Bláberja ostakaka

Þegar maður er nýbúin að tína dýrindis bláber úr náttúrunni er um að gera að útbúa eitthvað gott 

til að fá sér með kvöldkaffinu eða hvenær dags sem maður vill ;)

Botn

40g smjör

2dl möndlumjöl

2msk kókosmjöl

1msk Sukrin Gold (má sleppa)

1tsk kanil

Setjið smjör í pott og bræðið.

Bætið við hráefnunum og blandið vel saman

Setjið í 20cm springform og þjappið vel niður.

Gott er að bera smá smjör á botninn áður.

Bakið á 175 gráðum í 6-8 mínútur og látið svo kólna

Fylling

2 egg

120g bláber

1msk sítrónusafi

1tsk vanillu extract

120g rjómaostur

1msk Sukrin Melis

Þeytið egg og rjómaost vel saman.

Bætið við restinni af hráefnunum og þeytið vel.

Setjið á botninn á kökunni og bakið neðarlega í ofninum

í 30-35 mínútur eða þar til kakan er orðin föst í sér.

Svartbauna brownies

Vikan hálfnuð og styttist því í helgina. Aftur!

Ég reyndar sit núna í sófanum með fætur upp á skemli og passa að hreyfa ekki hægri fótinn of mikið.

Ég er snillingur þegar kemur að því að meiða mig.

Ég einhvern vegin náði að togna á vöðva (held allavega að það sé tognun, fer til doksa á eftir) á meðan ég sat í sófanum í gærkvöldi að horfa á fréttir. Stóð upp og gat ekki stigið í fótinn.

Var svo viss um að þetta myndi lagast í nótt en neibb, kona var eins og 100 ára og bað börnin að aðstoða sig að ná í hluti sem voru á gólfinu eða neðarlega í skúffum.

Ég er því heppinn að eiga þessar brownies í frystinum og geta fengið mér með rjóma.

Þegar þær koma heitar úr ofninum eru þær svoooo góðar og mjúkar. Þær eru ekkert verri kaldar og smakkast þá vel með rjóma og ferskum berjum.

Það er örugglega einhverjir sem gretta sig þegar þeir sjá orðið svartbaunir sett við hliðin á brownies en ég lofa, þetta virkar!

Reyndar er deigið svo gott og þykkt að það er alveg hægt að sleppa því að baka það og bera fram sem súkkulaðimús.

Svarbauna brownies.

1 dós svartar baunir

3 meðal stór egg

5 msk kókosolía (var með bragðlausa)

150g Sukrin Gold

55g ósykrað kakó

1,5tsk vanillu essence eða dropar

1/2tsk vínsteinslyftiduft eða glútenlaust lyftiduft

100g saxað sykurlaust súkkulaði (valfrjálst)
Ef þið viljið glúten og sykurlaust súkkulaði mæli ég með IQ súkkulaðinu.

Sigtið bauninar og skolið vel.

Setjið í blandara ásamt eggjum og blandið vel saman. Bætið við restinni af hráefnunum (fyrir utan súkkulaði) og blandið vel. 

Saxið súkkulaði niður og bætið út í og blandið með sleif.

Setjið bökunarpappír í eldfast mót, mitt var 20x28 cm og setjið deigið í.

Smyrjið því jafnt út og bakið á 180 gráður í 30-35 mínútur.

Innbökuð súkkulaðiplata

Kona var í miklu baksturstuði um helgina. Ég er enn í miklu baksturstuði en áður en ég baka meira þá er kannski best að setja inn uppskriftirnar af því sem er nú þegar búið er að mynda.

Innbökuð súkkulaðiplata, hljómar vel ekki satt?

Smakkaðist ekki verra, nýbakað og volgt og með bráðnu súkkulaði inn í. Namm!

Uppskrift.

150g rifin Mozzarella ostur

1 egg 

5msk Sukrin Gold

1msk Hnetumjöl frá Funktjonell

Bræðið ostin í potti á miðlungshita og passið að hræra vel í á meðan með sleif.

Þegar osturinn er bráðnaður takið af hellunni og bætið við eggi, mjöli og Sukrin Gold og blandið vel saman.

Það er smá þolinmæðisvinna að blanda þessu saman við ostin og gott að setja pottinn yfir heitu helluna til að hita ostin smá til að geta blandað öllu vel saman.

Rúllið út deiginu á milli tveggja bökunarpappírs arka

Setjið súkkulaðiplötuna í miðjuna.

Skerið með pizzuskera eða hníf með fram súkkulaðinu eins og á myndinni.

Fléttið deiginu saman utan um súkkulaðið.

Pennslið með pískuðu eggi og stráið heslihnetuflögum yfir.

Bakið á 200 gráðum í ca 15-18 mín eða þar til gyllt.

Borðið heitt/volgt ;)

Eplakaka

Tíminn þýtur áfram eins og vanalega og allir komnir í sína rútinu eins og hún á að vera.

Langar að nefna það að og biðja fólk að gera verðsamanburð þegar það t.d. kaupir gler í gleraugu fyrir sig eða börnin.

Nú á ég tvö börn sem þurfa gleraugu og þarf að skipta um gler hjá þeim 1-2x á ári og þau eru með mikla fjarsýni auk þess að annað er með sjónskekkju og hitt þarf tvö missterk gler fyrir sitthvort augað.

Ég byrjaði á að fara í þá búð sem er næst okkur og kíktum á umgjarðir þar sem boðið var upp á fría umgjörð með glerinu. Leist vel á það og fyrir strákinn hljómaði glerið upp á 25.000kr. Ok svo sem allt í lagi en ég dó næstum þegar sagt var við mig að glerin fyrir stelpuna væru á 49.000kr. Ehh já bara. Ehhm heyrðu ég ætla aðeins að skoða þetta takk og bakkaði varlega út áður en ég hljóp eins og fætur togaði í burtu, svitnandi við tilhugsunina að borga 75.000kr fyrir ný gler fyrir krakkana.

Ég hringdi svo í Augastað í Mjóddinni og þar kostaði fyrir stelpuna glerin 14.000kr! Vá engin smá munur! Glerið fyrir strákinn munaði ekki miklu eða 22.000kr sem skiptir samt máli. Svo ég fékk fríar umgjarðir þar einnig og borgaði 36.000kr fyrir þau bæði, sem nær ekki einu sinni verðinu á bara hennar gleri!

En ok, búin að pústa þessu úr mér og komið að því að tala um köku, eplaköku. Það er algjört möst að eiga alltaf að minnsta kosti einn pakka af kökumixi frá Funksjonell upp í skáp þegar ég vil baka eitthvað fljótlegt en ótrúlega gott. Í dag ákvað ég að skella í eplaköku, þar sem eplin sem voru til í kælinum voru að koma á síðasta snúning.

Ég breytti aðeins og gerði 20cm köku sem passar fullkomlega á nýja sæta kökudiskinn minn sem ég fékk í Rúmfatalagernum á 1290kr minnir mig. Finnst best að baka þessa stærð af kökum en hundleiðinlegt að vera með of stóran kökudisk.

Eplakaka

1/2 pakki af kökumixi frá Funksjonell (ca 180g)

50g brætt smjör

2 stór egg

1dl AB mjólk

1epli

2msk Sukrin Gold

1msk Kanil

Blandið öllu saman í skál  (ekki epli, sukrin og kanil) og blandið vel saman. Ég lét Hrímu mína (kitchenaid vélin mín) sjá um þetta fyrir mig á meðan ég skar niður eplið. Afhýðið eplið og skerið í sneiðar.

Setjið deigið í 20cm silikonform og dreifið vel úr. Setjið eplasneiðar yfir kökuna svo þau hylja hana alla.

Stráið yfir kanil og sukrin gold og bakið svo á 175 gráður í ca 30-40 mínútur eða þar til gaffall kemur hreinn úr kökunni þegar stungið er í hana miðja.

Færið yfir á kökudisk og stingið þó nokkur göt á kökuna og dreyfið yfir hana Fibersirup Gold.

Amerískar pönnukökur

Enn og aftur komin ný vika. Tíminn þýtur frá manni. Áður en maður veit af verða komin jólaljós út um allt og jólalög í útvarpið. Ég bíð mjög spennt eftir því. Þarf kannski ekki að taka fram að ég er búin að kveikja á ljósunum í stofuglugganum enda meira skammdegisljós en jólaljós.

En áður en ég fer að lofa jólunum þá er nú búið að vera yndislegt veður síðan ég byrjaði að vinna og krakkarnir í skólanum. Það er ótrúlega skrítið að eiga ekki lengur leikskólabarn. Litla barnið byrjað í skóla. Eins og ég sagði, tíminni þýtur frá manni.

En á meðan tíminn er að þjóta þá er gott að gefa sér tíma til að njóta með þeim sem maður elskar.

Þessi uppskrift er fullkomið að gera þegar tími gefst og njóta með ástvinum. Ekki verra að eiga Fibersirup Gold og hella yfir þær. Það er eiginlega punkturinn yfir i-ið.

Amerískar pönnukökur

4 egg

4msk Sukrin Gold

4msk kókoshveiti

1,5dl mjólk af eigin vali (möndlu, létt, nýmjólk)

1msk vanilludropar eða vanilla extract

1/2tsk Xhantan gum

Þeytið egginn vel og bætið svo Sukrin Gold við og hrærið ögn lengur. Bætið við restinni af hráefnunum og blandið vel. Látið standa í 5 mínútur þar til farið að þykkjast. Hitið pönnukökupönnu vel og stillið svo á meðal hita og bræðið smjör og bakið litlar pönnukökur. Gott að bera fram með jarðarberjum og Fibersirup Gold.

Kínóa og chia stangir

Sunnudagar eru orðnir hálfgerðir bökunardagar hjá mér. Reyni að nýta daginn til að útbúa nesti fyrir vikuna fyrir mig og krakkana. Mamman verður að útbúa chia graut fyrir strákinn til að taka með í skólann og svo er búið að bætast við prótein stangir sem ég hef verið að gera.

Í gær prófaði ég svo að gera kínóa og chia stangir. 

Kínóa er stútfullt af næringu svo sem prótín, kalki, járni, sinki, B-vítamíni og líkaminn nýtir næringuna úr korninu einstaklega vel. Gott er að næla sér í prótín úr fjölbreyttum fæðutegundum og þá er kínóa tilvalið en það inniheldur 12-18% prótín og allar níu nauðsynlegu amínósýrurnar sem líkaminn þarfnast. Einnig er kínóa glúteinlaust og hentar því þeim sem eru með glúteinóþol. Hægt er að matreiða það á margan hátt, sem graut, í súpur, pottrétti og salat svo eitthvað sé nefnt. Mikilvægt er að skola kínóað vel til að hreinsa burt efni sem er kallast saponin og er utan á korninu og gerir það biturt á bragðið. Einnig er hægt að leggja kínóa í bleyti yfir nótt og verður það þá auðmeltara og næringarefnin nýtast enn betur. (fengið af síðunni ibn.is)

Chia fræin eru ekki minna merkileg en kínóa og eru stútfull af næringu einnig.

Chia fræin er mjög próteinrík og innihalda allt að 30 gr af próteini í hverjum 100 gr sem er meira en er að finna í kjúklingabringu eða lambalæri! Það eru því tilvalið að bæta þeim út í orkudrykki , brauð og grauta til að auka próteininnihald máltíðarinnar.

Chia fræin eru einnig mjög rík af lífsnauðsynlegum omega 3 og omega 6 fitusýrum. Þau eru ríkasta uppspretta omega 3 sem völ er á í jurtaríkinu og myndu því teljast sérlega  góð fyrir einstaklinga með bólgusjúkdóma, þar sem omega 3 myndar  bólgueiðandi efni í líkamanum.

Yfirleitt skemmast omega fitusýrur við eldun en í chia fræjunum virðast þær þó ekki skemmast, sökum þess að fitusýrurnar eru bundnar andoxunarríkum trefjum fræsins. Þó er enn betra að nota chia fræ í hráu formi.

Þessir litlu næringarrisar eru mjög ríkir af kalki, járni, magnesíum og fosfór og eru einnig stútfullir af trefjum.

Líkaminn þarf á andoxunarefnum að halda til að viðhalda eðlilegri íkamsstarfsemi og æskuljóma. Chia fræ eru mjög rík af andoxunarefnum og stuðla því að heilbrigði hverrar einustu frumu líkamans.

Chia fræin eru einstaklega blóðsykursjafnandi sökum hás innihalds  próteins, trefja og fitusýra og stuðla því að betra blóðsykursjafnvægi.

Þau geta allt að 12 faldað þyngd sína ef þau eru látin liggja í vatni í dálitla stund, þau bólgna út og eru mjög seðjandi og gefa góða seddutilfinningu. (fengið af síðunni heilsubankinn.is)

Kínóa fræin eru ekki beint lágkolvetna ef fólk er að halda sér í ketósu (undir 20g af kolvetnum á dag) en þeir sem leyfa sér meira af kolvetnum ættu ekki að missa af þessari uppskrift.

Kínóa og chia stangir

80g kínóa

80g chia fræ

3msk Sukrin Gold

70g haframjöl 

(glútenlaus haframjöl fyrir þá sem vilja)

50g hnetur saxaðar

100g möndlusmjör

90g Fibersirup Gold

salt klípa

1tsk kanil

Blandið þurrefnunum saman í skál.

Setjið möndlusmjör og Fibersirup Gold í pott og hitið.

Setjið möndlusmjör og sirup í skálina með þurrefnunum og blandið vel við.

Gætir þurft að nota hendurnar til að klára að blanda öllu saman.

Setjið deigið í form sem er um 20x20 á stærð sem búið er að setja bökunarpappír í.

Ég sjálf er búin að brjóta formið mitt og bjó til form úr álpappír og setti bökunarpappírinn ofan í og það virkaði vel.

Þjappið vel úr deiginu og látið vera eins jafnt og hægt er.

Bakið á 175 gráður í miðjum ofni í 8-12 mínútur, passið að brenna ekki.

Látið kólna í nokkrar mínútur og skerið svo niður í bita með pizzuskera og látið kólna alveg.

Setjið í box og geymið.

Haframjölskökur

Ný vara sem er að koma á markaðinn hér á landi sem ég er mjög spennt yfir er Fibersirup frá Funksjonell. Ég var svo heppin að fá sitthvora siróps flöskuna gefins og hef verið að prófa mig áfram í eldhúsinu með þessari snilld. (tek það fram að þetta er ekki kostuð auglýsing heldur eru þetta upplýsingar sem ég er búin að vera kynna mér sjálf eftir að hafa áskotnast þessar vörur)

Fibersirup clear og Fibersirup Gold er síróp sem inniheldur aðeins 5% sykur og er mjög trefjaríkt. Sykurstuðullinn er 35 sem er svipað og hunang og agave síróp en hinsvegar er samt sem áður mun minni sykur í þessari vöru. Það er hægt að lækka sykurstuðulinn með því að nota sírópið með fitu í uppskriftum.

Ekki skemmir fyrir að sírópið inniheldur vel af trefjum.

Þeir sem eru með sykursýki 2 þurfa kannski að prófa sig áfram með þessa vöru.

En það sem er með þessa vöru og þær sem ég nota sem skiptir mig máli er það að þetta er mun hollara en hunang eða agavesíróp, skemmir ekki tennurnar og er nokkuð lágt í sykurstuðlum og heldur því blóðsykrinum í góðu jafnvægi.

Fibersirup Gold hef ég t.d. notað út á skyrið, jógúrtið, pönnukökur, karamellu, búið til síróps epli með kökum og í bakstur. Tilraunir í að útbúa karamellu popp er í vinnslu ;)

Fibersirup Clear hef ég svo notað í bakstur og próteinstykki jafnvel.

Nú styttist líka í skólasetningu hjá börnunum og litla barnið að fara byrja í skóla (hvert fór tíminn???)

Því hef ég verið á fullu að útbúa ýmsar nestishugmyndir sem eru hollar og góðar fyrir þau til að taka með sér og mun fljótlega setja saman eina færslu með öllum þeim uppskriftum sem börnin mín mæla með og nota :)

Þessar kökur voru ómótstæðilegar. Ég stóð í eldhúsinu og gúffaði í mig. Þær henta ekki þeim sem eru á ströngu LKL vegna haframjölsins en þetta er frábært nesti eða millimál.

Einnig er hægt að leika sér með þessa uppskrift og setja hnetur, rúsinur, þurrkuð ber eða annað sem hugurinn girnist til að breyta til.

Haframjölskökur 8-10stk

70g glútenfrítt haframjöl (eða venjulegt ef þolir glúten)

70g smjör

50g Fibersirup Clear

30g Sukrin gold

30g kókosmjöl

rúsinur, hnetur, þurrkuð gojiber eða önnur sem ykkur/börnin langar út í.

Setjið allt í pott og hitið á miðlungshita og blandið vel saman. Ef þið viljið setja rúsinur, ber eða hnetur setjið það í lokin og blandið vel við. Setjið á bökunarpappír og formið kökur með skeið eða höndum. Bakið á 175 gráður í 7-10 mínútur eða þar til gylltar.

Látið kólna á bökunarpappírnum áður en þær eru teknar af. Eru mjúkar á meðan heitar en harðna er kólna.

Ávaxtaís Alexanders Gauta

Það er smá ísæði hjá okkur fjölskyldunni þessa daganna. Það er bara eitthvað við það að útbúa sinn eigin ís. Miðjubarnið er duglegt að útbúa sér boost núna í sumarfríinu og ákvað að prófa að henda því í ísform sem lukkaðist mjög vel. Þetta er hans uppskrift frá a-ö með smá hjálp frá mömmunni.

Snilld fyrir börnin til að fá sér bæði að drekka og sem ís.

Ávaxtaís Alexanders Gauta

1 banani

250g AB mjólk

2msk Sukrin Gold

150g frosin hindber (eða önnur ber)

Setjið allt í blandara og maukið vel. Setjið svo í ísform og í frystinn.

Svo fljótlegt og auðvelt að börnin geta sjálf búið þetta til ;)

Það má sleppa sukrin gold en hann verður pínu súr án sætunnar svo það er smekksatriði. Börnunum mínum fannst gott að fá smá sætu á móti.

Sesambollur

Stundum misheppnast það sem maður ætlaði að gera en útkoman verður samt þrusu góð.

Þessi uppskrift er ein af þeim. Þetta áttu að verða bollur en fékk einskonar skonsur úr ofninum.

Bragðið var samt æðislegt. Smyrja smjöri yfir og ost eða skinku og maður er komin með fínasta brauð ;) 

Sesamskonsur/bollur

2 egg

65g sesammjöl frá Funksjonell

20g kókoshveiti frá Funksjonell

20g husk

2msk chia fræ

2 tsk vínsteinslyftiduft

1dl rjómi

1 dl AB mjólk

1/2dl vatn

2msk möndlumjöl

2msk Sukrin Gold

1/2 tsk salt

Blandið saman þurrefnum í skál. Bætið við eggjum og hrærið vel saman. Í lokin er rjómi, AB mjólk og vatn bætt við. Látið standa í smástund.

Setjið vatn á hendurnar og útbúið bollur og setjið á bökunarpappír.

Bakið á 175 gráður í ca 20 mínútur eða þar til gyllt.

Hnetu og sítrónukökur

Það er búið að vera mikið fjör á heimilinu síðustu vikuna. Við erum að fóstra 3 litla kettlinga og mömmu þeirra. Kettlingarnir eru ca 4-5 vikna og bjuggu í Laugardalnum.

Það hefur gengið mjög vel með þá og eru þeir ótrúlegt krútt. Erum búin að nefna þau Mandla, Karl litli og Krummi. Batman okkar er svo farin að taka að sér pabba hlutverkið og passar upp á krílin ;)

Verst verður að gefa þá frá sér en vonandi fá þeir allir þrír gott heimili, þeir eiga það svo sannarlega skilið.

Strákarnir mínir eru búnir að vera duglegir að sjá um sig sjálfir í eldhúsinu, undir handleiðslu mömmunnar að sjálfsögðu. Kvöldmatur, hádegismatur og baksturs prófun hjá þeim. Þeim finnst mjög skemmtilegt að fá að prófa sig áfram í eldhúsinu og kunna að gera hlutina, hvort sem það er að steikja hamborgara eða búa sér til boost. Á meðan situr mamman við eldhúsið og leiðbeinir þeim ef þess þarf. Yfirleitt þessa daganna er ég með litabókina mína mér við hlið og lita. Það er eitthvað við það að lita sem róar mig niður. 

Í dag langaði strákunum að baka smákökur. Alexander vildi gera súkkulaðikökur en Sigurgeir langaði í sítrónukökur og bjó því til þessa uppskrift. Heppnaðist mjög vel hjá honum. Þetta eru nokkuð þurrar kökur sem eru gómsætar með kaffi eða kaldri mjólk ;)

Hnetu og sítrónukökur Sigurgeirs

3dl möndlumjöl

2msk hnetumjöl frá Funksjonell

1 egg

3msk Sukrin Gold

2msk rjómi eða kókosmjólk

börkur af 1 sítrónu

4 dropar sítrónu stevía  (má sleppa)

1tsk lyftiduft

1tsk vanilludropar

saxaðar salthnetur (má sleppa)

þurrefnum blandað saman og svo restinni. Blandað vel saman og gerðar litlar kúlur sem settar eru á bökunarpappír. Bakað í ofni í 8-10 mín á 175 gráður.

Súkkulaðikaka

Sá þessa uppskrift á Sukrin síðunni um daginn og varð að prófa. Ætlaði að baka hana um helgina en eins og svo margt þá varð ekkert úr því. 

Á morgun á minn yndislegi eiginmaður afmæli og verður fjarri okkur fjölskyldunni í vinnu á Grænlandi. Við krakkarnir ákváðum samt sem áður að halda upp á með stæl.

Kakan átti ekki að borðast fyrr en á morgun en það var mikið um tuð og læti svo ég ákvað að leyfa þeim að njóta hennar í sólinni :)

Þessi kaka er sjúklega góð. Algjör súkkulaðibomba!

Súkkulaði kaka

250g sykurlaust súkkulaði 

(ég notaði frá Valor)

250g smjör

4 egg

150g Sukrin Gold

4 dropar súkkulaði stevía

1msk vanillu extract eða dropar

2 tsk kaffi

Bræðið smjör og súkkulaði yfir vægum hita og hrærið þar til blandað saman.

Pískið eggin og bætið svo við Sukrin Gold og vanillu extract.

Bætið eggjunum við súkkulaðiblönduna og hrærið með sleif varlega saman.

Smyrjið 20 cm springform með olíu eða smjöri og setjið deigið í. 

Bakið í ofni sem er 175 gráður í 50-60 mínútur.

Ég reyndar klikkaði oggulítið og setti 300g af súkkulaði í mína en hún heppnaðist mjög vel. Var aðeins blaut í miðjunni en okkur finnst það ekkert verra.

Þeytti svo rjóma með toffee caramel stevíu og bar fram með ásamt jarðarberjum.

Brauðbollur

Það sem hefur vantað í mataræðið hjá mér eru góðar morgunverðarbollur.  Ég útbý stundum úr brauðmixinu frá Funksjonell  en maður á það ekki alltaf til.

Þessa uppskrift sá ég á FB fyrir löngu löngu síðan og ætlaði alltaf að prófa. Ég man engan vegin hvar ég fann hana en ef einhver kannast við hana (man að þetta var íslensk uppskrift) má endilega láta mig vita hver á hana svo ég get sett það inn sem heimild :)

En ég lét loks verða úr því í dag að prófa uppskriftina.

Breytti henni ogguponsu en vá hún er ótrúlega góð. 

Vel af smjöri og góð ostsneið og þetta er gúrmé.

Ég útbjó litlar bollur og fékk um 10stk. Ein lítil bolla mettar mig svo ég ætla að geyma þær í frystinum og næla mér í eina og eina.

Brauðbollur 8-10stk

2 egg

1dl kókoshveiti (ég nota frá Funksjonell)

1/2dl HUSK

2msk chia fræ

2tsk vínsteinslyftiduft

1dl rjómi (eða þykki hlutinn af kókosmjólk)

1dl grísk jógúrt

1/2dl vatn

2msk möndlumjöl

2msk Sukrin Gold

1/2tsk salt

Þurrefni sett í skál og blandað vel saman. Eggjum svo bætt við og hrærið vel.

Rjómi, grísk jógúrt og vatn sett í pott og látið ná suðu og bætt þá við í skálina. Blandið vel saman og látið svo standa í 10-15 mínútur. 

Búið til bollur með höndunum. Gott er að vera með blautar hendur svo deigið festist ekki við þær.

Stráið yfir bollurnar chiafræjum ef þið viljið og bakið svo á 175 gráðum í ca 30 mínútur.

Hnetusmjörs gotterí

Páskarnir búnir, ljúft. Já ég elska að komast í rútínu aftur.

Við vorum bara þrjú í kotinu þetta árið þar sem strákarnir voru hjá pabba sínum á Akureyri.

Þar var víst bongóblíða og miðjan mín kom heim í gær og var greinilega að safna freknum á Akureyri.

Við hjónin fórum í hjólatúr með yngsta á meðan og kíktum í Húsdýragarðinn á milli þess að vera í náttfötunum og hafa kósý.

Við fengum öll súkkulaði egg. Ég fékk mér sjálf hvítt súkkulaðiegg.

Allir voða spenntir fyrir páskunum og svo kom dagurinn. Við leituðum af eggjunum, settumst niður og fengum okkur smá bita og svo bara búið. Því eigum við hér 3 næstum óétin páskaegg.

Á næsta ári ætla ég ekki að kaupa mér egg. Ég datt aðeins út af sporinu um páskana og fékk mér ýmislegt sem ég hef ekki látið eftir mér lengi. Sé svo eftir því. Hef verið laus við gigtarverki allt þetta ár og svo núna, blehh já ég ætla víst aldrei að læra þetta.

En hér er uppskrift sem ég slumpaði saman um daginn.

Átti þetta heillengi í frystinum. Gleymdi þessu þar.

Elsta barnið var ekki lengi að þefa þetta upp og kláraðist svo samdægurs.

En þetta er æði til að fá sér smá bita þegar manni vantar smá til að narta í. Gott er að skera nammið í litla bita og geyma í frystinum eða ef þið eruð viss um að þetta verði ekki til lengur en í 2 daga þá er hægt að geyma í kælinum og rífa klípu af og fá sér.

Hnetusmjörs gotterí

100g hnetusmjör t.d H-Berg

1msk sukrin gold

15g smjör

1-2msk rjómi eða kókosmjólk

75g salthnetur

1-2 dropar toffee stevía frá now

Setjið í pott og hitið á vægum hita. Hrærið í og blandið vel saman og setjið svo í silikonform eða form sem er með bökunarpappír á og í frysti í ca 30 mínútur.

Skerið í bita og geymið í frysti.

Súkkulaði karamella

Hér á heimili er karamellu gerð reglulega. Þó aðallega þegar elsta krúttið mitt kemur í mömmuhelgar.

Hann elskar karamellunar mínar og finnst gott að geta nælt sér í einn og einn bita inn í kæli.

En vandamálið er einmitt það, kælirinn.

Þær þurfa að vera í kælinum annars bráðna þær.

Svo það hefur verið smá hausverkur hvernig get ég gert þær án þess að þurfa að geyma þær í kæli.

Já þá þarf maður aðeins að hugsa og þá þarf maður líka oft á internetinu að halda.

Og eftir smá skoðun sá ég að xhantan gum væri sniðugt. Auðvitað en ekki hvað! 

Svo varð ég líka að prófa nýjung sem er að koma á markaðinn hér á Íslandi og ég er búin að bíða spennt eftir. Sukrin:1

Sukrin:1 er sæta sem er jafn sætur og sykur og er blanda af erytrhiol og stevíu.

Sumir hafa kvartað undan köldu eftirbragði sem getur komið af erythiol en hann er ekki að finna á þessari vöru. Mitt nýja uppáhald :)

Súkkulaði karamella

3dl rjómi

65g smjör

5msk Sukrin:1 (eða 5msk sukrin og nokkrir stevíu dropar)

2msk Sukrin Gold

2.5msk ósykrað kakó

1tsk vanillu extract eða dropar

salt klípa

1/2tsk xhantan gum

Setjið rjóma, smjör, sætu, vanillu dropa og kakó í pott og hrærið í á meðan hitnar.

Þegar byrjar að sjóða að hræra reglulega í svo ekki brenni við.

Látið malla í ca 15-20 mínútur.

Takið af hitanum og setji smá salt og xhantan gum í pottinn og pískið vel við karamelluna.

Setjið bökunarpappír í lítið eldfastmót sem þolir frysti eða notið silikonform og setjið karamelluna í.

Geymið í frysti í ca klukkustund.

Takið úr frysti og skerið niður í bita.

Ef ykkur langar er hægt að klippa bökunarpappír niður og pakka karamellunum inn.

Má geyma á borðinu en mæli samt með að geyma í kæli svo þær endist lengur.

Skyrterta með bláberjasósu

Þessi er tilvalin fyrir helgina. Dóttir mín bíður alltaf spennt eftir að mamma búi til skyr eða ostatertur.

Yngri sonurinn vill bara fá Baby Ruth/Dísuköku og já sá elsti vill hnetusmjörskökurnar.

Það er nöldrað vikulega hvenær ég ætli að baka allt af þessu aftur og eina loforðið sem mamman gefur er að þegar þau eiga afmæli mun mamma baka uppáhaldið þeirra.

Skyrterta með bláberjum

Botn:

100g smjör

120g möndlumjöl

1msk kanill

3msk sukrin gold

Setjið smjörið í pott og bræðið það. Bætið við restinni af hráefninu og blandið vel saman. 

Smyrjið lítið eldfast mót með smjöri á botninn og aðeins upp með hliðunum. 

Þjappið kökubotninum vel í eldfasta mótið og bakið á 170 gráðum í um 10 mínútur eða þar til gyllt. Látið kólna.

Ef þið viljið ekki þurran botn geti þið sleppt því að baka botninn :)

Fylling:

Stór dós vanillu skyr.is

1/2l rjómi

50g sykurlaust Valor súkkulaði (má sleppa)

Þeytið rjómann. Bætið skyrinu við og blandið vel saman. 

Grófsaxið súkkulaðið og bætið við skyrblönduna. 

Setjið yfir botninn og kælið.

Bláberjasósa:

150g bláber

1msk vatn

4tsk sukrin

Setjið bláber ásamt vatni og sukrin í pott og stillið á meðalhita. 

Hrærið í reglulega. 

Maukið bláberin með töfrasprota til að útbúa sósu. 

Látið kólna áður en dreift er yfir skyrtertuna.

Skreytið með súkkulaðibitum og bláberjum.

Súkkulaðibita kökur

Eftir að hafa verið nokkuð andlaus í eldhúsinu síðustu vikur þá kom andinn yfir mig í dag. Allt í einu hafði ég þörf að skoða uppskriftir og búa til og baka og ég get ekki beðið eftir að halda því áfram á morgun með dóttur minni en eins og er erum við bara tvær komnar í sumarfrí.  Í kvöld skelltum við í hrikalega góðar súkkulaðibita kökur sem renna ljúft niður með mjólkurglasi. Þær eru með stökkum hring utan um sig en mjúkar í miðjunni. Ég ætlaði nú að hafa Maccademíu hnetur í kökunum til að hafa þær fullkomnar en fattaði svo að hneturnar eru komnar út í fellihýsi og eftir að hafa íhugað að opna hýsið bara fyrir hneturnar ákvað ég að sleppa því. Súkkulaðið sem ég keypti var frá DeBron og var með eitt dökkt súkkulaði og svo hvítt súkkulaði með núggatfyllingu. Þið getið notað annað súkkulaði sem ykkur líkar við en ég verð að játa að ég er sucker fyrir hvítu súkkulaði og núggati og það var himneskt að bíta í kökurnar og fá bita af því með.

Súkkulaðibita kökur

65g möndlumjöl helst ljóst

20g kókoshveiti

110g smjör við stofuhita

1/2tsk lyftiduft eða vínsteinslyftiduft

100g sukrin gold

6-8 dropar bragðlaus stevía

1 egg

1/4tsk salt

2tsk kanill

1stk debron súkkulaði eða 50g af öðru sykurlausu súkkulaði

1stk debron hvítt núggatfyllt súkkulaði 

Maccademíuhnetur ef þið viljið

Smjör, stevía og sukrin gold þeytt vel saman í ca 5 mínútur þar til fluffy. Í aðra skál, setjið þurrefnin og blandið saman. Bætið þurrefnum við smjörið og blandið vel. Bætið við eggi og blandið vel. Útbúið litlar kúlur og setjið á bökunarpappír og þrýstið þær smá niður. Hafið gott bil á milli þar sem kökurnar stækka vel í ofninum. Bakið á 175 gráður í 8-10 mínútur eða þar til gullinbrúnar. Látið kólna áður en fjarlægðar af bökunarpappíri.

Lakkrís fudge

Ég er karamellu fíkill en kannski meiri lakkrís fíkill og er ánægð að vera ekki með of háan blóðþrýsting sem stoppar af lakkrísát. Reyndar stoppar sykurlaust fæði það af þó maður fær sér einstaka sinnum. Reyndar get ég ekki stoppað að fá mér ef í boði er lakkrís. Ég ákvað því að prófa að gera lakkrís karamellu og þær heppnuðust bara nokkuð vel þó ég segi sjálf frá. Þessi uppskrift er lítil en auðvelt er að tvöfalda hana.

Lakkrís fudge

1 dl rjómi

20g sukrin gold

5g Walden farms pönnuköku sýróp

um 2g af Anís kryddi, smakkið til

2-3 dropar af Anís bragðefni, keypti mitt í allt í köku

5g smjör

Setjið allt saman í skál sem þolir örbylgju og blandið vel saman. Setjið á hæðsta í örbylgju og látið á 2 mínútur. Takið út og hrærið aðeins í. Stillið örbylgjuofninn aftur á 2 mínútur. Fylgist með. Karamellan er tilbúin þegar hún er orðin þykk. (Getur tekið mislangan tíma eftir ofnum).  Setjið í form og í kæli og leyfið að standa þar í 1-2 tíma. Skerið í bita og geymið í kæli.