Kryddbrauð

Jólabarnið inn í mér gleðst mikið yfir öllum snjónum sem er búið að príða Reykjavík síðustu daga og vonar að það haldist þar til eftir jól. Það er bara ekkert eins yndislegt og hvít jól og það hefur verið fátt um það í Reykjavíkinni síðustu ár.

Á sunnudaginn fagnaði ég nýjum tug og varð heil 30 ára. Dagurinn var frábær. Við börnin eyddum honum hjá foreldrum mínum í Kópavogi og höfðum það notalegt. Kvöldið hinsvegar varð ekki eins gott þar sem ég náði að bakka á eina bílinn sem var á bílastæðinu og skemma hann ágætlega. Ég kenni lélegri sjón og viðbröðgum vegna aldurs ;)

Bókin hefur gengið vel að selja og það fer dálítið af tíma í að skrifa á umslög og setja í póst. Þar sem ég er meira og minna ein í þessu og það að koma jól þá hef ég ekki getað verið að fara á hverjum degi á pósthúsið en það tekur tíma að skrifa um 600 umslög ;) En ég hef bara gaman af þessu og finnst frábært að fyrirtæki hafa veirið dugleg að kaupa bókina fyrir viðskiptavini og starfsfólk.

Vegna þess að jólaandinn er komin yfir mig langar mig að deila með ykkur einni uppskrift úr bókinni.

Kryddbrauð

3 egg

170 g rjómaostur

120 g smjör

65 g möndlumjöl

15 g kókoshveiti

40 g Fiberhusk

60 g Sukrin Gold

2 tsk vínsteinslyftiduft (eða venjulegt)

2 msk kanill

1/2 msk negull

1/2 msk engifer

(kanill, engifer, negull eftir smekk)

Bræða smjör. Smjör og rjómaostur pískað vel saman í skál. Í annarri skál er Sukrin Gold, stevíu og eggjum þeytt saman og svo bætt út í skálina með smjörinu og rjómaostinum. Þurrefnum blandað saman og síðan blandað við restina. Sett í brauðform og inn í 175 gráðu heitann ofn í 30-40 mínútur.

Graflaxsósa

Ég elska graflax og graflaxsósu. Það er samt ekki mörg ár síðan ég byrjaði að borða það enda var ég og er enn óttalegur gikkur. Ég grét pínu inn í mér þegar ég komst að þvi að það væri engin sykurlaus sósa og að graflaxinn væri með sykur í. En, svo fann ég  fyrirtæki sem bjó til fyrir mig graflax án sykurs og þá var bara að útbúa sína eigin graflaxasósu :)

Graflaxsósa

100 g majónes

1/2 msk sinnep

1-2 tsk dill

1 1/2 msk Sukrin Gold

3 msk sítrónusafi

5-7 dropar Via Health sítrónu dropar

Salt og pipar eftir smekk

Öllu blandað saman í litla skál og smakkað til :-)

Avocado franskar

Dagurinn í dag fór í afmæliskaffi fyrir ömmu mína og afa og svo að hoppa upp á skrifstofu hjá 23 og skrifa utan á nokkur hundruð umslög sem fara í póst á morgunn, já bókin fer í póst á morgunn Woop Woop :-)

Hinsvegar er ég búin að vera aðeins að brjóta heilan varðandi uppskriftir því Vikan bað mig um að vera matgæðingur hjá sér í Janúar og ætla að koma fyrir næstu helgi að taka myndir. Og þá er spurning hvað skal bjóða upp á!? Ég hef verið mikið að hugsa um avocado franskar og ákvað að prófa þær í kvöld og já!! Þetta er eitthvað sem fær að rata í Vikuna en ég bara gat ekki beðið með að setja þetta fyrir ykkur á bloggið!!

Avocado franskar

1 avocado

1 egg

kókoshveiti

rifin parmesan ostur

hvítlaukssalt

salt og pipar

Egg sett í skál og létt pískað með gaffli og krydd bætt út í eftir smekk. Avocado er skorið í lengjur og dýft ofan í egg-kókoshveiti-egg-parmesan. 

Sett á bökunarpappír og í ofn sem er 200 gráður í 10-15 mín eða þangað til osturinn er orðin gylltur.

Ídýfa

5 msk majones

3 msk fínsöxuð koriander

nokkrar tsk af sítrónusafa (eftir smekk)

Allt sett í skál og blandað með töfrasprota eða í blandara.

Dísu súpa

Á svona köldum dögum er yndislegt að fá sér heita súpu. Þessa geri ég alltaf reglulega ef ég á afgangs kjúkling eða hakk. Mæli aldrei neitt sérstaklega í hana heldur hendi í hana það sem til er og ég verð aldrei fyrir vonbrigðum.

Dísu súpa

1 dós af söxuðum tómötum.

1/2 líter af vatni

1 grænmetis eða kjúklinga teningur

Paprika, gulrætur, eða það grænmeti sem til er í kælinum.

2-4 hvítlauksgeirar

100 g rjómaostur

Basilika

salt og pipar

Vatn og matarteningur sett í pott og hitað. Tómatar og hvítlaukur bætt út og látið ná suðu.

Maukað með töfrasprota svo úr verður fín súpa. Smátt saxað rænmeti og afgangs kjöt sett út í ásamt rjómaosti og kryddum (eftis smekk) og látið malla í 15-20 mín.

Sett í skál og bætt við vel af rifnum osti út í ásamt ferskri steinselju.

mmmmm í alvöru hún er æði!. Það er hægt að minnka vatnið og hafa hana þykkri eða setja meira vatn og þynna hana (gott að krydda meir þá). Einnig hægt að setja grænmetið strax með ofan í með tómötunum og mauka. Hentar fyrir gikki eins og mig ;) Rifni osturinn verður æði og ég á núna alltaf tómata i dós upp í skáp just in case ég hendi í þessa súpu.

Lakkrís trufflur

Ég hef ekki haft mikinn tíma til að prófa eitthvað nýtt í eldhúsinu og blogga. Börnin hafa skipst á að vera veik. Emma er búin að vera meira og minna veik allan nóvember mánuð og loks í gær þegar hún var orðin vel hraust og tilbúin í leikskólann kom Alexander til mín rétt áður en við fórum út úr húsi og sagðist líða einhvað skringilega. Ég var mjög vond mamma og hélt að þetta væri miðjubarna syndrome. Systir hans búin að fá svo mikla athygli út af veikindum sínum og hann er aldrei veikur og hélt því að hann væri að reyna að plata til að eiga smá stund með móður sinni. Þegar hann sagði svo að hann væri með hausverk og ég mældi hann þá var hann klukkan átta að morgni með 39 stiga hita. Ó hvað mömmuhjartað fékk mikla samvisku að hafa haldið að hann væri ekki að segja satt. Man hreinlega ekki hvenær hann fékk hita síðast, allavega nokkur ár síðan. Þannig að mæta í vinnu var ekki á dagskrá, eina ferðina enn.

Bókin er komin á fullt í sölu og hefur gengið vel. Var að klára prentun núna klukkan tíu og þá er bara að við skytturnar þrjár (ég, Ágúst og Andrea sem eru með mér í þessu verkefni) setjumst niður og setjum bókina í umslag. Ég fékk að sjá loksins bókina í gær og flétta henni. Það sem hún er falleg :-) Svaf með hana á náttborðinu mínu.

En ætla að setja uppskrift af lakkrís trufflum. Ofur einfalt og sjúklega gott. 

Lakkrís trufflur

200 súkkulaði, 70%

1 1/2 dl rjómi

1-2 tsk lakkríspúður

Rjómi hitaður í potti. Tekið af hellu áður en rjóminn nær suðu og súkkulaði bætt út í. Hræra vel í rjóma og súkkulaði þar til alveg blandað. Bæta lakkríspúðri við og hræra vel saman við súkkulaðið.

Setja í sprautupoka og sprauta í lítil konfekt form eða setja í skál og geyma í kæli í klt og búa til litlar kúlur. Hægt að skreyta kúlurnar með söxuðum hnetum eða kakódufti. Ef sett í konfektform er gott að skreyta með smá klípu af salti eða chili.

Uppskriftarbæklingur fyrir jólin

Jæja þá er ýmislegt búið að vera í gangi hjá mér síðustu daga. Ég fékk þá flugu í hausinn hvort það væri nú ekki gaman að útbúa lítinn bækling. Hafði samband við vin minn í auglýsinga bransanum og spurði hvort það væri eitthvað idiot proof forrit á netinu sem ég gæti notað og dúllað mér við.

Neinei ég skal bara gera þetta var svarið! Maður með þrjú fyrirtæki og trilljón verkefni fyrir jólin. Við fórum að tala saman og eitt varð að öðru og nú er hann í þessum töluðu orðum að klára að hanna bæklinginn svo hann verði klár í prentun. Besta við þetta er samt það að engin peningur fer í þetta. Öll vinna er gefins og við ætlum að láta allan ágóðan renna óskertur til UNICEF Pilipseyja.

Það er mikil þörf núna fyrir því að koma uppbyggingu í gang og verna börnin þar.

Bæklingurinn mun kosta 990 kr og svo mun bætast einhverjar krónur við póstsendingu.

Það verða 15 uppskriftir í bæklingnum, bæði vinsælar sem hafa komið hér fram á blogginu og nýjar sem ég hef töfrað fram :)

Hér er smá sýnishorn

Pistasíu fudge

Vá hvað tíminn bara flýgur áfram. Reyndar endurtek ég þetta á þessum tíma á hverju ári. Finnst alltaf vera alveg að koma jól. Nú er smátt og smátt að gerast jólalegra hér í koti. Börnin búin að fá seríurnar sínar upp í glugga sína en það kostaði sitt. Lofaði í gærkvöldi að setja upp seríur, hoppaði niður í geymslu en.....engar seríur! Hvaða rugl er það! Leitaði og leitaði, kom upp og leitaði í öllum skápum og nei, engar seríur. Hringdi til Grænlands til að ath hvort grænlendingurinn minn vissi eitthvað af þessu.

En þessu var bara reddað með ferð í Rúmfatalagerinn og seríur komnar upp og ég neyddist til að kaupa meira jóladót í leiðinni því ég komst að því að ég á bara einn kassa af jóladóti. Það er engan vegin að virka.

Nauðsynlegt að eiga nóg af kertum og kertastjökum. Varð of skotin í hreindýra stakanum!

Pistasíu fudge

90 g smjör

5 msk sukrin gold

5 dl rjómi

6-8 dropar af vanillu eða karamellu Via-Healt stevíu

2 dl pistasíur

Allt nema hnetur sett í pott og látið malla á lægsta hita í ca 30 mín. Passa að hræra ekki of mikið. Rétt að hræra á tíu mínútna fresti. Saxa niður hnetur og setja í blönduna þegar hún er orðin þykk. Hrært saman og sett í form og í frysti í nokkra klukkutíma. Skorið í bita og geymt í ísskáp.