Piparkökur

Ég var búin að ávkeða að reyna búa til piparkökur sem væru lkl vænar fyrir jólin en var alls ekki komin í þann gír. En svo var ég með strákinn minn á körfuboltaæfingu í dag og þar finnst mér gaman að sitja með litlu stílabókina mína og hugsa um uppskriftir. Þá datt þessi uppskrift í hausinn og ég gat að sjálfsögðu alls ekki beðið með að prófa hana því ég er búin að þrá að fá mér kalda mjólk og piparköku í nokkurn tíma.

Þetta var svo auðvelt, enda grunnuppskriftin löngu komin á bloggið, eina sem ég þurfti í raun að gera var að taka út kakóið og bæta við piparköku kryddum.

Piparkökur

3 dl möndlumjöl

2 msk kókoshveiti

3 msk sukrin eða sukrin gold

2 msk rjómi

1/4 tsk negull

1/2 tsk kanill

1/4 tsk engifer

1 egg

1 tsk lyftiduft

1 tsk vanilludropar

þurrefnum blandað saman og svo restinni. Blandað vel saman og gerðar litlar kúlur sem settar eru á bökunarpappír. Bakað í ofni í 8-10 mín á 175 gráður. 

Það var ekki leiðinlegt að setjast niður með börnunum áðan við kertaljós, tónlist, kalda mjólk (já ég lét eftir mér smá mjólk en hægt að hafa laktósfría eða möndlumjólk) og piparkökur. Ég ætlaði reyndar að hafa kósý í kvöld og fá mér smá yfir sjónvarpinu en þær voru fljótar að klárast og verð bara að gera meira fljótlega. Ég náði heldur ekki betri mynd af kökunum því þrjú börn biðu mjög spennt eftir að gæða sér á þeim og það var ekki þolinmæði til fyrir myndatöku.