, kaffi og kakó og bræðið saman og setjið svo í skál með kókoshveiti og sukrin. Hrærið vel saman. Restin af hráefnum bætt við. Setjið svo í lokin salt karamelluna yfir brownies deigið. Ég notaði skeið og lét karamelluna hingað og þangað yfir.

Setjið bökunarpappír ofan í eldfastmót. Ég var með eldfastmót í stærðinni 20x28

 Bakið við 200 gráður í ca 20-30 mínútur. Bakið neðarlega í ofninum

Salt karamella

2msk möndlusmjör

30ml kókosolía við stofuhita

60ml sykurlaust salt karamellu síróp

örlítið salt

5 dropar english toffee stevía eða karamellu stevía

Setjið allt í skál og hrærið vel saman.

Blómkáls brauðstangir

Þegar allir eru að missa sig í smákökubakstri er ég að missa mig í brauðstangabakstri.

Já ég hef aldrei verið þekkt fyrir það að fylgja flæðinu. 

Þegar maður hefur það fyrir áhugamál að búa til uppskriftir og byrjar að undirbúa desemberbaksturinn í október þá er maður komin með nóg á aðventunni.

Það kvartar samt engin hér heima. Fjölskyldan er lítið fyrir kökur og sætindi og kjósa frekar snakk.

En ég er búin að vera reyna finna leið til að vera dugleg að borða grænmetið mitt. Já ég er ekki heldur þekkt fyrir að vera dugleg í grænmetinu. En eins og með mörg börn eins og mín sem dæmi þá virkar að fela grænmetið í matnum mínum og ég get borðað það ;)

Blómkáls brauðstangir

ca 250g blómkál

1 egg

50g rifin ostur

3 hvítlauksgeirar

smjör til að steikja

salt og krydd eftir smekk

Rífið blómkálið niður í grjón og setjið í örbylgju í ca 8 mínútur.

Saxið hvítlauk smátt og steikið á pönnu með smjöri þar til gyllt. Geymið.

Þegar blómkálsgrjónin eru búin að kólna eru þau sett í hreint viskustykki og vindið upp á það til að ná öllum vökva úr blómkálinu. Setjið öll hráefnin í skál og blandið vel saman.

Kryddið eftir smekk og smakkið til.

Setjið deigið í silikon brauðform eða brauðform sem búið er að smyrja með smjöri eða olíu og bakið á 175 gráður í ca 20-25 mínútur.

Takið út brauðformið og hvolfið úr því á bökunarpappír og bakið áfram í 10 mínútur.

Takið stangirnar út og dreifið smá rifnum osti og parmesan osti yfir og bakið þar til ostur er gylltur.

Skerið í stangir og berið fram með sykurlausri pizzusósu.

Piparmyntu nammi

Þetta nammi virðist vera vinsælt í Ameríkunni á jólunum.

Auðvitað varð ég að prófa og þá að sjálfsögðu sykurlaust.

Þetta er mjög auðvelt að útbúa og skemmtilegt fyrir krakkana að föndra með og útbúa.

Það er svo hægt að búa til þetta nammi í öðrum lit og bragði með að nota t.d. bragðdropa sem fást í Allt í köku. Ef þið kaupið bragðdropa frá þeim þá þurfi þið bara nokkra dropa þar sem þetta er svo bragðsterkt annars ef venjulegu dropa úr búðinni þá eins og segir í uppskriftinni.

Þetta er mjög stór uppskrift og í fínu lagi að minnka hana um helming eða skipta henni niður og vera með mismunandi bragðtegundir.

110g rjómaostur, stofuhita

450g sukrin melis

1tsk piparmyntu dropar

20 dropar piparmyntu stevía

matarlitur ef þess er óskað

Setjið rjómaostinn í hrærivél helst en hægt að gera þetta í höndum og þeytið vel í smástund.

Bætið við piparmyntu dropum og stevíu og blandið vel.

Því næst fer matarlitur og svo er sukrin melis rólega bætt við.

Gott er að hnoða aðeins í höndunum í lokin.

Búið til litlar kúlur og setjið á bökunarplötu með bökunarpappír á.

Notið svo gaffall til að þrýsta örlítið á kúlurnar.

Látið þorna á eldhúsborðinu í 2-3 klukkutíma. Ekki setja neitt yfir nammið á meðan.

Geymið svo í ísskáp í lokuðu íláti. Geymist í mánuð eða lengur.

Súkkulaði grísirnir geta brætt sykurlaust súkkulaði og dýft namminu í.

Nammið verður hart að utan en mjúkt inn í þegar bitið er í.

Sigrúnar terta

Ég hef ekki bakað mikið af tertum síðan ég fór á sykur og hveitislaust mataræði.

Flest allur bakstur einkennist hjá mér á það að hafa sem auðveldast og að ég þarf ekki margar skálar til að skíta út.

Ég hef bara ekki haft nennu að búa til botna og verandi með handþeytarann á fullu.

En svo kom Hríma mín inn í líf mitt. (þetta er farið að vera eintóm Kitchenaid lofsöngur þetta blogg).

Ég var ekkert neitt viss um að mikið myndi breytast í bakstri við að fá sér eina hrærivél en vá hvað mér skjáltaðist! Ég er svo miklu fljótari að skella í bakstur, ég er ekki bundin við það að standa kjurr  við skálina á meðan hrært er. Allt annað líf.

Ég er líka búin að kynnast því hvað það er yndislegt og þægilegt að baka upp úr sinni eigin bók. Ég er miklu fljótari að flétta uppskriftum upp í bókinni en að nota tölvuna eins og ég hef gert síðustu 18 mánuði. Í gær ákvað ég að skella í svamptertubotninn sem er í Dísuköku bókinni. Gerði tvöfalda uppskrift og setti svo súkkulaði ganache og rjóma á. Kom svona vel út. Þessi fékk nafnið Björg.

Í dag gerði ég svo köku fyrir mömmu mína sem hún bauð vinnufélögum upp á í dag. Að sjálfsögðu fær sú kaka nafnið Sigrún. Uppskriftina fann ég á veraldavefnum á spjalli fyrir sykurlaust mataræði. Ég breytti aðeins kökunni en ég hafði ekki nennu að breyta úr bollamáli yfir í grömm.

Sigrúnar terta

115g smjör við stofuhita

1/2 bolli hreint jógúrt

9 stór egg, stofuhita

1 bolli Erýtiól strásæta með stevíu frá Via-health

1tsk vanillu extract eða vanilludropar

3/4 bolli kókoshveiti

3msk ósykrað kakó

1tsk vínsteinslyftiduft

Sigtið kakó og kókoshveiti og geymið til hliðar. Þeytið egg ásamt vanillu extract/dropum í nokkrar mínútur og setjið til hliðar. Smjör þeytt vel þar til flöffí og sætan bætt smá saman við.

Egg eru varlega bætt við smjör og sætu blönduna. Næst er jógúrti bætt við og svo kókoshveiti og kakó bætt út í smá í einu. Þegar allt er vel blandað er í lokin sett vínsteinslyftiduft.

Setjið í 22cm silikonform eða springform (þarf að smyrja springformið).

Ég sjálf var með 20cm silikonform og fékk því út eina háa köku sem ég skar í tvennt og því komið eins og tveir botnar.

Ef þið eruð með 22cm form bakið á 170 gráðum í 40-45 mínútum.

20cm form bakið á 160 gráðum í 40-45 mínútur og slökkvið svo á ofninum og leyfið kökunni að vera inni í 10-15 mínútur í viðbót.

Þegar kakan er orðin köld skerið hana í tvennt. Minn botn heppnaðist mjög vel.

Ég stakk svo þykkum grillpinna í kökuna á nokkrum stöðum og hellti um 2-3 msk af French vanilla sykurlausu sírópí yfir kökuna.

Súkkulaði Ganache

50ml rjómi

100g sykurlaust Valor súkkulaði

Hitið rjómann að suðu og setjið svo í skál ásamt súkkulaðinu sem búið er að brytja niður í litla bita.

Hrærið í með skeið þar til vel blandað.

Hellið helmingi af súkkulaðinu yfir fyrri botninn og dreifið vel úr.

Klippið sogrör í 4 hluta og setjið miðsvæðis á kökunni til að draga úr þunga efri botnsins.

P.S. ekki klikka á að láta vita af rörunum eins og ég gerði ;)

Setjið rjóma slettu yfir neðri botninn í svipaðri hæð og rörin og setjið svo efri botninn ofan á.

Endurtakið með súkkulaðið og skreytið svo með rjóma eins og þið viljið.

Kotasælu tortillur

Þegar það eru tortillur í matinn hjá okkur eða píta þá fær mamman sér yfirleitt matinn án brauðs, sem er leiðinlegt því það sem heldur þessu öllu saman er brauðið.

Hér er uppskrift sem ég nota sem tortillur, pítubrauð eða bara smyr með góðum rjómaosti og set spínat á og jafnvel parmaskinku. Mmm fullkomið á þynnku dögum.
Já í gær var veisla. Móðir mín átti afmæli og því ber að fagna þegar maður er á svona fallegum aldri eins og hún. Þrjár kynslóðir saman komnar ásamt mökum. Ömmur, afar, frænkur, frændur, systkini og allt þar á milli. Fullt hús af skemmtilegheit. Ég fæ mér mjög sjaldan í tánna, mjög sjaldan. Þetta var í fyrsta sinn á þessu ári. Gerðist síðast í 30 ára afmælinu mínu í fyrra. Ég fór heim snemma í gærkvöldi. Lét eiginmanninn sækja mig þegar hann var alveg að vera komin heim og í dag, já í dag er ég búin að liggja upp í sófa með sæng. Kveikti á kertum og fór að lesa og fékk að vera lasin í friði.
Það má einu sinni á ári. Og þegar það gerist þá er gott að fá sér svona djúsi mat.

Það er ekki sama áferð eða bragð og á venjulegum tortillum enda þessar búnar til úr eggi og kotasælu. 

En þær smakkast vel.

Tortillur 4 stk

250g kotasæla

2 egg

2tsk fiberhusk

krydd eftir smekk

Setjið í skál og maukið með töfrasprota.

Notið skeið til að útbúa tortillur á stærð við hendi á bökunarpappír. 

Smekksatriði hversu þykkar/þunnar fólk vill hafa.

Bakið á 180 gráðum þar til gylltar.

Snickerskökur.

Þessi uppskrift er ég búin að eiga lengi en breytti henni aðeins í vikunni.

Ég og Hríma (það er Kitchenaid vélin mín) erum búnar að eiga gæðastundir saman í eldhúsinu að baka allskyns gotterí.

Maðurinn minn er ekki mikið fyrir sætt. Hann er meira snakk maður en loksins já loksins kom eitthvað úr eldhúsinu sem honum líkaði og ekki ein tegund, heldur tvær.

Ég held að það sé vegna samvinnu okkar Hrímu.

Honum leist svo vel á kökurnar að hann fór með fullan poka af þeim í vinnuna í gær og bauð vinnufélögunum með sér í kaffinu.

Þó svo að hann sé lítið fyrir sætt hefur hann fulla trú á mér og bókinni og fór sem dæmi með kynningareintakið mitt með sér í vinnuna til að reyna selja nokkur eintök í forsölu. Hann var víst búin að ná að selja nokkrum en vildi endilega fá að sýna bókina og fá fleiri pantanir.

Ég sé alveg fyrir mér kaffitímann í dag. Húsasmiðir koma þreyttir inn úr kuldanum í kaffi og fara að skoða litríku og dúllulegu bókina mína meðan þeir sötra kaffi og japla á smákökum.

Snickerskökur

1 egg

50g mjúkt smjör

40g sukrin gold

50g saxað sykurlaust dökkt súkkulaði (ég var með Valor)

45g saxaðar salt hnetur

15g kókoshveiti

30g möndlumjöl

10 dropar english toffee stevía frá Now eða önnur karamellu stevía

Saxið súkkulaði og hnetur og setjið í skál.

Setjið allt hráefnið í skál og hnoðið vel saman í höndum.

Setjið í kæli í 10-15 mínútur og takið svo út og rúllið upp.

Skerið í sneiðar. Þykkt og stærð fer eftir því hversu stórar kökur þú vilt hafa.

Setjið á bökunarpappír og bakið á 175 gráðum í 6-10 mínútur eða þar til gylltar.

Hrikalega góðar með ískaldri mjólk eða möndlumjólk.

Langar að benda ykkur á nýjasta bloggið mitt á MS-Gott í matinn en þar er ég með kanilís, piparkökur og heitt kakó. Einnig hugmyndir að fjölskyldu dagatali fyrir desember og hvað hægt er að nota hvíta sykurinn sem leynist upp í skáp í fallega og ilmandi gjöf. 

Súkkulaði klessur

Nóvember komin. 

Það er næstum orðið löglegt að hlusta á jólalög.

Ég bíð eftir að geta skreytt en það bíður þangað til 1.des í fyrsta sinn síðan ég byrjaði að búa.

Þetta verður erfið bið.

Í síðustu viku fékk ég eintak af bókinni minni senda til mín og omg hvað það var yndisleg tilfinning að halda á henni. Ég var búin að fá ógeð af uppskriftunum og útlitinu á henni eftir að hafa farið yfir bókaskjalið 101 á dag í mánuð til að finna hverja einustu villu og lagfæra.

Ég verð að játa, bókin er hrikalega falleg og vönduð. Hrós til hönnuðarins.

Prentunin heppnaðist líka einstaklega vel. Pappírinn þykkur og glansandi. Já ég lofa að þetta er bók til að næla sér í fyrir jólin.

Í dag urðu kaflaskipti í lífi mínu. Litli ryðgaði handþeytarinn minn sem ég keypti fyrir slikk fyrir 8 árum er komin ellillífeyri og hættur í vinnu hjá mér.

Afhverju?

Jú þetta er ástæðan. Í dag kom ég heim með þessa fallegu Hrímbláu Kitchenaid vél frá 

Einari Faresveit.

Já ótrúlega en satt þá bjó ég til bók með 100 uppskriftum auk þess að halda úti bloggi, 

svo ég baka ansi oft í viku með handþeytara. 

Ég í alvöru vissi ekki hvað ég var að fara á mis við fyrr en í dag.

Í stað þess að láta handþeytarann hrista bingóvöðvana þá sér þessi elska um að vinna fyrir mig á meðan ég geri annað.  Hvílíkt frelsi. Hvað þá þegar styttist í það að fara halda kynningar fyrir bókina og baka jólabaksturinn. Nú verður ekkert mál að margfalda uppskriftir.

Ég fór að sjálfsögðu beint í það að baka og já þetta er bara allt annað líf, yndislegt líf.

Kanilís og heitt kakó var útbúið fyrir MS nóvember bloggið ásamt piparkökum

En þessar súkkulaði klessur bjó ég til líka. 

Súkkulaði klessur 6stk

2 eggjahvítur

2msk sukrin

5tsk kókosmjöl

2-3 tsk ósykrað kakó

1 tsk vanillu extract

5 dropar Via-Health súkkulaði stevía

40g sykurlaust súkkulaði (ég var með sykurlaust mjólkursúkkulaði frá Valor)

Setjið allt nema súkkulaðið í skál og blandið vel saman. Saxið súkulaðið niður og bætið við deigið og blandið. Notið smjörpappír eða silikonmottu og setjið kökudeigið á með hjálp skeiðar. 

Deigið er mjög þunnt og notið því skeið til að smyrja út sex hringi.

Bakið á 150 gráðum í 12-15 mínútur.

Sörur hinna lötu

Sá svo sniðugt um daginn á netinu. 

Sörur hinna uppteknu húsmóður. Ákvað að setja mínar í þennan búning en fannst orðið uppteknu ekki endilega eiga við mig. Frekar orðið löt. Ég hef alveg tíma til að gera venjulegar sörur ef ég vil, ég bara nenni því mjög sjaldan. Svo þetta var alveg frábær hugmynd hjá þeirri sem fattaði þetta og ég bara varð að prófa. Þær eru kannski ekki eins fallegar og hinar gömlu góðu sörur en það er eitthvað við ófullkomleikan í þessum. Brotið súkkulaði, óreglulegir endar. 

Já þær eru bara fullkomnar svona ófullkomnar. 

Það er yndi að eiga þessar í frysti þegar ég fæ verkjakast, eins og í dag. Stundum gleymi ég því að ég er með gigt og get ekki bakað í eldhúsinu marga klt án þess að fá að finna fyrir því.

Og þegar ég er verkjuð þá hjálpar svona góðgæti, því ekki gerir sykurinn það.

 Ónei hann bara bætir í verkina.

Sörur hinna lötu

Botn

3 eggjahvítur (stofuhita)

50g sukrin melis 

70 g möndlumjöl

Eggjahvítur, sukrin melis/via-helath sæta og stevia þeytt saman þar til orðið stíft. Möndlumjölið er varlega bætt við og blandað með sleif. Sett í eldfastmót með bökunarpappír. Ég var með svona mót frá Cup Company (stærri gerðin) og stærðin á því er 31.5cm x 24,5 cm. Bakaði botninn á 150 gráður án blásturs í ca 40 mínútur. 

Krem
50g sukrin melis
100g mjúkt smjör

3 eggjarauður

2 tsk kakó

2 tsk insta kaffi

Öllu blandað vel saman.

Krem er sett á botninn þegar hún er orðin köld. Dreift jafnt yfir botninn. Frystið á meðan sykurlaust súkkulaði er brætt. Ég notaði um 150g af bræddu súkkulaði. Setjið súkkulaðið yfir söruna en leyfið fyrst súkkulaðinu að kólna örlítið fyrst. Dreifið vel úr.

Þegar súkkulaðið er búið að harðna er skorið í söruna og litlir bitar búnir til. Setjið í box og geymið í frystinum.

Heslihnetu mousse

Í dag ætlaði ég að gera skotheldar heslihnetukökur. Þegar ég svo opnaði ofninn eftir nokkrar mínútur varð allt í reik, kökunar að mestu brunnar og orðin ein flöt klessa. Eins og það væri ekki nóg, þá fór Securitas reykskynjarinn í gang og jáhh bæði þjófavarnakerfið og extra háværi reykskynjarinn vældu. Ég var nálægt því að verða heyrnalaus. Ég byrjaði að skafa kökumylsnunar upp og troða upp í mig og bragðið var bara ekki sem verst, semsagt það sem var ekki brunarústir. Kona deyr ekki ráðalaus og ákvað því bara að útbúa heslihnetu mousse og jáhh, það heppnaðist ótrúlega vel :)

Nýjar fréttir eru annars þær að ég er nýjasti bloggari hjá MS-Gott í matinn og munu birtast LKL vænar uppskriftir mánaðarlega.

Einnig verður viðtal við mig í Fréttablaðinu á föstudaginn. 

Dóttir mín var svo ánægð þegar hún sá að ljósmyndarinn væri komin og hún heima. Var ekki lengi að henda á sig skykkju og kórónu og taka sér sæti við hlið mömmu sinnar.

Heslihnetu mousse fyrir 4

Heslihnetukurl

30g smjör, við stofuhita

100g heslihnetumjöl

3msk sukrin gold

Setjið heslihnetur í matvinnsluvél eða blandara og myljið niður í mjöl.

Setjið allt hráefnið í skál og blandið vel saman. 

Dreifið á bökunarpappír og setjið í ofn sem er 180 gráðu heitur og bakið í 5-7 mínútur eða þar til gyllt. Fylgist vel með svo ekki brenni.

Látið kólna og myljið niður og geymið í skál.

Mousse

50g sykurlaust súkkulaði hreint

50g sykurlaust súkkulaði með heslihnetum

(má líka vera 100g hreint súkkulaði)

1 eggjarauða

2msk sukrin plús

4 dropar Via-Health súkkulaði stevía (má sleppa)

200ml rjómi

2 matarlímsblöð

Setjið matarlímsblöðin í skál með vatni og látið liggja þar til orðið lint.

Setjið súkkulaðið og rjóma í pott og bræðið við vægan hita.

Bætið við stevíu, sukrin plús og eggjarauðu í pottinn og hrærið vel.

Takið matarlímin og kreystið afgangsvökva úr og setjið í pottinn. Hrærið þar alveg uppleyst.

Setjið heslihnetukurl í 4 desert skálar. Skiljið smá eftir fyrir skraut. Skiptið svo súkkulaði blöndunni á milli skálana og setjið í kæli ca klukkutíma. Þeytið rjóma og setjið smá rjóma yfir hvert glas ásamt hnetukurli.

Geymið í kæli.

Appelsínukaka

Meistaramánuður hafin. Þetta árið ákvað ég að taka þátt. En ég nenni ekki að setja mér markmið sem ég veit að ég mun aldrei ná að framkvæma. Markmið mitt á þessu ári er því að drekka 2 lítra af vatni dag hvern. Hingað til hefur það gengið mjög vel. Er með app í símanum sem minnir mig á að fá mér vatnssopa. Það hjálpar að fá sér Slender Sticks í vatnið. Gefur sætt og gott bragð og ég fæ bara ekki nóg af því. Hef bara prófað tvær tengundir en held að þær séu fleiri og þarf að gera mér ferð í búð og kaupa meir.

Appelsínukaka

1 appelsína
rifin börkur

6 egg

100g sukrin

3msk sjóðandi vatn

1tsk vanillu extract eða dropar

180g fínmalað möndlumjöl

1tsk vínsteinslyftiduft eða venjulegt 

1tsk husk

2msk sítrónusafi

Þvoið appelsínuna og rífið börkin utan af með fínu rifjárni. Geymið í skál.

Afhýðið appelsínuna og setjið appelsínuna í blandara og maukið í fínt mauk.

Þeytið egg, sukrin og vanillu extract vel í skál.
Bætið við soðnu vatni, 1msk í einu í skálina.

Blandið þurrefnunum við.

Í lokin er appelsínumauk og börkur bætt út í.

Setjið í springform eða silikonform sem er 22-24 cm á stærð.

Ef þið notið springform er gott að setja bökunarpappír í botninn.

Bakið á 180 gráður í 35-40 mínútur.

Sigtið sukrin melis yfir kökuna þegar hún er orðin köld ef þið kjósið.

"Ferrero Rocher" konfekt

Hæ, nammifíkillinn hér aftur. Eina ferðina enn.

September er sykurlaus hjá ansi mörgum og það þýðir fyrir mig að þá verð ég að búa til eitthvað gott fyrir mig sem er sykrlaust og hef sjaldan staðið eins mikið í eldhúsinu að búa til gotterí.

Þetta, já þetta er svo gott að ég tárast við það að horfa á konfektið. Ég asnaðist til að hafa þetta mæðgna stund og dúllast með að gera þetta með frumburðinum. Hann táraðist líka þegar hann fékk fyrsta molann. Hann er búin að spyrja mig svona 105 sinnum í dag hvenær ég geri svona aftur. Ég humma bara og segi fljótlega, fljótlega og læt hann ekki vita að enn eru nokkrir molar inn í kæli sem bíða eftir að ró og næði verður komið í kotið svo ég get borðað þetta ein í kvöld. Ég get ekki beðið.

Ef þið notið Balance súkkulaði getiði notað gyllta pappírinn utan um súkkulaðið utan um kúlurnar og setja þær svo í lítið konfekt form til að gera svipað útlit og fyrirmyndin ;)

Ferrero Rocher konfekt

Núggat

200g heslihnetusmjör

150g sykurlaust súkkulaði

5 dropar via-health súkkulaði stevía (má sleppa)

Bræðið súkkulaðið yfir heitu vatnsbaði ásamt stevíu (má sleppa). Bætið við heslihnetusmjörinu og blandið vel saman. 

Setjið í skál eða form með bökunarpappír í botninum og inn í kæli í minnsta kosti klukkutíma.

Konfekt

50g heslihnetur

1 skammtur núggat

Nokkrar heilar heslihnetur

150-200g sykurlaust súkkulaði

Takið núggat og skafið eina væna tsk og setjið á bökunarpappír. Best er að vinna með það kalt.

Þrýstið því aðeins niður og setjið eina heila heslihnetu í og myndið svo kúlu utan um hnetuna.

Bræðið súkkulaði yfir vatnsbaði.  Saxið heslihnetur smátt og blandið við súkkulaðið .

Hjúpið kúlurnar í súkkulaðinu og látið í lítil konfekt form og inn í kæli.

Súkkulaði með heslihnetum

Oj. Eina sem ég get sagt um þetta veður er oj.

Nálgast hádegi og ég er enn í náttkjólnum og sloppnum og held bara að ég ætla ekki að fara úr því í dag. Dóttirin er líka í sínum náttkjól, en það er kannski því þetta er Frozen náttkjóll og er notaður 24/7. Ég ætla ekki að ljúga, ég vildi óska að jólatréð væri hér inni stofu með fallegu jólaljósunum sínum og ég að hlusta á Michael Buble.

En ég læt jólaljósin í glugganum nægja. Já ég er búin að kveikja á jólaseríu í stofuglugganum. Ég tek þau aldrei niður, er of löt til þess og leið og fer að dimma er kveikt á þeim til að fá fallega birtu á kvöldin.

En þar sem ég er ekki með jólatré og ætla ekki alveg að fara hlusta á jólalög ætla ég að kveikja á kertum, hlusta á góða tóna, lesa bók og narta í smá konfekt.

Þetta er yndislegt konfekt. Eins og vinkona mín sagði í gær, þetta smakkast eins og jól.

Það er mjög gott að eiga þessa í kælinum. Það þarf ekkert samviskubit þegar maður fær sér svona mola. Ekkert nema holl fita sem við þurfum öll á að halda.

Þetta er líka fljótlega útbúið. Ég útbjó þetta með syni mínum, hann hjálpaði mér að búa til uppskriftina og sá svo um að sulla þessu öllu saman :)

Eigum við eitthvað að ræða þetta fallega krullaða rauða hár!!??

Súkkulaði með heslihnetum

100ml kókosolía brædd 

40g sukrin melis 

30g ósykrað kakó

6 dropar via-health súkkulaði stevía

50g heslihnetur

Heslihnetur settar á bökunarpappír og inn í 175 gráða heitan ofn í 5-7 mínútur. Passa að þær brenni ekki. Látið kólna og setjið í viskustykki og nuddið þær á milli viskustykkisins svo hýðið detti af. Saxið hneturnar.

Setjið kókosolíu í pott (getið verið með bragðlausa kókosolíu eða venjulega) og hitið varlega.

Sigtið sukrin melis og kakó út í kókosolíuna og blandið vel saman. Bætið við stevíu og heslihnetum.

Setjið í konfektform eða lítil muffinsform og inn í kæli. Geymið í kæli þar sem kókosolían bráðnar við stofuhita.

Vanillu ostakaka

Helgi enn og aftur. Tíminn þeytist áfram. Þá á maður að tríta sig vel.

Hér er uppskrift af fljótlegum eftirrétti fyrir tvo.

Vanillu ostakaka

Botn:

50g ljóst kökumix frá Funksjonell

1tsk sukrin gold

5g sykurlaust síróp eða brætt smjör

2msk vatn

Setjið allt í skál og blandið vel saman. Setjið í tvö lítil form eða glös og geymið í kæli.

Fylling:

2 matarlímsblöð

100g jógúrt

50g rjómaostur

1msk sukrin melis

1/2 vanillustöng

2msk vatn

Setjið matarlímsblöð í skál með vatni og látið liggja í 5 mínútur.

Jógúrt, rjómaostur og sukrin melis þeytt vel saman í skál. Skafið vanillufræ úr stönginni og bætið ofan í skálina og þeytið vel.

Setjið matarlímsblöð í pott ásamt 2msk af vatni og hitið á miðlungshita þar til uppleyst.

Bætið varlega við fyllinguna  á meðan þeytt er.

Skiptið á milli í formin eða glösin og látið kólna í klukkutíma í kæli.

Skreytið með berjum eða sykurlausri sultu.