Heimagert súkkulaði

Súkkulaði, ég þarf varla að skrifa meira er það nokkuð?

Ég elska súkkulaði. Og að gera það alveg frá grunni og vita nákvæmlega hvað er í því er æði og alls ekki eins erfitt og ég bjóst við. Ef þú ert fyrir dökkt súkkulaði mæli ég með þessu. Ef þú hinsvegar vilt frekar mjólkursúkkulaði sem er sætt og rjómakennt þá ættiru samt að prófa þetta en  ég er ekki viss um að þetta sé fyrir þig ;) Súkkulaðið á myndinni er í raun litlir munnbitar. Keypti silikon from í Allt í köku til að nota þar sem súkkulaðið verður svo fallegt og hver biti hæfilegur.

Súkkulaði

1/2 bolli kakósmjör smátt skorið

1/2 bolli kókosolía

1/4-1/2 bolli kakóduft, var sjálf með Green & black

1/4 bolli sukrin melis

hakkaðar möndlur

chili duft

salt

Kakósmjör og kókosolia brædd í potti á lágum hita. Gott að hræra reglulega í.

Þurrefnunum blandað saman í skál og kakósmjör og kókosolia bætt svo við. Hræra vel saman, getur tekið smá stund að fá melisinn til að blandas almennilega. Möndlur, chili og salt sett í eftir smekk hvers og eins. Gott að smakka til. Setja súkkulaðið í form og inní ísskáp í ca klt. Fer eftir forminu og hversu þykkt súkkulaðið er. Geymist svo í ísskáp. Hægt er að sleppa chili og möndlum og hafa súkkulaðið hreint eða setja aðrar hnetur frekar eða krydd. Allt eftir smekk.

Sörur

Ég hef ekki þorað að setja þessa uppskrift inn fyrr en núna. Sörur eru hjá mörgum heilagar og ómissandi um jól og hef ég verið nokkuð stressuð með uppskriftina og hvort fólk myndi vera ánægt með hana. Eftir að hafa látið þónokkra smakka á þeim og fengið góða einkunn þá ákvað ég að tíminn væri komin. Þetta er búið að vera smá vesen að útbúa þessar sörur. Hélt í sakleysi mínu að það væri bara hægt að nota sukrin vörurnar í stað sykurs í sömu hlutföllum, en nei virkaði ekki. Svo ég er búin að gera sörurnar þrisvar sinnum og þriðji skammturinn heppnaðist. Ég reyndi að útbúa blessaða sírópið sem notað er í sörukremið en það var bara ekki hægt að gera síróp úr surkin. Hinsvegar prófaði ég að nota vatn, sukrin og smá xanthan gum til að útbúa sírópið og það virkaði vel, smá vesen en ákvað svo að það væri alveg óþörf í þessa uppskrift.

Þær eru kannski ekki alveg eins og hinu einu sönnu sörur en komast nálægt því.

Sörur

Botn

3 eggjahvítur (stofuhita)

1 dl sukrin melis

70 g möndlumjöl

Eggjahvítu, sukrin og stevia þeytt saman þar til orðið stíft. Möndlumjölið er varlega bætt við og blandað með sleif. Sett á bökunarpappír með skeið eða setja í sprautupoka og sprauta. Það verða ca 20 kökur úr þessari uppskrift og þær stækka ekki í ofninum. Sett í ofn sem er 130 gráður heitur (ekki með blæstri) og bakað í 40 mín.

Krem
1 dl sukrin melis

3 eggjarauður

100 g mjúkt smjör

2 tsk kakó

2 tsk insta kaffi

Öllu blandað vel saman.

Krem er sett á kökurnar þegar þær eru orðnar kaldar. Gott að nota skeið og gera "fjall" úr kreminu. Kökurnar settar í frysti og svo þegar kremið er orðið vel kalt er það bara að dýfa þeim ofan í bráðið súkkulaði :)

Þurrkaðar ávaxtarúllur

Hafi þið lent í því að hvítlaukur springi hjá ykkur? Nei? Ég hef lent í því og það er ekki skemmtilegt. Var með heilan kínverskan hvítlauk í ofninum eitt kvöldið með kjúklingnum og tók út eftir ca hálftíma í ofni. Allt í einu heyri ég popp og hvítlaukurinn er horfinn. Eða ekki beint horfinn, hann var í loftinu, borðinu í eldhúsi og borðstofunni, á veggjum, gluggum, ísskápnum, gólfinu og já hárinu á mér. Fyrst hló ég þegar ég sá bara borðið en fór að gráta þegar ég leit upp í loft og á veggina.

Fátt finnst mér skemmtilegra en að útbúa eitthvað hollt og gott fyrir börnin mín sem þau elska. Þau hvetja mig áfram að prófa mig í eldhúsinu og eru dugleg að segja mér satt ef þau eru ekki hrifin af einhverju. Þessa helgina er ég extra heppinn því öll þrjú börnin eru hjá mér en elsti sonur minn flutti til pabba síns fyrir tveimur árum og varð ég helgarmamma. Hann býr fyrir norðan og kemur því ekki aðra hverja helgi en hann er duglegur að eyða fríum hjá mér og við hringjumst á oft á viku. Það er yndislegt að sjá hvað systkini hans verða glöð þegar hann kemur úr flugvélnni og sjá þau hoppa í fangið á honum. Það er bara þannig að fjölskyldan er ekki alveg heil þegar hann er ekki hjá okkur. En hann er sáttur hjá pabba sínum og blómstrar þar og er ótrúlega heppinn að hafa föðurfjölskylduna alla mjög nálægt og að geta ræktað það samband svona vel.

Ávaxtarúllur

Þetta er í raun ótrúlega auðvelt að gera og þarf bara smá þolinmæði. Gott að taka dag eða kvöld þar sem maður er heima í rólegheitum.

Það sem þarf er jarðaber frosin eða fersk og ef fólk vill sæta þau aðeins er hægt að setja sukrin melis eftir smekk.

Jarðaberin eru maukuð.

Ofninn stillur á 80 gráður

Jarðaberjamauk er dreift á smjörpappír, silikon mottu eða þá böknarpappír sem er búið að spreyja með pam spreyi. Pam spreyið er algjört möst ef á að nota bökunarpappír því annars festist maukið bara á og ekki hægt að losa.

Dreifa maukinu á pappírinn og passa að hafa hann ekki of þunnan. Sett í ofninn og látið vera þar í 2,5-3,5 klukkutíma. Fer allt eftir ofnum og svo finnst mér líka mismunandi eftir jarðaberjum hve langan tíma þetta tekur. Þú veist að hann er tilbúin þegar þú kemur við maukið og það festist ekki við þig. Ef þú ert að gera þetta og þarft að skreppa út úr húsi þá er í lagi að slökkva á ofninum, leyfa þessu að vera þar og kveikja aftur þegar þú kemur heim.

Þegar þetta er tilbúið er varlega dregið af pappírnum og settur á hreinan bökunarpappír. Neðri hliðin getur verið klístruð. Klippt í lengjur og rúllað upp. Hægt að geyma í góðri krukku á borðinu en ég sett mitt í box inn í ísskáp. Þetta endist ekki lengi hér heima. Hægt er í raun að nota hvaða ávexti sem er. Enn sem komið er ég bara búin að prófa jarðaberin en á klárlega eftir að prófa mangó, kíví og bláber fljótlega.

Í gærkvöldi prófuðum við krakkarnir að gera súkkulaði alveg frá grunni með kakósmjöri og ómæ ómæ það var ljúffengt. Þeir sem eru fyrir dökkt og ósætt súkkulaði bíðið bara! 

Jarðaberja chia ís

Eins og ég skrifaði um daginn, fall er fararheill og ég held mig við það. Þrátt fyrir að þjást og sofa illa vegna verkja þá varð ég heppinn í vikunni þar sem ég vann 50 þúsund kr gjafabréf í Smáralindina! Ég, sem aldrei vinn neitt! Fyrsta sem ég hugsaði var SKÓR! Vantar skó, en vantar þá kannski ekki, frekar langar í. Svo ég hugsaði aðeins meir og jú. Það eru að koma jól, og mig er búið að langa hrikalega mikið í George Jensen kertastjaka úr gulli til að nota sem aðventukrans og svo auðvitað er nýr jólaóri frá sama framleiðanda komin. Svo ég ætla fljótlega að gera mér leið í Smáralindina og kaupa mér þetta tvennt. Valkvíðinn heldur svo áfram með restina af gjafakortinu en ætli börnin fái ekki eitthvað dekur frá móður sinni.

Ég ákvað í fyrradag að opna like síðu á facebook vegna fyrirspurnar og ég er eiginlega bara orðlaus yfir viðtökunum! Yfir 1000 like og talan hækkar örlítið með hverjum degi. Það er virkilega gaman að sjá áhuga hjá fólki yfir því sem ég er að gera. Takk fyrir segi ég nú bara! 

https://www.facebook.com/disukokur?ref=hl

En nóg um það. Jarðaberja chia ís var ég búin að nefna og veit að það er beðið eftir þessari uppskrift. Eftir að ég keypti chia fræin var ég ekki viss hvað ég ætti að nota þau í en svo eftir að hafa skoðað netið sá ég að möguleikarnir eru endalausir og að setja hann í ís í stað eggja er snilld! Veit að ísgerð getur verið erfið fyrir þá sem eru með eggjaofnæmi en hér er komin lausn. Og ekki nóg með það, þá gera chia fræin ísinn chruncy í áferð eins og það séu hnetur í honum og ekki finnst mér það verra.

Jarðaberja Chia ís

1 bolli jarðaber

350 ml rjómi

chia 3 msk

vatn 10 msk

sukrin melis 1/2 bolli

Chia fræin eru sett í vatn og látin liggja í ca 30 mín.

Chia fræin eru sett í skál og maukuð smá með töfrasprota.

Öllu hráefninu blandað saman og maukað þar til sættanleg áferð fyrir hvern og einn er komin.

Sett í frysti í nokkra klt. Gott að hræra í ísnum nokkrum sinnum.

Hægt er að borða ísinn strax eftir maukun og hafa sem búðing.

Að nota chia fræ í stað eggja

1 msk chia fræ + 60 ml vatn/mjólk og látið liggja í 5 mínútur = 1 EGG

Jarðaberja sulta með chia fræjum

Yngri sonur minn elskar jarðaber í öllum formum. Jarðaberja sulta, hrein jarðaber, jarðaberjaís og bara allt sem inniheldur jarðaber. Hann velur frekar fersk jarðaber í laugardagsnammi en nammipoka. Sultur, hann elskar líka sultur og að fá sér brauð með sultu gerist varla betra í hans augum. Hinsvegar er mamma hans búin að vera frekar leiðinleg að kaupa ekki sultur upp á síðkastið. Ég reyndi í fyrra fyrstu tilraun mína í sultugerð. Hann varð ekki hrifin. Svo uppgvötaði ég chia fræ. Maukuð jarðaber og chia fræ, það gat bara ekki klikkað. Og þar sem mamman er en slæm í baki eftir að hafa fallið þá mátti þetta ekki taka langan tíma í eldhúsinu og viti menn, ljúffeng sulta á 5 mínútum og barnið......já barnið elskar sultuna :)

En áður en ég skrifa uppskriftina langar mig að segja aðeins frá chia fræjum. Textinn er tekin af síðunni heilsubot.is

Chia fræin er ein kraftmesta, hentugasta og næringarríkasta fæðan á markaðinum í dag. Þau eru frábær uppspretta af andoxuefnum, heilpróteinum, vítamínum og steinefnum. Þau eru einnig ríkasta plöntuuppsretta omega 3 fitúsyra sem vitað er um.

Einn af hinum miklu kostum chia fræja er það hversu mikið vatn þau geta innibyrgt eða um 9 falda þyngd sína á innan við 10 mínútum. Þessi hæfileiki gerir það að verkum að vökvabúskaður líkamans verður meiri og varir í lengri tíma. Með chia fræjum þá varðveituru meiri raka og stjórnar frekar upptöku líkamans á næringarefnum. Vegna þes hve mikið af vatni fræjin drekka í sig og hve hátt hlutfall af vatnsleysanlegum trefjum þau innihalda þá eru þau kjörin til þess að stjórna betur kolvetnaupptöku líkamans. Fræjin gera það að verkum að umbreyting kolvetna í sykur í líkamanum verða hægari sem leiðir til þess að orkan varir lengur og sveiflur í blóðsykri verða minni. 

Jarðaberja sulta með Chia

1 bolli jarðaber fersk eða frosin

1 msk chia

1 msk heitt vatn

2 tsk sukrin melis má sleppa

1 msk sítrónu safi

Allt sett í skál og blandað með töfrasprota eða nota aðrar græjur sem henta. Ég sjálf notaði tupperware saxarann minn.

Þegar búið er að blanda setja í krukku og loka og inn í ísskáp. Auðvelt ekki satt? Ef ykkur finnst sultan of þunn er hægt að bæta hálfri tsk af chia í viðbót til að þykkja hana. Þessi uppskrift passaði í eina dijon sinneps krukku.

Alexander Gauti var ekki lengi að smakka sultuna og krukkan verður kláruð með þessu áframhaldi í vikunni.

Jógúrt búðingur

Fall er fararheill er stundum sagt. Já ég vona. Ég get verið óttalegur klaufi og var það í vikunni þegar ég náði að detta í tröppunum heima og hálf skemma á mér bakið. Þá er ekki hægt að standa lengi í eldhúsinu og dúlla sér. Ég var samt búin að lofa einhverju góðu gúmmelaði með sjónvarpinu í kvöld og hvað á að taka til bragðs? Jú ég átti sykurlaust jarðaberja jello og ákvað að kaupa grískt jógúrt og gera búðing fyrir börnin. Þetta tók mig innan við tíu mínútur.

Þó jello-ið sé sykurlaust er allskonar efni í því og er ég ekki neitt rosa hrifin af því frá hollustu hliðinni en stundum, já stundum þá lætur maður það duga og útkoman var bara ljómandi góð satt að segja og fínt að nota hana einstaka sinnum.

Jógúrt búðingur

1 pakki sykurlaus jello

1 dolla grísk jógúrt

2 tsk vanilludropar

Jógúrt og vanilludropar blandað saman vel í skál. Jello bætt út í og hrært í vatnsbaði þar til jello sykurinn er alveg uppleystur. Sett í muffinsform og inn í ísskáp í 30-60 mín.

Gott að bera fram með smá þeyttum rjóma. 

Blómkálspizzubotn og heimagerð pizzusósa

Ágúst að klárast. Börnin byrjuð í skólanum og leikskóla og ég farin að vinna. Það er alltaf gott að fá smá rútínu eftir sumarfrí. Hvað þá þegar sumarfríið fór að hluta til að gera upp og mála íbúðina.  Ég er pínu skrítin að alltaf í lok ágúst er ég farin að hlakka til jóla. Það er orðið dimmt á kvöldin og hægt að kveikja á kertum og hafa kósý og einhvern vegin minnir það mig á jólin. Og ég fór að hugsa....jól og sörur. Jól og lkl sörur, svo núna er ég á fullu að vinna í því að gera skothelda söru uppskrift fyrir jólin. Það er ekki eins auðvelt og ég hélt en þetta fikrast áfram og verður vonandi tilbúið fyrir jól.

Svona ein af afrakstri sumarsins ;)

En ég ætlaði nú ekki að tala meira um jólin (120 dagar!) og fara í pizzuna. Ég hef aldrei verið fyrir blómkál en fór einhvern vegin að elska það. Elska að búa til blómkálspoppið og ákvað að prófa að gera pizzubotn úr blómkáli. Hljómar ekkert sérlega vel en trúið mér, það er gott! 

Pizzubotn

1 Blómkálshaus (ekki of stóran)

1 egg

2 dl rifin ostur

1 tsk hvítlaukssalt

2 msk möndlumjöl (valfrjálst, ég sleppi)

Byrja á því að skola vel af blómkálinu og láta þorna. Því næst er að skera blómkálið niður í litla bita og sleppa stilkinum alveg. Setja í matvinnsluvél þar til að það verður eins og hrísgrjón.

Næst er að setja hrísgrjónin í pott með smá vatni og láta sjóða í nokkrar mín. Þetta hjálpar til með að losa vökva úr blómkálinu.

 Því næst er að sigta frá vatnið og leyfa grjónunum að kólna.

Þegar grjónin hafa fengið að kólna eru þau sett í viskustykki og þá er að vinda vel og vandlega allan vökva úr grjónunum.

Þegar búið er að vinda eiga grjónin að líta svona út, eins og lítil deigkúla.

Hráefnum er blandað saman í skál og best er að nota hendurnar.

Bökunarpappír er svo spreyjað með Pam spreyi eða olíu til að passa að botninn festist ekki við og auðvelda að losa frá eftir eldun.

Nota hendurnar til að mynda pizzuna. Deigið á að vera blautt í sér. Passa þarf samt að pizzan má ekki vera of þunn. 

Setja botninn í 180 gr heitann ofn og bakað í 10-20 mín eða til gullinbrúnt. Gott er að hafa ofnplötuna í ofninum þegar hann er að hitna.

Nú er að setja sósu og álegg á pizzuna og aftur inn í ofn þar til osturinn er bráðnaður. Gott ráð er að setja ekki of mikla sósu þar sem blómkálið á það til að sjúga í sig vökva og því gætu dagnn eftir pizza verið dálítið blaut.

PIZZUSÓSA

Gerir um 450 ml.

1 1/2 tsk olía

1/2 eða lítill laukur saxaður

3-4 hvítlauksgerirar

1 dós af tómötum

1/2 tsk sukrin eða sukrin gold

2 tsk oregano

2 tsk basil

1 tsk hvítlaukssalt

2 tsk pizzukrydd.

Hita olíu á pönu á meðal hita. Bæta lauk og elda til hann er mjúkur. Hvítlaukur bættur við og eldað í 2 mín. Því næst er það tómatarnir og kryddið. Þegar sósan byrjar að malla hitann og leyfa að malla í ca 15 mín. Mauka svo með töfrasprota. 

Sósan er heldur bragðlítil fannst mér þegar ég gerði hana fyrst og því setti ég hér fyrir ofan meir af kryddum. Hún er líka aðeins bragðminni þegar hún er heit og kom meira bragð á hana þegar hún kólnaði. Annars er bara að smakka sig til og byrja kannski með helmingi minna af kryddum og frekar þá bæta við. Ég vil  hafa mína pizzasósu bragðmikla ;)

En endilega fylgist með hér inná því fljótlega kemur söru uppskriftin inn! Það er hægt að skrá sig á póstlista og fá eimail þegar ég set nýjar uppskriftir inn ef áhugi er fyrir því :)