Marengskökur

Tilraunir í jólabakstri halda áfram og með minna samviskubiti núna því það er alveg að koma nóvember. Reyndar dáldið síðan ég gerði þessar. Núna er ég búin að vera heima með veika mús og sé fram á að vera eitthvað lengur. Finnst að það ætti að vera bannað með lögum að lítil börn þjáist af hausverk vegna stíflaðra kinnhola og lungnabólgu. Hef sjálf fengið þetta og það sem ég var veik! Dóttirin stendur sig mun betur en mamman gerði og gleymir inn á milli verkjunum.

Í dag var þessi líka fallega sól að skína vel og vandlega inn um gluggana hjá mér og sýna mér allt þetta ryk sem er út um allt hjá mér. Ohhh það sem ég varð pirruð. Þangað til ég uppgvötaði að ég gæti nú notað þessa sól til að taka myndir af marengskökunum! Við það að taka myndirnar uppgvötaði litla veikindapésinn kökurnar og held að þær séu að verða búnar enda er hún algjör súkkulaðigrís.

Marengskökur

Ca. 40 stk

2 eggjahvítur

salt klípa

25 g sukrin melis

8-10 dropar Via-Health vanillu, piparmintu eða original dropar

50 g saxaðar möndlur eða hnetur eftir ósk

100 g saxað súkkulaði 70% eða yfir

Hita ofninn á 175 gráður.

Eggjahvítur, stevía dropar og salt stífþeytt saman. Sukrin melis er svo bætt út í og þeytt smá áfram. Súkkulaði og möndlur blandað varlega saman við með sleif. Sett á bökunarpappír með tsk. Um leið og kökurnar fara inn í ofn er slökkt á ofninum og kökurnar látnar vera þar inn í í 2-2 1/2 tíma.

Vanillu panna cotta

Miðjubarnið mitt, Alexander Gauti hefur erft eldhúsáhugann frá móður sinni. Honum finnst ekkert skemmtilegra en að fá að stússast með mér í eldhúsinu og hvað þá þegar hann fær að gera eitthvað sjálfur. Ég skal játa það, stundum þegar hann spyr þá segi ég nei ekki núna og það er svo leiðinlegt að gera það við barn sem er tilbúið að læra og prófa sig áfram. 

Hann elskar að horfa á matreiðsluþætti og Jói Fel er í sérstöku uppáhaldi hjá honum og það var grátið þegar hætt var með stöð 2 á sínum tíma því þá var ekki hægt að horfa á Jóa.

Nýjasta uppáhaldið hjá honum er Masterchef Kids og þar sá hann krakkana gera panna cotta og var staðráðin í því að fá að prófa sem mamman var ekki lengi að segja já við.

Panna cotta

3 gelatin

375 ml rjómi

30 g sukrin melis

1/2 vanillustöng

10 dropar Via-Health vanillu stevía

100 g jógúrt

Gelatín látið liggja í vatni þar til orðið mjúkt. Rjómi, sukrin melis, stevía, og jógúrt sett í pott á miðlungshita. Vanillustöng fræ hreinsuð og sett í pottinn. Hræra í pottinum á meðan þetta hitnar og þegar komið yfir líkamshita  er vanillustöng tekin úr og gelatíni hrært í.

Sett í skálar og inn í ísskáp í ca tvo tíma.

Jarðaberja sósa

100 g jarðaber

100 ml vatn

50 g sukrin melis

10 dropar Via-Health jarðaberja stevía

Allt sett í pott og látið malla í nokkrar mínútur. Maukað svo með töfrasprota.

Láta jarðaberja sósuna kólna áður en hún er sett á pannacotta. Einnig gott að setja saxaðar möndlur á.

Alexander Gauti skreytti sitt pannacotta sjálfur. Jarðaberja sósa með örlítið af sukrin melis yfir. Smakkaðist mjög vel hjá honum og hann er búin að fá leyfi fyrir að verða gestabloggari aftur ;)

Lakkrís ís

Hvað gerir kona þegar hún lendir í þeim hremmingum að einhver óþokki kemst yfir visa korts númerið hennar og ákveður að nota alla heimildina hennar til að spila póker?? Jú eftir að hafa hringt í banka og farið þangað til að fylla út kærublað þá langar manni í eitthvað gott til að róa taugarnar. Ís er alltaf besta meðalið og núna langaði mig virkilega í ís með lakkrís bragði.

Lakkrís ís

2 dl rjómi

2 eggja rauður

5 dropar Via-Health vanillu stevía

1,5-2 tsk lakkrísduft

Þeyta rjóman en ekki stífþeyta samt heldur svona hálfa leið (kem ég þessu skiljanlega frá mér? ;) )

Bæta eggja rauðum og stevía dropum við og þeyta smá í viðbót. Síðast er bætt við lakkrísduftinu.
Byrjið á einn tsk og smakkið til og bætið þá við ef þið viljið. Setja inn í frysti og hræra á hálftíma fresti eða svo. Tilbúin eftir mislangan tíma, fer eftir því hversu stórt eða lítið form ísinn er settur í. 

Bragðið minnir mig ekki beint á lakkrís heldur frekar á pipar sem er í brjóstsykri, mmmm. Taugaveiklaða mamman eftir þennan dag var pínu glöð að Alexander sem var vakandi líkar ekki við lakkrís.

Mjög gott að setja svo saxaðar möndlur yfir ísinn.

Minni svo aftur á facebook síðu bloggsins :-) Dísukökur

Fetabollur

Búin að endurnæra sálina og eiga yndislega stund í Kaupmannahöfn. Ég tók þá ávkörðun í fyrra að taka mér smá húsmæðraorlof í október og ég var ekki lengi að sjá að þetta þarf ég að gera árlega.

Skellti mér til Köben að heimsækja vini og ættingja. Það er bara eitthvað við það að fara ein í flug og þurfa ekki að hugsa um neinn nema sjálfan sig. Engin börn, engin eiginmaður, bara gamla góða Hafdís.

Ég hef oft komið til Kaupmannahafnar en yfirleitt er það bara til að komast svo yfir til Svíþjóðar eða kíkja á Strikið og Tivolí. En í þetta sinn fékk ég að sjá hvernig er að búa í Köben og ferðast um á hjóli, strætó og lest og þetta var yndislegt. Kom mér á óvart hversu auðvelt er að ferðast um og var ég dugleg að koma mér ein á milli staða. Ég náði að lenda í smá ævintýri með ferðatöskuna mína þegar ég tók vitlausan strætó en ég sá bara meir af Köben :)

En nú er maður komin heim og búin að knúsa börnin og tilveran fær aftur smá rútínu. Í síðustu viku náði bloggið mitt 60,000 heimsóknum og ég veit ekki með ykkur en mér finnst þetta alveg ótrúlegt! Litla ég sem sem hef gaman af að standa í eldhúsinu með börnunum og er að deila á netinu, er ótrúlega þakklát fyrir áhugan sem bloggið fær.

En matur.....einfalt og gott. Já fetabollur! Það er hægt að prófa sig áfram með hakkbollur á svo marga vegu og ákvað ég um daginn að setja fetaost í þær. Fljótlegt að gera og bragðgóðar. Börnin voru ekki lengi að klára skammtinn.

Fetabollur

800 g af hakki (var með nauta)

2 egg

100 g fetaostur

2 hvítlauksgeirar

Rifin ostur

smjör til steikingar

Kryddað með basilíku, steinselju, oregano og salt og pipar eftir smekk.

Öllu blandað vel saman. Búa til bollur og brúna á pönnu.

Sett í eldfastmót og stráð rifnum osti yfir. Inn í 180 gráða heitan ofn í ca 15 mín eða þar til gegnsteikt.

Ég hafði svo með þessu piparosta sósu og spínat salat.

Kókostoppar

Það er viss bölvun að vera fædd í desember.

Ég elska desember og jól og í október þá er ég farin að eiga erfitt með mig og jólin löngu komin í huganum. Ég tel þetta vera því ég er fædd í desember. Í ár er ég extra slæm því ég nota bloggið sem afsökun til að baka jólakökur, finna smá jólaskraut til að skreyta myndir með og til að ég lifi mig sem mest inn í  jólin þá já, hlusta ég á jólalög. Blessuð bölvunin ;)

Núna var ákveðið að prófa að gera kókostoppa. Uppáhaldið hjá eiginmanninum, skulum sjá hvort hann sætti sig ekki í ár við þessar LKL kókostoppa. Hef ekki trú á öðru enda heppnuðust þær mjög vel :)

Kókostoppar

60g mjúkt smjör

1 dl sukrin melis

1 egg

150g kókosmjöl

Egg og sukrin melis þeytt vel saman í skál. 

Smjör bætt við og þeytt vel saman við.

Kókosmjöl bætt við og varlega blandað með sleif.

Búa til litla toppa (gerði mína aðeisn of stóra fékk 15 stk) og gott að kreista smá vökvann úr.

Setja á bökunarpappír og í 175 g heitann ofn í ca 15 mínútur.
Gott að láta þær kólna á smá eldhúspappíri.

Mjög gott að bræða súkkulaði og setja á botninn eða toppinn á kökunum en ég var orðið súkkulaðilaus aldrei þessu vant.

Ég drekk mikið vatn og stundum fæ ég nóg af hversu bragðlaust það er og ákvað að prófa að setja stevía dropa í vatnskönnu og mitt uppáhald er núna Via-Health Grape stevia. Í stóra könnu af vatni set ég svona fimm dropa og er svo með sleif til að hræra í. Búin að sötra á þessu í allan dag :)

Bláberja-rjómaosta ís

Bláberja rjómaostaís, já það hljómar skringilega en kemur skemmtilega á óvart.

Það er alltaf gaman að prófa sig áfram í eldhúsinu, hvað þá þegar eitthvað eins og þetta verður til.

Bláberja rjómaostaís

1/2 l rjómi

30 g sukrin melis

2 eggjarauður

90 g rjómaostur

250 g íslensk bláber

10 dropar Via-Health stevía, original

Eggjarauður, stevía og sukrin melis þeytt saman.

Rjómi hitaður í potti á miðlungshita þar til hann er komin rétt yfir líkamshita.

Rjómi bætt við rauður og þeytt vel saman.

Blandan sett í pott hrært í þar til hún er farin að þykkjast aðeins.

Taka af hellunni og rjómaostur blandaður við.

Bláber maukuð eftir smekk og blandað við ísinn.

Sett í frysti í 2-3 tíma og gott að hræra reglulega í ísnum.

Súkkulaði trufflur

Bloggstuðið heldur áfram samhliða því að vera að prófa mig áfram í eldhúsinu. Eins og í gærkvöldi. Ég fæ stundum hugmynd sem mér finnst frábær og verð að prófa og  hugurinn verður ekki rólegur fyrr en ég er búin að framkvæma hana. Annars á ég von á svefnlausri nótt.

Í gær átti súkkulaði og rjómi hug minn allan og útkoman var trufflur. Þetta var mjög auðvelt að gera og bragðið.....skal alveg viðurkenna að ég sá eftir þessum tveimur trufflum sem fóru ofan í gestina mína í kvöld. Fullkomið konfekt fyrir jólin :)

Út um herbergisgluggan minn í morgunn. Játa það að ég fór að syngja white christmas í huganum þegar ég sá þetta og að ég var extra glöð enda mikið jólabarn og æðislegt að fá einn svona fallegan dag.

Súkkulaði trufflur

150 ml rjómi

100 g dökkt súkkulaði 70% eða hærra

5 dropar Via Healt Stevia dropar orginal bragð

Kakó, hnetur, kókos, chia eða annað sem hugurinn girnist til að húða trufflurnar.

Hita rjóma á meðalhita. Þegar rjómin er farin að hitna, slökkva undir og bæta súkkulaði og stevia dropum við og hræra þar til alveg blandað við rjómann, verður pínu þykkt. Sett í skál og geymt í ísskáp í minnsta kosti tvo tíma. Gott er að gera kvöldinu áður og geyma í ísskápnum yfir nótt.

Þegar súkkulaðið er orðið hart þá er notuð tsk til að skafa upp úr skálinni og formaðar kúlur með höndunum. Gott að nota hanska því þetta getur orðið pínu subbótt. Rúllað í kókos, muldum hnetum, kakódufti eða öðru sem hugurinn girnist.  Kom skemmtilega á óvart að blanda saman smá chia og chilidufti og rúlla truflunum upp úr. Uppáhaldið mitt er samt sem áður muldar pistasíuhnetur.

Via-Health Steviu droparnir komu mér á óvart þegar ég prófaði í dag og gáfu auka boost í bragðið :) Nýja uppáhaldið mitt og trilljón hugmyndir að fæðast :)

Njótið undir teppi, með kertaljósum og góðri bók eða ef þið eruð eins og ég, beint úr ísskápnum því þið náið ekki alla leið undir teppi með trufflurnar ;)