Hnetusmjörs gotterí

Páskarnir búnir, ljúft. Já ég elska að komast í rútínu aftur.

Við vorum bara þrjú í kotinu þetta árið þar sem strákarnir voru hjá pabba sínum á Akureyri.

Þar var víst bongóblíða og miðjan mín kom heim í gær og var greinilega að safna freknum á Akureyri.

Við hjónin fórum í hjólatúr með yngsta á meðan og kíktum í Húsdýragarðinn á milli þess að vera í náttfötunum og hafa kósý.

Við fengum öll súkkulaði egg. Ég fékk mér sjálf hvítt súkkulaðiegg.

Allir voða spenntir fyrir páskunum og svo kom dagurinn. Við leituðum af eggjunum, settumst niður og fengum okkur smá bita og svo bara búið. Því eigum við hér 3 næstum óétin páskaegg.

Á næsta ári ætla ég ekki að kaupa mér egg. Ég datt aðeins út af sporinu um páskana og fékk mér ýmislegt sem ég hef ekki látið eftir mér lengi. Sé svo eftir því. Hef verið laus við gigtarverki allt þetta ár og svo núna, blehh já ég ætla víst aldrei að læra þetta.

En hér er uppskrift sem ég slumpaði saman um daginn.

Átti þetta heillengi í frystinum. Gleymdi þessu þar.

Elsta barnið var ekki lengi að þefa þetta upp og kláraðist svo samdægurs.

En þetta er æði til að fá sér smá bita þegar manni vantar smá til að narta í. Gott er að skera nammið í litla bita og geyma í frystinum eða ef þið eruð viss um að þetta verði ekki til lengur en í 2 daga þá er hægt að geyma í kælinum og rífa klípu af og fá sér.

Hnetusmjörs gotterí

100g hnetusmjör t.d H-Berg

1msk sukrin gold

15g smjör

1-2msk rjómi eða kókosmjólk

75g salthnetur

1-2 dropar toffee stevía frá now

Setjið í pott og hitið á vægum hita. Hrærið í og blandið vel saman og setjið svo í silikonform eða form sem er með bökunarpappír á og í frysti í ca 30 mínútur.

Skerið í bita og geymið í frysti.

Sykurlaust Nutella

Eins og með svo margt þá er Nutella eitt af því sem ég get borðað alla daga ársins. Hinsvegar er það stútfullt af sykri og já maður fær mikið samviskubit þegar maður borðar það beint upp úr krukkunni. Það eru líka þúsund og ein eða tvær uppskriftir sem eru djúsí og innihalda Nutella sem væri gaman að gera sykurlaust.

Í kvöld ákvað ég hinsvegar að prófa að gera sykurlausa uppskrift af þessari dásemd. Internetið er guðsgjöf og pinterest líka. Þar skoðaði ég helling af uppskriftum og ákvað svo að setja saman mína eigin.

Nutella

1 bolli heslihnetur (var aðeins meira en 100g)

250ml möndlumjólk

60g sukrin melis

50g ósykrað kakó

ca 10 dropar vanillu stevía frá Via-Health

salt klípa

Byrjið á því að rista hneturnar í ofni sem er 180 gráður í ca 5-7 mínútur. Passið að þær brenni ekki.

Látið þær kólna og nuddið skinninu eins mikið af þeim og hægt er.

Setjið hneturnar í matvinnsluvél eða blandara og maukið hneturnar eins og hægt er. Ég byrjaði á að setja mínar í matvinnsuvélina og færði þær svo yfir í blandarann. 

Setjið hnetur, möndlumjólk og stevíu í blandarann og blandið vel.

Bætið við sukrin melis, kakói og salt klípu. Byrjið á að setja minna frekar en meira af sukrin melis og kakói og smakkið til hve mikið þið viljið.

Setjið í krukku og inn í kæli. Þessi uppskrift dugaði í eina miðlungsstóra krukku hjá mér.

Börnin eru að elska þetta og fá sér á rista brauð. Ég er að blanda mér sjúklega góðan shake með nutellanu og er með trilljón hugmyndir til að útfæra.

Möndlumjólk

Fyndið hvað bloggstuð kemur og fer hjá mér. Stundum fæ ég mig ekki til að setjast niður og setja uppskriftir á bloggið í lengri tíma og stundum gæti ég sett uppskriftir inn á klt fresti.

Nú er hafin meistaramánuður. Ég er meistari að setja mér allskonar markmið og áramótaheit sem ég næ aldrei að standast svo ég verð líklega ein af fáum sem tek ekki þátt. Hinsvegar ætla ég að halda áfram að gera það sem ég hef mest gaman af, að standa inn í eldhúsi að prófa mig áfram og blogga um það :)

Ég er búin að vera á leiðinni að prófa að búa til möndlumjólk. Aldrei hefði mér dottið í hug að ég myndi vilja smakka og hvað þá búa til möndlumjólk en svona kemur lífið skemmtilega á óvart. Ég er búin að taka Chia fræjum ástfóstri og núna vil ég fá chia búðing á hverjum degi. Hinsvegar er búið að vanta smá tilbreytingu og þá kemur möndlumjólkin sterk inn.

Möndlumjólk

1 bolli möndlur

4 bollar vatn

2 msk sukrin

1/2 tsk vanilludropar

oggulítið af salti

Möndlur settar í skál og vatn látið ná yfir þær allar. Látið liggja yfir nótt. Vatn af möndlunum sett í blandara eða skál og bætt við það sem vantar upp á þessa 4 bolla af vatni. Möndlur settar með og blandað vel í nokkrar mínútur í blandara eða með töfrasprota. Sigta frá möndluhratið í sigti, setja það svo í viskustykki og vinda vel til að ná öllum dropunum af möndlumjólkinni. Geymist í ísskápnum í tvo til þrá daga :)

Jarðaberja chia ís

Eins og ég skrifaði um daginn, fall er fararheill og ég held mig við það. Þrátt fyrir að þjást og sofa illa vegna verkja þá varð ég heppinn í vikunni þar sem ég vann 50 þúsund kr gjafabréf í Smáralindina! Ég, sem aldrei vinn neitt! Fyrsta sem ég hugsaði var SKÓR! Vantar skó, en vantar þá kannski ekki, frekar langar í. Svo ég hugsaði aðeins meir og jú. Það eru að koma jól, og mig er búið að langa hrikalega mikið í George Jensen kertastjaka úr gulli til að nota sem aðventukrans og svo auðvitað er nýr jólaóri frá sama framleiðanda komin. Svo ég ætla fljótlega að gera mér leið í Smáralindina og kaupa mér þetta tvennt. Valkvíðinn heldur svo áfram með restina af gjafakortinu en ætli börnin fái ekki eitthvað dekur frá móður sinni.

Ég ákvað í fyrradag að opna like síðu á facebook vegna fyrirspurnar og ég er eiginlega bara orðlaus yfir viðtökunum! Yfir 1000 like og talan hækkar örlítið með hverjum degi. Það er virkilega gaman að sjá áhuga hjá fólki yfir því sem ég er að gera. Takk fyrir segi ég nú bara! 

https://www.facebook.com/disukokur?ref=hl

En nóg um það. Jarðaberja chia ís var ég búin að nefna og veit að það er beðið eftir þessari uppskrift. Eftir að ég keypti chia fræin var ég ekki viss hvað ég ætti að nota þau í en svo eftir að hafa skoðað netið sá ég að möguleikarnir eru endalausir og að setja hann í ís í stað eggja er snilld! Veit að ísgerð getur verið erfið fyrir þá sem eru með eggjaofnæmi en hér er komin lausn. Og ekki nóg með það, þá gera chia fræin ísinn chruncy í áferð eins og það séu hnetur í honum og ekki finnst mér það verra.

Jarðaberja Chia ís

1 bolli jarðaber

350 ml rjómi

chia 3 msk

vatn 10 msk

sukrin melis 1/2 bolli

Chia fræin eru sett í vatn og látin liggja í ca 30 mín.

Chia fræin eru sett í skál og maukuð smá með töfrasprota.

Öllu hráefninu blandað saman og maukað þar til sættanleg áferð fyrir hvern og einn er komin.

Sett í frysti í nokkra klt. Gott að hræra í ísnum nokkrum sinnum.

Hægt er að borða ísinn strax eftir maukun og hafa sem búðing.

Að nota chia fræ í stað eggja

1 msk chia fræ + 60 ml vatn/mjólk og látið liggja í 5 mínútur = 1 EGG

Jógúrt búðingur

Fall er fararheill er stundum sagt. Já ég vona. Ég get verið óttalegur klaufi og var það í vikunni þegar ég náði að detta í tröppunum heima og hálf skemma á mér bakið. Þá er ekki hægt að standa lengi í eldhúsinu og dúlla sér. Ég var samt búin að lofa einhverju góðu gúmmelaði með sjónvarpinu í kvöld og hvað á að taka til bragðs? Jú ég átti sykurlaust jarðaberja jello og ákvað að kaupa grískt jógúrt og gera búðing fyrir börnin. Þetta tók mig innan við tíu mínútur.

Þó jello-ið sé sykurlaust er allskonar efni í því og er ég ekki neitt rosa hrifin af því frá hollustu hliðinni en stundum, já stundum þá lætur maður það duga og útkoman var bara ljómandi góð satt að segja og fínt að nota hana einstaka sinnum.

Jógúrt búðingur

1 pakki sykurlaus jello

1 dolla grísk jógúrt

2 tsk vanilludropar

Jógúrt og vanilludropar blandað saman vel í skál. Jello bætt út í og hrært í vatnsbaði þar til jello sykurinn er alveg uppleystur. Sett í muffinsform og inn í ísskáp í 30-60 mín.

Gott að bera fram með smá þeyttum rjóma.