Pestó bollur

Jibbý! Búin að skila af mér blessuðu uppskriftum og myndum fyrir bókina mína. Þetta var farið að taka á, hvað þá þegar tölvan mín ákvað að drepast og eyða öllu sem var á henni. Úff það tók á skapið. Var stödd í Stykkishólmi þar sem við vorum að fara í fermingu og ég ákvað að rölta hratt út í fjöru, öskra aðeins og gráta. Ég íhugaði líka að hætta við þetta allt saman, enda allt horfið en minn yndislegi maður tók það ekki til máls. Svo þegar ég var búin að eyða klukkutíma í að gráta og vorkenna sjálfri mér kom þrjóskan fram og ég fór í það að baka og mynda aftur. Sem betur fer voru lang flestar uppskriftirnar handskrifaðar hjá mér. Svo núna verður bara bakað til gamans fyrir bloggið :)


Ég þoli ekki að líftími á mat sé stuttur. Eins og með pestó þá elska ég það en get ekki borðað marga daga í röð. Reyndar held ég að í fyrsta skipti sé ég að klára krukkuna og sé ekki fram á að þurfa að henda neinu :) Ég er búin að vera sjúk í pestó og mozzarella fylltar kjúklingabringur og hef verið dugleg að fá mér það. Ákvað svo að prófa að setja pestó í bollur og breytti aðeins upprskift sem ég fann á netinu.

Pestó bollur 4 stk

1 bolli möndlumjöl

2 egg

3 msk brætt smjör

2 msk grískt jógúrt

1 kúfuð msk pestó rautt eða grænt

1 msk Rósmarín
50g parmesan ostur rifin

1 msk vínsteinslyftiduft

Blandið öllu saman í skál. Smyrjið muffins álform með olíu eða pamspreyji. Setjið deigið í fjögur hólf og bakið á 180g í 15-20 mínútur.

Müsli

Bloggið hefur fengið að hvílast vel síðustu vikur og mánuði en nú er ég að leggja lokahönd á uppskriftir fyrir bókina mína. Ég er komin með um 100 uppskriftir. En alltaf þegar ég segi við sjálfa mig jæja nú er síðasta uppskriftin komin þá læðist að mér hugmynd og ég verð að framkvæma og hún er svo komin á lista fyrir uppskriftum í bókina. En einhvern tímann verður maður að loka á þetta og það verður gott að geta sett bókina til hliðar og bakað sér til gamans. Ekki það að þetta hafi ekki verið gaman. Aldrei bjóst ég við að fara í bókagerð en það er samt alltaf smá pressa sem fylgir þessu. Sumarið verður rólegt en svo hefst smá annarsamur tími í haust við kynningu svo ég hlakka til að koma bókinni alveg frá mér og eiga smá hvíld fyrir komandi hausti.

Í dag fékk ég hugmynd af ostatertu sem ég bara varð að prófa og botninn heppnaðist sjúklega vel en ég kom svo að því að hann væri líka fullkomin sem musli ef maður bætti bara smá í hann.

Musli

100g pekanhnetur, smátt saxaðar

50g möndlumjöl

2-4msk sukrin gold (eftir hversu sætt þú vilt)

40g smjör

20-30g kókosflögur stórar

salt klípa

Trönuber (valfrjálst)

Bræðið smjör í potti og bætið svo pekanhnetum, möndlumjöli og sukrin gold við og hrærið vel saman.

Setjið á bökunarpappír og dreifið vel úr og þjappið. 

Bakið á 190 gráður í um 5 mínútur eða þar til farið að brúnast aðeins. Fylgist vel með svo það brennur ekki. Látið kólna. Takið úr ofninum og setjið kókosflögur á bökunarpappír og dreifið vel úr. Bakið í ofninum í um 5 mínútur eða þar til gullið. 

Þegar hneturnar eru orðnar kaldar eru þær muldar vel niður í skál og salt, kókosflögur og trönuber blandað vel saman við. Setjið í krukku.

Þetta er tilvalið sem botn fyrir ostaköku ef sleppt er kókosflögurnar og trönuberin. Ég er búin að vera borða þetta sem snakk í dag og get ekki beðið að setja þetta út á chiagrautinn minn :)

Náttúrulegir matarlitir

Vinkona mín vildi endilega að ég prófaði mig áfram með að gera náttúrulega matarliti og auðvitað prófaði ég mig áfram :) Er minna mál að gera en ég bjóst við. Kannski ekki eins auðvelt og að opna matarlitstúpuna og hella nokkrum dropum í kremið og voila en það er eitthvað við það að gera eitthvað frá grunni sjálfur :) Ég er ekki búin að prófa allt sjálf en þetta er hrikalega sniðugt fyrir þá sem vilja prófa sjálfir heima og losna við E-efni. Flestir litirnir eiga ekki að skilja eftir neitt bragð ef þeir eru soðnir í vatni en berin/maukin gefa auðvitað gómsætt bragð. Gulrótasafinn gæti gefið smá sætleika.

Rauðrófusafi sem ég blandaði út í rjómaost. Myndin sýnir ekki alveg rétta lit en hann var fallega fölbleikur.

Hér koma því nokkrar hugmyndir að litum og hvað sé hægt að nota.

Bleikur/rauður - rauðrófur, jarðarber, hindber

Skerið rauðrófur í nokkrar sneiðar og setjið í pott með hálfum bolla af vatni. Látið hitna og takið rauðrófurnar úr þegar komin er góður litur á vatnið. Látið sjóða smá niður til að fá sem sterkasta lit.

Ef nota á hindber eða jarðarber eru þau maukuð og sett í sigti og sigtað frá fræin. Berin eru ekki í eins fljótandi formi og rauðrófu liturinn og er meira eins og purre.

Fjólublár - Rauðkál, bláber

Skerið rauðkálið í bita og setjið í pott. Látið vatn ná yfir rauðkálið og látið sjóða (frábært að nota vatnið þegar búið er til heimagert rauðkál) Látið vatnið sjóða aðeins niður.

Með bláberin er gert það sama og með hindberin og jarðarberin.

Blár - Rauðkál

Þetta er svooooo sniðugt! Notið 1 bolla af rauðkálsvatninu og blandið út í 1/2 tsk af matarsóda og hrærið. Liturinn fer frá því að vera fjólublár í því að vera blár. Bætið við matarsóda ef þið viljið fá ljósari lit.

Gulur - túmerik krydd, gulrótasafi, mangó 

Mauka mangó í purre

Grænn - Spínat safi, spirulina duft

Spínat soðið með vatni og sem er svo látið sjóða niður.

Brúnn - kanill, lakkrísduft, kakóduft

Það er um að gera að prófa sig áfram og aldrei að vita hvert hugurinn fer. Þið trúið aldrei hvað mér datt í  hug að gera eftir að hafa dundað mér við þetta. Ef heppnast vel set ég inn á morgun mynd ;)

Frozen bollakökur

Það er auðvitað Pollapönk dagar núna en það er alltaf Frozen partý á mínu heimili, 24/7. 

Börnin syngja lög úr myndinni, þó aðallega dóttir mín og leikið er atriði úr myndinni einnig. Stundum koma tímabil þegar við tölum ekki saman heldur syngjum það sem við þurfum að segja við lögin. Ég sjálf er mjög skotin í snjókarlinum Olaf sem elskar hlý knús og sumar :)

Og af því það er föstudagur og ég er í stuði þá ákváðum við að föndra aðeins og baka.

Frozen bollakökur búnar til með það sem var til heima.

Pinnarnir 

Prentaði út myndir af karakterum úr myndinni og notaði svo glas til að gera hring og klippa út. 

Átti svo inni í skáp notaðan gjafapappír (já ég geymi gjafapappír) og notaði svo aðeins stærra glas til að útbúa annan hring og klippa út.

Ég átti ekki lím svo ég notaði kennaratyggjó til að festa myndina og silfurpappírinn saman og svo átti ég sleikjó pinna úr allt í köku sem ég festi með.

Ég fann þessa flottu mynd af Olaf á netinu þar sem hægt er að prenta út og klippa út. Ég er rosalega hrifin af Olaf. Ég elska að horfa á ensku útgáfuna af Frozen bara út af Olaf :)

Þið finnið úrklippu Olaf hér.

Kökurnar sjálfar eru úr kökumixi frá funkjonell.

Ég notaði hálft mix og setti um 10 stevíu dropa út í mixið.

Setti deigið í um 10 muffinsform og bakaði í um 20 mínútur.

Kremið

220g mjúkt smjör

200g sukrin melis

4 msk möndlumjólk

20 dropar Via-Health vanillu stevía

1 tsk vanillu eccense

Blár matarlitur

kókos fyrir skraut.

Þeytið smjörið í um það bil 5 mínútur. Skiptir máli til að kremið verður ekki kekkjótt

Bætið sukrin melis smátt og smátt við ásamt stevíu og eccense.

Í lokin setjið þið bláan matarlit eftir hentugleika.

Núggat ís

Það er pínu fyndið þegar ég fæ hugmyndir. Stundum koma þær í draumi um miðja nótt og þá vakna ég og þarf að skrifa hugmyndina niður svo hún gleymist ekki. Það gerist ósjaldan. Ein svona hugmynd kom einmitt í vikunni. Núggat ís, reyndar var það fyrsta sem kom var nutella ís og sú uppskrift er ég með skothelda sem býður betri tíma en beint á eftir kom núggat ís og hann var góður.

Núggat ís

100g núggat (uppskrift hér)

2 dl rjómi

1 egg

2msk sukrin melis

10 dropar súkkulaði Via-Health stevía

útbúið núggat eftir leiðbeiningum nema ekki kæla það.

Þeytið rjómann.

Egg og sukrin melis ásamt stevíu þeytt vel saman.

Öllu blandað vel saman og sett í frysti þar til frosið. Gott að hræra á 30 mín fresti.

Skúffukaka

Ég setti óvart inn á dísuköku síðuna mína á fésbókinni mynd þar sem ég tjáði að ég væri búin að finna skothelda skúffuköku uppskrift. Þessi póstur átti að fara á mitt persónulega fésbókarvegg en stundum þá er maður ekki að fylgjast með. En þar sem svo margir vilja uppskriftina get ég ekki annað en deilt með ykkur. Þetta er lítil uppskrift sem passar í lítið form stærð 20x20 en ekkert mál að tvöfalda hana.

Ég persónulega þurfti þess ekki. Ein sneið mettar vel.

Skúffukaka

50g kókoshveiti

130g Sukrin

110g smjör

120 ml kaffi eða vatn

2 msk sykurlaust kakó (ég nota Hersey´s)

3 stór egg

6 msk sýrður rjómi

1 tsk vanillu extract

1 tsk matarsódi

Krem

50g smjör

1 msk kakó

50g Sukrin melis

2 msk möndlumjólk

1/2 tsk vanillu extract

Sigtið kókoshveiti í skál og bætið við sukrin og blandið vel saman.

Í pott setjið smjör, kaffi og kakó og bræðið saman og setjið svo í skál með kókoshveiti og sukrin. Hrærið vel saman. Restin af hráefnum bætt við. Smyrið 20x20 cm form með smjöri eða pamspreyi og bakið við 200 gráður í ca 20 mínútur.

Krem

Á meðan kakan er í ofninum er kremið útbúið.

Smjör, kakó, möndlumjólk og vanillu extract sett í pott og látið bráðna á vægum hita. Í lokin er sukrin melis bætt við og blandað vel við. Látið standa heitt þar til kakan er tekin úr ofninum.

Setjið kremið á heita kökuna og látið kólna. Stráið kókos yfir kökuna. Skerið ekki kökuna fyrr en hún er alveg orðin köld.

Karamellu osta desert

Ég vona að þið áttuð gott páskafrí. Mitt var mjög gott. Mikið um fjör og gaman. Danskur vinnufélagi Jóns frá Grænlandi var á landinu með fjölskyldu sinni og vorum við dugleg að ferðast með þau út fyrir höfuðborgina og einnig í borginni. Það besta kannski við þessa páska var það að vita að nú er Jón komin heim fyrir fullt og allt. Ekki aftur til Grænlands, engar niðurtalningar í heimkomu í margar vikur. Bara pabbi heima öll kvöld og nætur :)

Ég hef lítið verið í eldhúsinu að prófa mig áfram. Það sem ég hef verið að baka hefur aðalega verið rúllutertan og lagtertan sem ég gerði fyrir bókina. Ég elska hversu fljótlegt og auðvelt er að útbúa þessar tvær kökur. Eins og með þessa uppskrift, fljótleg og ljúffeng ;)

Karamellu osta desert fyrir tvo

110 g rjómaostur

60 ml rjómi

10-15 dropar Via-Health karamellu stevía

1/2 tsk vanillu extract

1-2 msk sukrin melis

50 g pecanhnetur eða heslihnetur

1 msk smjör

rjómaostur settur í skál og hrært vel í honum. Bætið við rjóma og sætuefnum og þeytið þar til komið með þykkt eftir smekk.

Saxið hnetur niður smátt.

Setjið smjör í pott og bræðið. Bætið hnetum við og blandið vel.

Setjið í litla skál hnetur í botninn og þrýstið vel niður. Bætið við ostablöndunni og setjið svo smá hnetukurl ofan á. Setjið í kæli í ca klt.