Heslihnetukaka með súkkulaði ganache

Þessi uppskrift er tilvalin fyrir helgina :)

Virkar kannski pínu eins og það sé vesen að útbúa hana en lofa að svo sé ekki.

Bara hlusta á góða tónlist og dilla sér á meðan og áður en þú veist ertu að snæða þér á kökunni :)

Botn

170g sykurlaust Valor súkkulaði

150g smjör eða bragðlaus kókosolía

6 egg (aðskilja rauður og hvítur

100g sukrin eða sukrin gold

150g heslihnetumjöl

Setjið heslihnetur á bökunarpappír og inn í ofn sem er 170 gráður heitur og bakið hneturnar í 5-8 mínútur. Passið að brenna þær ekki. Látið kólna og setjið á milli tveggja viskustykkja og nuddið hýðinu af. Setjið hneturnar í matvinnsluvél eða blandara og útbúið heslihnetumjöl.

Bræðið súkkulaði og smjör saman í pott og látið kólna á meðan þið þeytið hvíturnar stífar.

Eggjarauður og sukrin þeytt vel saman í nokkrar mínútur. Bætið súkkulaðinu við og svo heslihnetumjölinu.

Í lokin eru eggjahvíturnar varlega bættar við.

Smyrjið 20cm bökunarform eða notið silikonform og bakið á 150gráðum með blæstri í klukkutíma.

Ganache

100g sykurlaust Valor súkkulaði

100ml rjómi

Brjótið súkkulaðið í litla bita og setjið í skál. Hitið rjómann að suðu og helli svo yfir súkkulaðið.

Látið standa í 1-2 mínútur og hrærið svo saman þar til vel blandað.

Látið kólna í kæli í 20 mínútur.

Hellið yfir kökuna og stráið svo heslihnetum yfir og berjum eftir smekk.

Vanillu rúlla með hindberjakremi

Þessi uppskrift er búin að vera í kollinum á mér í þónokkurn tíma en eins og með svo margt þá þarf ég að vera í rétta stuðinu til að koma þessu í verk. Núna er akkúrat þannig stemming á mér að hugmyndirnar komast úr hausnum og verða að veruleika. Búin að taka sumarþrifið á íbúðinni. Ný vinna handan við hornið og ég býð spennt eftir að byrja í rútinu :)

Þessi uppskrift er auðveld að útbúa. Hún er líka fjlótleg sem skemmir ekki fyrir.

Vanillu rúlluterta

3 egg, aðskilja eggjahvítur og rauður

100g rjómaostur

2msk sýrður rjómi 36%

1tsk vínsteinslyftiduft eða venjulegt

1.5 vanillustöng

10 dropar vanillustevía

30g sukrin melis

Stífþeytið eggjahvítur með lyftiduftinu og setjið til hliðar.

Rjómaostur, eggjarauður, sýrður rjómi, sukrin melis, stevía og fræ úr vanillustöng þeytt vel saman.

Bætið eggjahvítum við með sleif og blandið vel en varlega.

Notið smjörpappír eða bökunarpappír sem búið er að smyrja með olíu (ég notaði avocado olíu) og fyllir heila ofnskúffu. Dreifið yfir pappírinn sukrin og setjið svo deigið.

Bakið á 175 gráður í ca 9-12 mínútur eða þar til gyllt.

Krem

50g rjómaostur

1 bolli frosin hindber

40g sukrin melis

10 dropar hindberja stevía (má sleppa)

150ml rjómi

Þeytið saman rjómaost, sukrin melis og stevíu.

Maukið berin þegar þau eru hálfþiðnuð eða alveg þiðin og sigtið fræin frá. Bætið við skálina og þeytið saman. Í lokin er rjóma bætt út í óþeyttum og þeytið þar til kremið verður stíft.

Dreifið kreminu á tertubotninn þegar hann er orðin kaldur og rúllið honum upp. Gott er að nota pappírinn til að hjálpa sér að rúlla upp.

Stráið yfir tertuna sukrin.

Súkkulaðikaka

Sá þessa uppskrift á Sukrin síðunni um daginn og varð að prófa. Ætlaði að baka hana um helgina en eins og svo margt þá varð ekkert úr því. 

Á morgun á minn yndislegi eiginmaður afmæli og verður fjarri okkur fjölskyldunni í vinnu á Grænlandi. Við krakkarnir ákváðum samt sem áður að halda upp á með stæl.

Kakan átti ekki að borðast fyrr en á morgun en það var mikið um tuð og læti svo ég ákvað að leyfa þeim að njóta hennar í sólinni :)

Þessi kaka er sjúklega góð. Algjör súkkulaðibomba!

Súkkulaði kaka

250g sykurlaust súkkulaði 

(ég notaði frá Valor)

250g smjör

4 egg

150g Sukrin Gold

4 dropar súkkulaði stevía

1msk vanillu extract eða dropar

2 tsk kaffi

Bræðið smjör og súkkulaði yfir vægum hita og hrærið þar til blandað saman.

Pískið eggin og bætið svo við Sukrin Gold og vanillu extract.

Bætið eggjunum við súkkulaðiblönduna og hrærið með sleif varlega saman.

Smyrjið 20 cm springform með olíu eða smjöri og setjið deigið í. 

Bakið í ofni sem er 175 gráður í 50-60 mínútur.

Ég reyndar klikkaði oggulítið og setti 300g af súkkulaði í mína en hún heppnaðist mjög vel. Var aðeins blaut í miðjunni en okkur finnst það ekkert verra.

Þeytti svo rjóma með toffee caramel stevíu og bar fram með ásamt jarðarberjum.

Hnetusmjörsís

Síðustu sólahringa finnst mér eins og ég hafi losnað við mikla byrði af herðum mínum. Það var ótrúlega gott að skrifa og koma þessu niður á rafrænt blað. Ég er ótrúlega þakklát fyrir fallegar kveðjur sem ég hef fengi frá ykkur. Þær hafa hjálpað mikið.

 Ég hef verið með algjört verkstol þegar kom að blogginu. Ekki vantaði hugmyndirnar heldur bara að fá mig til að prufa mig áfra, mynda og skrifa. Ég fæ svona stundum en í morgun vaknaði ég og vildi ekkert annað en prófa mig áfram í eldhúsinu.

Hnetumjöl frá Funksjonell er nýtt á markaðinum hér á landi. Ég er búin að vera bíða spennt eftir að fá að prófa. Er búin að sjá svo margar uppskriftir á erlendum síðum með þessu snillar mjöli sem er að sjálfsögðu glútenlaust.

Eitt sem er frábært með þetta mjöl að það er mjög auðvelt að útbúa hnetusmjör úr því á núll einni.

Sykur, glútenlaust og próteinríkt hnetusmjör en 50% af mjölinu er prótein.

Hnetusmjör

20g af hnetumjöli frá Funksjonell

30-40ml af vatni (eftir hversu mjúkt þú vilt það)

salt klípa

2-3 tsk sukrin gold fyrir þá sem vilja

Setjið í skál og blandið vel saman.

Ég varð svo að prófa að útbúa hnetusmjörsís og guð hvað hann var góður! Hann var ekki lengi að hverfa ofan í magan á mér og syninum þegar hann kom heim úr skólanum. Vildi samt að ég hefði átt salthnetur til að saxa og setja í ísinn.

Hnetusmjörsís

1 egg

50g Sukrin:1 

70g hnetusmjör

380ml rjómi

5 dropar Caramel Toffee stevía

Þeytið saman eggi og sukrin:1. Bætið við hnetusmjöri og stevíu og í lokin óþeyttum rjóma. Þegar allt er vel blandað setjið þið í ísvél og farið eftir fyrirmælum á henni.

Ef þú átt ekki ísvél er hægt að þeyta rjóman og blanda svo öllu saman við og setja í box og í frystinn. Gott væri þá að hræra aðeins í ísnum á 30 mínútna fresti.

Vanilluís

Fyrir slysni rakst ég á myndband sem sýndi hvernig ætti að nota Kitchenaid ísskál til að búa til ís. Eftir að hafa horft á það var ekki aftur snúið. Ég varð að eignast svona skál.

Maðurinn minn var ekki eins sannfærður og var viss um að þetta yrði enn ein eldhúsgræjan sem myndi safna ryki inn í skáp, eins og safa pressan mín. (Vantar einhverjum safapressu??)

Ég fékk í jólagjöf frá maka og börnum því inneign fyrir þessari ísskál þar sem hún var uppseld.

Fékk hana í hendurnar á föstudaginn og í gærkvöldi var frumraunin í ísgerð.

Spennan var mikil og fann ég þetta krútt standandi yfir vélinni.

Áhyggjur eiginmannsins að þessi græja safni ryki upp í skál hurfu þegar hann smakkaði ísinn og sagði hann að héðan í frá yrði ekki aftur keyptur ís.

Ég er með valkvíða hvernig ís ég ætla að búa til næst. Held að súkkulaði sorbet ís eða heslihnetu ís verður fyrir valinu. Ég er núna að reyna finna út hvernig ég komi Kitchenaid vélinni og ísskálinni með mér í sumarfríið í fellihýsinu....

Vanilluís

250ml rjómi

250ml möndlumjólk eða önnur mjólk

50g sukrin

1 vanillustöng

1tsk vanilludropar eða extract

Skerið vanillustöng í tvennt og fræhreinsið.

Setjið hráefnin í pott og hitið örlítið og hrærið í þar til sukrin er uppleystur.

Fjarlægið vanillustöngina og látið blönduna kólna.

Setjið í ísvél eftir leiðbeiningum.

Ef þú átt ekki ísvél geturu skipt út möndlumjólk fyrir rjóma og þeytt allan rjómann.

Súkkulaði rjóma búðingur

Ég hef lítið verið í eldhúsinu síðustu vikur. Veikindi og þreyta hafa yfirtekið mig og ég ekki haft nennu né orku að baka. En stundum þegar maður er heima í veikindaleyfi og það rignir og óþarfa hvasst í byrjun júlí langar manni í eitthvað gott sem tekur tvær mínútur að gera. Þetta er bara rjómi í öllu sínu veldi með smá breytingum en ég elska rjóma. Þessi uppskrift er líka góð á kökur í staðin fyrir þennan venjulega hreina rjóma sem maður fær stundum leið á ;)

Súkkulaði rjóma búðingur fyrir tvo

125ml rjómi

4tsk sukrin melis

4 dropar súkkulaði stevía

1msk ósykrað kakó

Þeytið rjóman hálfa leið. Bætið við restinni af hráefnunum og stífþeytið búðinginn. Voila tilbúið. Ef þið eruð að halda ykkur frá mjólkurvörum er hægt að gera þennan búðing með kókosmjólk og nota þykka hlutann af mjólkinni. Einnig fannst mér mjög gott að setja heslihnetukurl með og hreinan rjóma :)

Sunnudags vöfflur

Vöfflur á sunnudegi, er það ekki heilagt?

Ákvað að prófa að setja saman eina uppskrift og heppnaðist vel :) 

Sunnudags vöfflur ca 2-3 stk

2 egg

4 msk rjómi

1 msk möndlumjöl

2 tsk fiberhusk

1-2 msk sukrin gold

6-8 dropar via-healt karamellu stevía eða vanillu

salt á hnífsoddinn

Blanda öllu vel saman og smakkið til. Ef of mikið eggjabragð sætið betur og leyfið að standa í nokkrar mínútur. Spreyið vöfflujárnið með pam spreyji eða setjið smjörklípu er það er orðið heitt. Bakist þar til orðið gullinbrúnt. Borið fram með þeyttum rjóma og ferskum berjum. Eða með smá sukrin á eins og börnin vilja ;)

Rjómabúðingur

Í dag vorum við svo heppinn að fá nýjan meðlim í fjölskylduna. Hann Batman kom loks heim frá Kattholti og gerir heimilið fjörugra. Ég hef aldrei kynnst eins mikilli kelirófu á ævi minni! Hann elskar að vaða beint í andlitið á mér og knúas mig, hann meira að segja klappar mér um kinn með loppu sinni. Honum finnst eldhúsið líka ansi skemmtilegt og þarf ég nú að venjast því að ganga þar um án þess að traðka á kettlingnum :)

Það getur stundum verið erfitt að vinna í tölvunni með þessa kelirófu ;)

Stundum kemur sætuþörfin úr þurru lofti og mig vantar einhvað gott strax. Í gær gerði ég þennan í flýti og hann var góður!!! Passa bara að borða ekki of mikið af honum, þá gæti manni orðið bumbult.

Rjómabúðingur

200 ml rjómi

1,5 msk chia fræ

4 dropar Via-Health karamellu stevía

Rjómi þeyttur.

Chiafræjum bætt út í ásamt stevíu dropum.

 Öllu hrært vel saman.

sett í kæli í 30 mín eða frysti í 10 mín

Pasta

Ég er mikil pasta kona og er alveg viss á því að í einhverjum af mínum fyrrum lífum þá átti ég heima á Ítalíu. Ég hef sterkar taugar þangað alveg frá barnæsku. Sem unglingur ætlaði ég alltaf að verða fornleifafræðingur og ferðast um heiminn í anda Indiana Jones og svo kenna fræðina í skóla í Róm ásamt að eiga ítalskan mann og börn ;) Þegar ég var 15 ára buðu foreldrar mínir mér til Ítalíu og ég játa alveg að ég grét er flugvélinn lækkaðu flug og ég sá landið fyrir neðan mig. En ítölsku strákarnir náðu ekki að heilla mig svo ég hætti við þetta allt saman og ákvað að giftast ramm íslenskum manni ;) 

En já pasta vorum við að tala um. Elska pasta og fæ "cravings" í það stundum. Þessi uppskrift er búin að redda mér þegar það gerist. Einföld og góð. Ok, þetta er ekki alveg nákvæmlega eins og pasta en kemst nokkuð nálægt því og ég er mjög hrifin.

Pasta

4 egg

120 g rjómaostur

0,5 dl Husk

Salt eða hvítlaukssalt

Þeyta egg og rjómaost vel saman. Setja husk í og blanda vel. Bragðbæta með salti eða öðru kryddi eftir smekk. Láta standa í nokkrar mínútur í skálinni. Dreift á plötu með bökunarpappír og dreift vel úr. Á að vera þunnt en passa að ekki sést í gegnum deigið á plötunni. Mér finnst gott að dreifa úr þessu í kassa eða hring. Sett í 150 gráður heitan ofn í 10 mínútur. Látið kólna eftir bökun og svo skorið í þunnar sneiðar með pizzuhníf.

Sósan sem ég er með er svona dass af þessu og hinu. Sker hvítlauk í þunnar sneiðar og set á pönnu ásamt rjóma. Læt þetta vera á meðal hita í smástund og bæti þá smá af rjómaosti. Pepperoni, skinka, sveppir eða paprika bætt við ef það er til. Hræri þessu öllu saman og læt malla í smástund. Í lokin krydda ég með salt og pipar og smá steinselju og bæti smá af hvítvíni ofan í, svona eina tvær matskeiðar. Ríf ferskan parmesan svo á diskinn :)

Lakkrís trufflur

Ég hef ekki haft mikinn tíma til að prófa eitthvað nýtt í eldhúsinu og blogga. Börnin hafa skipst á að vera veik. Emma er búin að vera meira og minna veik allan nóvember mánuð og loks í gær þegar hún var orðin vel hraust og tilbúin í leikskólann kom Alexander til mín rétt áður en við fórum út úr húsi og sagðist líða einhvað skringilega. Ég var mjög vond mamma og hélt að þetta væri miðjubarna syndrome. Systir hans búin að fá svo mikla athygli út af veikindum sínum og hann er aldrei veikur og hélt því að hann væri að reyna að plata til að eiga smá stund með móður sinni. Þegar hann sagði svo að hann væri með hausverk og ég mældi hann þá var hann klukkan átta að morgni með 39 stiga hita. Ó hvað mömmuhjartað fékk mikla samvisku að hafa haldið að hann væri ekki að segja satt. Man hreinlega ekki hvenær hann fékk hita síðast, allavega nokkur ár síðan. Þannig að mæta í vinnu var ekki á dagskrá, eina ferðina enn.

Bókin er komin á fullt í sölu og hefur gengið vel. Var að klára prentun núna klukkan tíu og þá er bara að við skytturnar þrjár (ég, Ágúst og Andrea sem eru með mér í þessu verkefni) setjumst niður og setjum bókina í umslag. Ég fékk að sjá loksins bókina í gær og flétta henni. Það sem hún er falleg :-) Svaf með hana á náttborðinu mínu.

En ætla að setja uppskrift af lakkrís trufflum. Ofur einfalt og sjúklega gott. 

Lakkrís trufflur

200 súkkulaði, 70%

1 1/2 dl rjómi

1-2 tsk lakkríspúður

Rjómi hitaður í potti. Tekið af hellu áður en rjóminn nær suðu og súkkulaði bætt út í. Hræra vel í rjóma og súkkulaði þar til alveg blandað. Bæta lakkríspúðri við og hræra vel saman við súkkulaðið.

Setja í sprautupoka og sprauta í lítil konfekt form eða setja í skál og geyma í kæli í klt og búa til litlar kúlur. Hægt að skreyta kúlurnar með söxuðum hnetum eða kakódufti. Ef sett í konfektform er gott að skreyta með smá klípu af salti eða chili.

Lakkrís ís

Hvað gerir kona þegar hún lendir í þeim hremmingum að einhver óþokki kemst yfir visa korts númerið hennar og ákveður að nota alla heimildina hennar til að spila póker?? Jú eftir að hafa hringt í banka og farið þangað til að fylla út kærublað þá langar manni í eitthvað gott til að róa taugarnar. Ís er alltaf besta meðalið og núna langaði mig virkilega í ís með lakkrís bragði.

Lakkrís ís

2 dl rjómi

2 eggja rauður

5 dropar Via-Health vanillu stevía

1,5-2 tsk lakkrísduft

Þeyta rjóman en ekki stífþeyta samt heldur svona hálfa leið (kem ég þessu skiljanlega frá mér? ;) )

Bæta eggja rauðum og stevía dropum við og þeyta smá í viðbót. Síðast er bætt við lakkrísduftinu.
Byrjið á einn tsk og smakkið til og bætið þá við ef þið viljið. Setja inn í frysti og hræra á hálftíma fresti eða svo. Tilbúin eftir mislangan tíma, fer eftir því hversu stórt eða lítið form ísinn er settur í. 

Bragðið minnir mig ekki beint á lakkrís heldur frekar á pipar sem er í brjóstsykri, mmmm. Taugaveiklaða mamman eftir þennan dag var pínu glöð að Alexander sem var vakandi líkar ekki við lakkrís.

Mjög gott að setja svo saxaðar möndlur yfir ísinn.

Minni svo aftur á facebook síðu bloggsins :-) Dísukökur

Vanillubúðingur

Það er alltaf jafn yndislegt þegar öll fjölskyldan er sameinuð hjá mér. Það getur verið flókið þar sem bóndinn vinnur á Grænlandi og elsti sonurinn býr á Húsavík. En þegar það gerist þá er það æði. Verst er það að flug til og frá Grænlandi er meira og minna upp á heppni þar sem oft er ófært vegna veðurs. Nú var það ekki rokið sem hélt bóndanum frá því að komast heim í einn og hálfan sólahring heldur þoka. Þessi bið er mér ótrúlega erfið þegar búið er að telja niður vikur, daga, klukkustundir og mínútur og börnin, já þeim finnst það ekki neitt gaman. 

Hinsvegar er alltaf gaman að fá pakka :) Börnin fá yfirleitt föt núna enda nóg af dóti til og ég fæ eitthvað sætt sem er ekki hægt að fá hér heima. Bóndinn og félagar hans hafa verið að vinna fyrir eina Grænlenska listakonu og fékk hann að gjöf styttur frá henni. Ekki var svo verra þegar hann keypti handa mér armhlífar prjónaðar úr Grænlenskri sauðnauts ull. Já sauðnauts ull. Mýkra ull hef ég ekki komist í kynni við og það besta, stingur ekki! Nú býð ég eftir að hann fari aftur út (jahh, svona næstum því) svo hann geti keypt handa mér meira af vörum frá þessari listakonu :) Reyndar þarf ég sjálf að fara koma mér út í helgarferð til Nuuk og skoða og kynnast því lífi sem maðurinn minn er búinn að byggja sér upp þar.

Inuk Design

Vanillubúðingur

 2 eggjarauður

1 msk sukrin melis

1/2-1 vanillustöng

1,5 dl rjómi

Rauður, sukrin melis, fræ úr vanillustöng þeytt saman.

Rjómi þeyttur.

Öllu blandað saman og sett inn í ísskáp í 30-60 mínútur.

Einfaldur, góður og seðjandi. Myndi segja að þessi sé fyrir2-4, eftir því hversu mikill græðgi ræður ferðinni ;)
Gott að setja fersk ber, berjamauk, chia sultu eða karamelluna héðan af blogginu á búðinginn.

Net carb í allri uppskriftinni er undir 5g.

Ætla að minna á facebook síðuna mína, Dísukökur, hægt að like-a hana og fylgjast með nýjum uppskriftum sem koma inn :) linkur hér fyrir neðan

Dísukökur

Jarðaberja chia ís

Eins og ég skrifaði um daginn, fall er fararheill og ég held mig við það. Þrátt fyrir að þjást og sofa illa vegna verkja þá varð ég heppinn í vikunni þar sem ég vann 50 þúsund kr gjafabréf í Smáralindina! Ég, sem aldrei vinn neitt! Fyrsta sem ég hugsaði var SKÓR! Vantar skó, en vantar þá kannski ekki, frekar langar í. Svo ég hugsaði aðeins meir og jú. Það eru að koma jól, og mig er búið að langa hrikalega mikið í George Jensen kertastjaka úr gulli til að nota sem aðventukrans og svo auðvitað er nýr jólaóri frá sama framleiðanda komin. Svo ég ætla fljótlega að gera mér leið í Smáralindina og kaupa mér þetta tvennt. Valkvíðinn heldur svo áfram með restina af gjafakortinu en ætli börnin fái ekki eitthvað dekur frá móður sinni.

Ég ákvað í fyrradag að opna like síðu á facebook vegna fyrirspurnar og ég er eiginlega bara orðlaus yfir viðtökunum! Yfir 1000 like og talan hækkar örlítið með hverjum degi. Það er virkilega gaman að sjá áhuga hjá fólki yfir því sem ég er að gera. Takk fyrir segi ég nú bara! 

https://www.facebook.com/disukokur?ref=hl

En nóg um það. Jarðaberja chia ís var ég búin að nefna og veit að það er beðið eftir þessari uppskrift. Eftir að ég keypti chia fræin var ég ekki viss hvað ég ætti að nota þau í en svo eftir að hafa skoðað netið sá ég að möguleikarnir eru endalausir og að setja hann í ís í stað eggja er snilld! Veit að ísgerð getur verið erfið fyrir þá sem eru með eggjaofnæmi en hér er komin lausn. Og ekki nóg með það, þá gera chia fræin ísinn chruncy í áferð eins og það séu hnetur í honum og ekki finnst mér það verra.

Jarðaberja Chia ís

1 bolli jarðaber

350 ml rjómi

chia 3 msk

vatn 10 msk

sukrin melis 1/2 bolli

Chia fræin eru sett í vatn og látin liggja í ca 30 mín.

Chia fræin eru sett í skál og maukuð smá með töfrasprota.

Öllu hráefninu blandað saman og maukað þar til sættanleg áferð fyrir hvern og einn er komin.

Sett í frysti í nokkra klt. Gott að hræra í ísnum nokkrum sinnum.

Hægt er að borða ísinn strax eftir maukun og hafa sem búðing.

Að nota chia fræ í stað eggja

1 msk chia fræ + 60 ml vatn/mjólk og látið liggja í 5 mínútur = 1 EGG

Kladdkaka með þeyttum rjóma

Þú finnur varla neitt sem er meira sænskt en kladdköku. Kladdkaka er súkkulaði kaka sem er ekki alveg bökuð, mjúk og æðisleg með rjóma :) Ég bjó sem krakki í Svíþjóð og er með sterk tengsl þangað og því er stundum sett í eina kladdköku. Dagurinn í dag var því tilvalin fyrir eina kökugerð. Húsbóndinn stakk enn eina ferðina af til Grænlands og börnin því pínu leið, en góð súkkulaði kaka getur dreyft huganum og glatt þau í smá stund :) Þessi er LKL væn, algjör súkkulaðibomba og bragðgóð. Eins og með flest LKL bakkelsi þá er ein sneið meira en nóg. Best er að borða þessa kalda með þeyttum rjóma og jafnvel fá sér nokkur jarðaber með. Gott er að gera þessa deginum fyrr því hún er enn betri næsta dag :-)

Kladdkaka

100 g smjör

100 g súkkúlaði (70% eða yfir)

2 egg

1 dl rjómi

3 msk sukrin

1 msk sukrin melis

1-2 msk kakó

1 tsk vanilludropar

Smjör og súkkulaði er sett í pott og brætt. Rjóma bætt við og blandað vel. Egg og sykur þeytt vel saman og blandað svo við súkkulaðið. Vanilludropar bætt við. Í restina er kakó bætt við. Best að smakka hversu mikið maður vill. Ef súkkulaðibragðið er of ramt (fer eftir hversu mörg % súkkulaðið er) er hægt að bæta örlítið af rjóma við eða smá sukrin.

Ofnin stilltur á 225g og kakan bökuð í 6-10 mín. Hún á að vera blaut í miðjunni. Best að leyfa kökunni að kólna því hún er betri köld.