Pistasíu chia búðingur

Um áramótin ákvað ég að setja mér áramótaheit sem væri ekki of erfitt og væri vel teygjanlegt í því skyni hvernig ég túlka það. Heitið var semsagt að segja ekki nei við nýjum tækifærum. Svo er það náttúrulega mitt að finna út hvað ég tel vera tækifæri og hvað ekki ;)

Þegar bókaútgefandi sendi mér svo línu um það hvort ég hafði áhuga á að gefa út bók, var ég byrjuð að skrifa takk en nei takk fyrir þegar ég sagði við sjálfa mig að þetta væri nú ekki hægt að neita enda ótrúlegt tækifæri sem mér var að bjóðast. Eftir að hafa farið á fund ákvað ég að skella mér í djúpu laugina. Uppskriftabók sett í október. Ég hef nokkra mánuði að prófa mig áfram í eldhúsinu og vildi óska að líkaminn minn gæti staðist undir þeirri orku sem kemur með hugmyndunum mínum. Þó svo að ég sé nýbyrjuð er ég komin vel á veg enda átti ég þó nokkrar uppskriftir skrifaðar niður í litlu bókina mína sem hafa ekki fengið að lýta dagsins ljós. 

Svo hef ég aðeins verið að prófa mig í eldhúsinu. Sumt heppnast vel, annað er bara hreint út sagt ógeðslegt ;) Ég vildi óska að ég gæti sett þetta allt saman á bloggið en flest af þessu verður að bíða þangað til það kemur út á prent :) Þetta er mikil vinna og dýr en með góðu skipulagi er ég búin að skrá allt niður og passa mig að ofgera mig ekki í eldhúsinu. Einnig "neyddist" ég að fjárfesta í blandara sem er algjört must að eiga finnst mér. Ég á enga hrærivél, bara gamlan handþeytara og töfrasprota og vantaði því alvöru græju sem getur maukað allt milli himins og jarðar í spað þegar sprotinn getur það ekki :)

En ég get ekki ýtt blogginu til hliðar enda er það sem kom þessu öllu í gang.

Langar að deila með ykkur uppáhaldinu mínu, pístasíu chia graut. Mmmmmm ég er pístasíu sjúk og elska þennan svoooo mikið.

Pistasíu chia grautur.

fyrir 2

250 ml möndlumjólk

3 msk chia fræ

50 g pistasíur og smá auka sem skraut

5 dropar via health vanillu dropar

1 msk sukrin melis

Allt sett í blandara og blandað vel í 1-2 mínútur. Sett í skál og nokkrar heilar pistasíur bætt í grautinn og hrært saman við. Finnst sjálfri svo gott að fá einstaka heila hnetu með munnbitanum :)

Karamellu draumur

Það er ekki margt sem er skemmtilegra en að hitta stór fjölskylduna í afmælisboðum. Um helgina var eitt afmæli og allir hressir og kátir og mikið helgið og spjallað. Það sem einkennir kannski umræðu efni hjá okkur er matur. Engin pólitík eða hvað er að gerast í heiminum heldur matur. Sem dæmi þá var örugglega eytt 40 mínútum bara að tala um grjónagraut og hrísgrjón. Við tókum ekki eftir þessu fyrr en einn frændi minn sagði, við erum búin að vera tala um grjónagraut í 30 mínútur og þar á undan var talað um sushi! Ég hélt að þetta væri bara normið og svona væri í öllum fjölskyldum, sem mér finnst svo sorglegt að sé ekki ;) Þegar ég borða morgunmat, er ég strax farin að huga að næstu máltíð og í hádeginu þá er huginn við kvöldmatnum. Og mér finnst fátt skemmtilegra en að flétta matreiðslubókum eða vafra á netinu að skoða uppskriftir.

Ég elska karamellu og hef saknað hennar. Jú náði að gera gómsæta karamellu fudge en ég vil mjúka karamellu sem ég get sett á ís, kökur eða fyllt konfekt með. Og svo ákvað ég að prófa að nota afganga  og viti menn þessi virkaði!

Karamellu draumur

1 dós kókosmjólk

20 g smjör

60 g sukrin gold

6 dropar Via-Health karamellu stevía

Allt sett í pott eða pönnu með teflon helst. Látið bráðna og svo malla á meðalhita. Hræra á nokkra mínútna fresti. Þegar hún er farin að þykkna er karamellan tilbúin og sett í krukku :) Getur tekið frá 30-40 mínútur. Þessi kristallast ekki þegar hún kólnar ef hún er geymt í lokuðu íláti og er ljúffeng.

Avocado kókos búðingur eða ís ;)

Svona þegar maður fær algjört ógeð af rjóma og súkkulaði eftir bolludaginn þá mæli ég með að þið skellið í einn avocado kókos búðing/ís. Hann er góður sem búðingur og hann er einnig æðislegur sem ís. Þessi gerist varla hollari.

Avocado kókos búðingur

220 g avocado eða um 1 avocado

200 g kókosmjólk

70 g rjómi eða kókosmjólk

50 g sukrin melis

4 dropar Via-Health kókos stevía

1 msk lime safi

salt klípa

Setja allt í skál og mauka með töfrasprota. Ef á að útbúa ís er sett í frysti í ca 1-1,5 klt. Skreytið með kókosflögum :) 

Vatnsdeigs bollur

Sá þessa uppskrift á LKL síðu á facebook og ákvað að prófa. Breytti reyndar uppskriftinni ogguponsu en upprunalega kemur frá Þórunni Berndsen. Þær vour pínu blautar að innan. Kom samt ekki illa út og ég var alveg að líka það. Prófaði líka að skafa innan úr þeim og það heppnaðist vel.

Vatnsdeigsbollur

125 g smjör

250 ml vatn
40 g kókoshveiti

4 lítil egg eða 3 stór

1 tsk xhantan gum

15 dropar Via-Health stevíu vanillu eða original

Hægt að setja 20 g möndlumjöl á móti 20 g af kókoshveiti ef fólk vill minna kókosbragð og aðeins grófari bollur. Hinsvegar fann ég ekki kókosbragð og er viss um að stevían kemur til bjargar þar.

Ef þið viljið sleppa öllum mjólkurvörum sökum ofnæmis eða óþols er hægt að nota smjörlíki í stað smjörs og þeytta kókosmjólk í stað rjóma :) Búið til súkkulaði úr kakó, sukrin melis og smjörlíki

Smjör og vatn sett í pott og brætt. Kókoshveiti og möndlumjöl bætt í pottinn og hrært vel saman. Xhantan gum bætt út í og blandað við. Sett í skál og látið kólna. Bæta við eggjum, eitt í einu og hræra vel saman við deigið. Í lokin eru stevía dropum bætt við.

Nota skeið til að setja deig á bökunarplötu með bökunarpappír á. Bakað með blæstri á 190 gráður í ca 30 mínútur.

Ég bræddi svo sykurlaust súkkulaði og setti á bollurnar :)

Blómkáls cheddar súpa

Þegar maður vaknar með kvef í öllu andlitinu, beinverki og hita þá er ekkert eins gott en að fá heita súpu í kvöldmat. Það er líka góðs viti að langa að mæta í vinnuna þegar maður er veikur en stundum þarf bara að leggjast undir feld og hvíla sig. Ég er gikkur, ég játa það alveg en það sem virkar vel á grænmetisgikki eins og mig er að útbúa holla súpu og mauka grænmetið í öreindir :)

Þessi súpa slóg í gegn og var mettandi og góð á svona köldum degi.

                                                              Blómkáls cheddar súpa

10 lengjur af beikon

1 laukur gróf saxaður

1 sellerí stilkur, gróf saxaður

2 hvítlauksgeirar

1 meðal stór blómkálshaus

2 msk smjör

500 ml kjúklingasoði

100 g rjómaostur

100 g rjómi

2 msk saxaður graslaukur

salt og pipar eftir smekk

rifin cheddar ostur

skerið beikon í bita og steikið á meðal hita í potti í ca 5 mínútur. Takið úr potti og setjið á pappír og geymið. 2 msk af smjöri sett í pottinn (minna ef það er mikið af vökva eftir beikonið) og bætið við lauk, sellerí og hvítlauk og látið brúnast í 10 mínútur á meðal hita. 

Blómkál þrifið og skorið í bita og sett í vatn. 

Ég átti ekki kjúklingasoð svo ég setti tvo kjúklingateninga í pottinn með blómkálinu og vel af vatni. Látið koma upp að suðu og látið sjóða þar til blómkálið er orðið mjúkt. Setjið blómkál ásamt 500 ml af soði í pottinn með grænmetinu. Maukið með töfrasprota þar til orðið af fínni súpu með engum bitum í. 

Sett aftur á heita hellu og bætið við rjómaosti, rjóma og beikoni og hitið upp súpuna. Í lokin er graslaukur sett út í ásamt salt og pipar eftir smekk. Ég saltaði ekkert enda kom nóg af salti frá beikoninu. Setjið í skál og dreifið rifnum cheddar osti yfir.

Fylltar kjúklingabringur

Ef þessi máltíð er ekki mettandi og ljúffeng þá veit ég ekki hvað. Ég elska þegar Jónbi er heima og við stöndum saman í eldhúsinu og eldum og prófum nýja hluti. Best er þegar galdrað er fram eitthvað með því sem er til í ísskápnum. Það er bara ekki eins gaman að elda þegar hann er ekki heima. Það verður ótrúlega ljúft að fá hann heim for good fljótlega :)

Fylltar kjúklingabringur

4 kjúklingabringur

Basil Pestó 

(var með frá Stonewall Kitchen)

Mozzarella ostur, ein kúla

Hvítlauksolía 

(var með Roasted Garlic oil frá Stonewall Kitchen)

Krydd eftir smekk

Snyrtið bringurnar og skerið rauf í bringuna annað hvort ofan á eða á hliðinni. Setjið um 2-4 tsk af pestói í hverja bringu eftir stærð og smekk. Skerið mozzarella ostin í sneiðar og setjið í raufina. Kryddið með salt og pipar eða kjúklingakryddi.

Setjið bringurnar í eldfastmót með olíu í botninum. Ég setti vel af hvítlauksolíu. Setti álpappír laust yfir mótið og setti ofn sem var á 200 gráðum og hafði í 30 mínútur. Þá tók ég álpappírinn af og stráði smá rifnum osti yfir og hafði í 10 mínútur í viðbót.

Meðlætið var blómkál og sveppir steiktir upp úr hvítlauksolíu. Skar blómkálið í litla bita og setti í eldfastamótið með kjúklingabringunum og stráði smá af salti yfir. Þegar ég stráði rifnum osti yfir kjúklinginn setti ég líka yfir blómkálið. Sveppir voru skorin í sneiðar og steikt í nokkrar mínútur upp úr hvítlauksolíunni.

Sósa var piparostur og rjómi brætt saman í potti :)

Oopsie

Til lukku með daginn ykkar konur! Við mæðgur áttum yndislegan dag með strákunum okkar öllum. Já allir komnir heim í nokkra daga. Bestu fréttirnar eru samt þær að eiginmaðurinn stefnir á að flytja aftur heim í apríl og vinna hér á landi. Þá lýkur næstum 2 ára "útlegð" á Grænlandi. Það verður æðislegt að fá hann aftur heim :)

Helgin byrjaði vel þar sem við fórum á Hótel Þingholt ásamt vinapari okkar og skemmtum við okkur vel svona einu sinni án barna. Fórum á Lækjabrekku þar sem við fengum heila hæð fyrir okkur. Ætli starfsfólkið hafi bara ekki séð á okkur að við vorum ekki í rómatíska gírnum með hvísli og fótastrokum heldur meira að fá sér smá mojito og hlæja og hafa gaman :) Eftir það var kíkt á Danska þar sem fjörið hélt áfram og sungið og hlegið fram eftir nóttu. 

Í dag buðu strákarnir okkur stelpunum í brunch á Vox og svo var kíkt á skauta :)

Sunnudagar eru góðir dagar til að reyna skipuleggja vikuna sem er að hefjast með bakstri. Smákökur, brauð og oopsie er eitthvað sem oft er bakað á sunnudögum. Oopsie var eitt af því fyrsta sem ég gerði þegar ég tók út sykur og hveiti og finnst ótrúlega gott að fá mér með smjör og osti eða sem heit samloka eða bara eitt og sér. Ég er nokkuð viss um að þetta heitir oopsie því það er erfitt að baka þessar og láta vera fluffy og þykkar og hef ég svosem ekki náð því enn. Mér er alveg sama, þær smakkast jafn vel og gera sitt gagn.

Oopsie

3 egg

100 g rjómaostur

1/2 msk husk

salt klípa

Aðskilja hvítur frá rauðum. Stífþeyta hvíturnar. Rjómaostur og eggja rauður þeytt vel saman. Salt og husk bætt við rjómaost og rauður og látið standa í 5 mínútur. Eggjahvítur varlega bætt út í með sleif. Passa að hræra ekki of mikið. Nota skeið til að setja á plötu með bökunarpappír. Hægt að gera stakar kökur eða leyfa þessu að vera ein stór og skera eftir bakstur. Bakað við 150 gráður í 15-20 mínútur.

Hægt er að krydda með hvaða kryddi sem er til að auka fjölbreytileika. Einnig hef ég heyrt að sumir hafa búið til oopsie með beikonosti og það heppnast vel :)