Kókostoppar

Það er viss bölvun að vera fædd í desember.

Ég elska desember og jól og í október þá er ég farin að eiga erfitt með mig og jólin löngu komin í huganum. Ég tel þetta vera því ég er fædd í desember. Í ár er ég extra slæm því ég nota bloggið sem afsökun til að baka jólakökur, finna smá jólaskraut til að skreyta myndir með og til að ég lifi mig sem mest inn í  jólin þá já, hlusta ég á jólalög. Blessuð bölvunin ;)

Núna var ákveðið að prófa að gera kókostoppa. Uppáhaldið hjá eiginmanninum, skulum sjá hvort hann sætti sig ekki í ár við þessar LKL kókostoppa. Hef ekki trú á öðru enda heppnuðust þær mjög vel :)

Kókostoppar

60g mjúkt smjör

1 dl sukrin melis

1 egg

150g kókosmjöl

Egg og sukrin melis þeytt vel saman í skál. 

Smjör bætt við og þeytt vel saman við.

Kókosmjöl bætt við og varlega blandað með sleif.

Búa til litla toppa (gerði mína aðeisn of stóra fékk 15 stk) og gott að kreista smá vökvann úr.

Setja á bökunarpappír og í 175 g heitann ofn í ca 15 mínútur.
Gott að láta þær kólna á smá eldhúspappíri.

Mjög gott að bræða súkkulaði og setja á botninn eða toppinn á kökunum en ég var orðið súkkulaðilaus aldrei þessu vant.

Ég drekk mikið vatn og stundum fæ ég nóg af hversu bragðlaust það er og ákvað að prófa að setja stevía dropa í vatnskönnu og mitt uppáhald er núna Via-Health Grape stevia. Í stóra könnu af vatni set ég svona fimm dropa og er svo með sleif til að hræra í. Búin að sötra á þessu í allan dag :)

Bláberja-rjómaosta ís

Bláberja rjómaostaís, já það hljómar skringilega en kemur skemmtilega á óvart.

Það er alltaf gaman að prófa sig áfram í eldhúsinu, hvað þá þegar eitthvað eins og þetta verður til.

Bláberja rjómaostaís

1/2 l rjómi

30 g sukrin melis

2 eggjarauður

90 g rjómaostur

250 g íslensk bláber

10 dropar Via-Health stevía, original

Eggjarauður, stevía og sukrin melis þeytt saman.

Rjómi hitaður í potti á miðlungshita þar til hann er komin rétt yfir líkamshita.

Rjómi bætt við rauður og þeytt vel saman.

Blandan sett í pott hrært í þar til hún er farin að þykkjast aðeins.

Taka af hellunni og rjómaostur blandaður við.

Bláber maukuð eftir smekk og blandað við ísinn.

Sett í frysti í 2-3 tíma og gott að hræra reglulega í ísnum.

Súkkulaði trufflur

Bloggstuðið heldur áfram samhliða því að vera að prófa mig áfram í eldhúsinu. Eins og í gærkvöldi. Ég fæ stundum hugmynd sem mér finnst frábær og verð að prófa og  hugurinn verður ekki rólegur fyrr en ég er búin að framkvæma hana. Annars á ég von á svefnlausri nótt.

Í gær átti súkkulaði og rjómi hug minn allan og útkoman var trufflur. Þetta var mjög auðvelt að gera og bragðið.....skal alveg viðurkenna að ég sá eftir þessum tveimur trufflum sem fóru ofan í gestina mína í kvöld. Fullkomið konfekt fyrir jólin :)

Út um herbergisgluggan minn í morgunn. Játa það að ég fór að syngja white christmas í huganum þegar ég sá þetta og að ég var extra glöð enda mikið jólabarn og æðislegt að fá einn svona fallegan dag.

Súkkulaði trufflur

150 ml rjómi

100 g dökkt súkkulaði 70% eða hærra

5 dropar Via Healt Stevia dropar orginal bragð

Kakó, hnetur, kókos, chia eða annað sem hugurinn girnist til að húða trufflurnar.

Hita rjóma á meðalhita. Þegar rjómin er farin að hitna, slökkva undir og bæta súkkulaði og stevia dropum við og hræra þar til alveg blandað við rjómann, verður pínu þykkt. Sett í skál og geymt í ísskáp í minnsta kosti tvo tíma. Gott er að gera kvöldinu áður og geyma í ísskápnum yfir nótt.

Þegar súkkulaðið er orðið hart þá er notuð tsk til að skafa upp úr skálinni og formaðar kúlur með höndunum. Gott að nota hanska því þetta getur orðið pínu subbótt. Rúllað í kókos, muldum hnetum, kakódufti eða öðru sem hugurinn girnist.  Kom skemmtilega á óvart að blanda saman smá chia og chilidufti og rúlla truflunum upp úr. Uppáhaldið mitt er samt sem áður muldar pistasíuhnetur.

Via-Health Steviu droparnir komu mér á óvart þegar ég prófaði í dag og gáfu auka boost í bragðið :) Nýja uppáhaldið mitt og trilljón hugmyndir að fæðast :)

Njótið undir teppi, með kertaljósum og góðri bók eða ef þið eruð eins og ég, beint úr ísskápnum því þið náið ekki alla leið undir teppi með trufflurnar ;)

Lamba innralæri með blaðlauks sveppa sósu

Á fimmtudaginn áttum við hjónin brúðkaupsafmæli. Í ár ákváðum við að gera eitthvað sem við höfum aldrei gert, fara tvö saman í bústað og vera í heila helgi! Já, heil helgi bara tvö út í buska. Og þvílíkt sem það var yndislegt. Einu skiptin sem ég fór úr húsi var til að hoppa í pottinn annars voru það náttföt og kósíheit. Við spiluðum mikið, borðuðum æðislegan mat, hlógum mikið og nutum þess að eiga hvort annað. Kannski extra mikið langþráð frí þar sem við hittumst alltof sjaldan og satt að segja er mjög erfitt að taka heila helgi af stuttri dvöl hans frá börnunum, en stundum þá verðum við að vera eigingjörn og vera bara tvö.

Ég fékk að velja matinn fyrir föstudaginn og Jónbi fyrir laugardaginn. Val hans var lamba innralæri með blaðlauks sveppa sósu eins og mamma hans gerði þegar hann var yngri. Maturinn var æðislegur og ekki annað hægt en að deila með ykkur hér á blogginu.

Grillað lamba innralæri með blaðlauks sveppa sósu

Fyrir tvo

300-400 g innralæri

lamb islandia krydd

Innralæri kryddað með Lamb Islandia kryddi eða öðru kryddi, helst kvöldið áður.
Grillið á vel heitu grilli í 2 mín á hvorri hlið eða þar til kjötið er orðið fallega brúnt.
Lækkið þá hitann á grillinu eða hækkið grillgrindina og grillið í 8-10 mín í viðbót. Passið að snúa kjötinu reglulega á meðan.

Blaðlauks og sveppa sósa

150 g sveppir

1 lítill blaðlaukur

250 ml rjómi

1 msk smjör

salt og pipar

stilkur af blaðlauki og sveppir saxað smátt og steikt á pönnu með smjöri í nokkrar mín. Rjómi bætt við og þegar suða kemur upp er slökkt undir og hrært í sósunni. Saltað og piprað eftir smekk.

Salatið sem ég varð með var spínat, smátt söxuð appelsínugul paprika, fetaostur, parmaskinka og parmesan ostur. Gat ekki verið betra :)

Rjóma grýta með blómkálsmús

Kannski komin smá tími til að setja inn uppskrift af mat í stað gotterís. Versta samt að með matarmyndirnar eru að þær eru ekki góðar. Er yfirleitt orðin svo svöng þegar maturinn er tilbúinn og næ ekki að hlaupa inn í herbergi og ná í myndavélina svo síminn fær að duga :) Í kvöld átti að gera eitthvað með hakki og langaði mig að prófa eitthvað nýtt. Útkoman var góð og verður gerð aftur fljótlega. Þó ég sé pakksödd mun ég örugglega stelast inn í eldhús seinna í kvöld og fá mér smá á disk.

 Það sem kom mér mest á óvart var hversu góð blómkálsmúsin var. Ég byrjaði að borða blómkál þegar ég fór að borða lkl mat en get ennþá ekki borðað hana soðna eða hráa svo ég er búin að vera ansi smeik að prófa músina. Það sem hún var góð! Ætlaði ekki að trúa því og hvað það er líka auðvelt að gera hana! Nýja uppáhaldið mitt og efast um að ég fari aftur í venjulega kartöflumús.

Grýta

1 pakki nautahakk. (ca 800g)

1 laukur

3-4 hvítlauks geirar saxað

3 msk tómatpúrra

3-4 msk dijon sinnep

2 msk smjör

1 dolla sýrður rjómi 18%

1,5 dl rjómi

salt og pipar eftir smekk ásamt kryddum sem hver og einn kýs
(setti sjálf, salt pipar, smá graslauk úr garðinum og steikar og grillkrydd)

Rifin parmesan ostur

Grænmeti sem til er í ísskápnum. Paprika, sveppir, brokkolí eða annað lágkolvetna grænmeti

Fínsaxaður laukur settur á djúpa pönnu með smjöri. Látin mýkjast. 

Hakki og hvítlauki bætt á pönnu og brúnað.

Tómatpúrra og dijon sinnep bætt út ásamt kryddum eftir smekk. Hrært vel í.

Sýrður rjómi og rjómi sett út í ásamt niðurskorðu grænmeti og látið malla í smástund.

Rifin parmesan ostur er svo rifin niður á blómkálsmúsina og grýtuna þegar komið er á diskinn :)

Blómkálsmús

Skera blómkál í bita og gufuðsoðið þar til mjúkt í gegn. Ég setti það í tuppeware saxara sem ég á ásamt góðri smjörklípu, rifnum parmesan osti og smá salti og maukaði. Hægt er í raun að nota margar aðferðir við að bragðbæta músina. Setja dijon sinnep, sýrðan rjóma, cheddar ost. Láta hugmyndaflugið ráða :)

Möndlumjólk

Fyndið hvað bloggstuð kemur og fer hjá mér. Stundum fæ ég mig ekki til að setjast niður og setja uppskriftir á bloggið í lengri tíma og stundum gæti ég sett uppskriftir inn á klt fresti.

Nú er hafin meistaramánuður. Ég er meistari að setja mér allskonar markmið og áramótaheit sem ég næ aldrei að standast svo ég verð líklega ein af fáum sem tek ekki þátt. Hinsvegar ætla ég að halda áfram að gera það sem ég hef mest gaman af, að standa inn í eldhúsi að prófa mig áfram og blogga um það :)

Ég er búin að vera á leiðinni að prófa að búa til möndlumjólk. Aldrei hefði mér dottið í hug að ég myndi vilja smakka og hvað þá búa til möndlumjólk en svona kemur lífið skemmtilega á óvart. Ég er búin að taka Chia fræjum ástfóstri og núna vil ég fá chia búðing á hverjum degi. Hinsvegar er búið að vanta smá tilbreytingu og þá kemur möndlumjólkin sterk inn.

Möndlumjólk

1 bolli möndlur

4 bollar vatn

2 msk sukrin

1/2 tsk vanilludropar

oggulítið af salti

Möndlur settar í skál og vatn látið ná yfir þær allar. Látið liggja yfir nótt. Vatn af möndlunum sett í blandara eða skál og bætt við það sem vantar upp á þessa 4 bolla af vatni. Möndlur settar með og blandað vel í nokkrar mínútur í blandara eða með töfrasprota. Sigta frá möndluhratið í sigti, setja það svo í viskustykki og vinda vel til að ná öllum dropunum af möndlumjólkinni. Geymist í ísskápnum í tvo til þrá daga :)

Vanillubúðingur

Það er alltaf jafn yndislegt þegar öll fjölskyldan er sameinuð hjá mér. Það getur verið flókið þar sem bóndinn vinnur á Grænlandi og elsti sonurinn býr á Húsavík. En þegar það gerist þá er það æði. Verst er það að flug til og frá Grænlandi er meira og minna upp á heppni þar sem oft er ófært vegna veðurs. Nú var það ekki rokið sem hélt bóndanum frá því að komast heim í einn og hálfan sólahring heldur þoka. Þessi bið er mér ótrúlega erfið þegar búið er að telja niður vikur, daga, klukkustundir og mínútur og börnin, já þeim finnst það ekki neitt gaman. 

Hinsvegar er alltaf gaman að fá pakka :) Börnin fá yfirleitt föt núna enda nóg af dóti til og ég fæ eitthvað sætt sem er ekki hægt að fá hér heima. Bóndinn og félagar hans hafa verið að vinna fyrir eina Grænlenska listakonu og fékk hann að gjöf styttur frá henni. Ekki var svo verra þegar hann keypti handa mér armhlífar prjónaðar úr Grænlenskri sauðnauts ull. Já sauðnauts ull. Mýkra ull hef ég ekki komist í kynni við og það besta, stingur ekki! Nú býð ég eftir að hann fari aftur út (jahh, svona næstum því) svo hann geti keypt handa mér meira af vörum frá þessari listakonu :) Reyndar þarf ég sjálf að fara koma mér út í helgarferð til Nuuk og skoða og kynnast því lífi sem maðurinn minn er búinn að byggja sér upp þar.

Inuk Design

Vanillubúðingur

 2 eggjarauður

1 msk sukrin melis

1/2-1 vanillustöng

1,5 dl rjómi

Rauður, sukrin melis, fræ úr vanillustöng þeytt saman.

Rjómi þeyttur.

Öllu blandað saman og sett inn í ísskáp í 30-60 mínútur.

Einfaldur, góður og seðjandi. Myndi segja að þessi sé fyrir2-4, eftir því hversu mikill græðgi ræður ferðinni ;)
Gott að setja fersk ber, berjamauk, chia sultu eða karamelluna héðan af blogginu á búðinginn.

Net carb í allri uppskriftinni er undir 5g.

Ætla að minna á facebook síðuna mína, Dísukökur, hægt að like-a hana og fylgjast með nýjum uppskriftum sem koma inn :) linkur hér fyrir neðan

Dísukökur