Sykurlaus páskaegg

Páskarnir rétt handan við hornið.

Ég er eiginlega ekki að trúa því að það sé strax komið að páskum!

Ég reyndar fæ mér páskaegg um páskana. Læt það eftir mér. Ég er reyndar ekki mikil páskaeggja kona. Þegar ég var barn og unglingur náði ég aldrei að klára páskaeggið mitt. Hinsvegar sá ég að það er komið hvítt súkkulaði egg. Ég er búin að fjárfesta í einu og setja upp í skáp.

En það eru ekki allir sem geta fengið sér þessi venjulegu páskaegg og hér er því ein uppskrift fyrir þá.

Formið keypti ég í Hagkaup en þeir eru að selja það fyrir Allt í köku.

Páskaegg

1/2 bolli kakósmjör, smátt skorið

1/2 bolli kókosolía, bragðlaus

40g ósykrað kakó

30g Sukrin Melis

10 dropar súkkulaði stevía

Kakósmjör og kókosolía sett í pott og brætt á lágum hita. Hrærið reglulega í.

Þurrefnum og stevíu blandað við og sett í pottinn. Hrærið vel en það getur tekið smá stund að fá sætuna og kakóið til að bráðna.

Setjið í formin súkkulaðið, ef þið ætlið að fylla þá setjið 1/3 af súkkulaði í formið og frystið.

Setjið svo fyllingu og lokið með að setja súkkulaði yfir.

Hugmynd af fyllingum.

Hnetusmjör

Súkkulaði karamellurnar mínar

Sykurlaust nutella

Jaðrarberjamauk eða önnur ber

Núggat

Müsli

Bloggið hefur fengið að hvílast vel síðustu vikur og mánuði en nú er ég að leggja lokahönd á uppskriftir fyrir bókina mína. Ég er komin með um 100 uppskriftir. En alltaf þegar ég segi við sjálfa mig jæja nú er síðasta uppskriftin komin þá læðist að mér hugmynd og ég verð að framkvæma og hún er svo komin á lista fyrir uppskriftum í bókina. En einhvern tímann verður maður að loka á þetta og það verður gott að geta sett bókina til hliðar og bakað sér til gamans. Ekki það að þetta hafi ekki verið gaman. Aldrei bjóst ég við að fara í bókagerð en það er samt alltaf smá pressa sem fylgir þessu. Sumarið verður rólegt en svo hefst smá annarsamur tími í haust við kynningu svo ég hlakka til að koma bókinni alveg frá mér og eiga smá hvíld fyrir komandi hausti.

Í dag fékk ég hugmynd af ostatertu sem ég bara varð að prófa og botninn heppnaðist sjúklega vel en ég kom svo að því að hann væri líka fullkomin sem musli ef maður bætti bara smá í hann.

Musli

100g pekanhnetur, smátt saxaðar

50g möndlumjöl

2-4msk sukrin gold (eftir hversu sætt þú vilt)

40g smjör

20-30g kókosflögur stórar

salt klípa

Trönuber (valfrjálst)

Bræðið smjör í potti og bætið svo pekanhnetum, möndlumjöli og sukrin gold við og hrærið vel saman.

Setjið á bökunarpappír og dreifið vel úr og þjappið. 

Bakið á 190 gráður í um 5 mínútur eða þar til farið að brúnast aðeins. Fylgist vel með svo það brennur ekki. Látið kólna. Takið úr ofninum og setjið kókosflögur á bökunarpappír og dreifið vel úr. Bakið í ofninum í um 5 mínútur eða þar til gullið. 

Þegar hneturnar eru orðnar kaldar eru þær muldar vel niður í skál og salt, kókosflögur og trönuber blandað vel saman við. Setjið í krukku.

Þetta er tilvalið sem botn fyrir ostaköku ef sleppt er kókosflögurnar og trönuberin. Ég er búin að vera borða þetta sem snakk í dag og get ekki beðið að setja þetta út á chiagrautinn minn :)